ಬೆಂಗಳೂರು; ಅನೈತಿಕ ಸಂಬಂಧದ ಹಿನ್ನೆಲೆಯಲ್ಲಿ ಪತ್ನಿಯ ಮೇಲೆ ಚಾಕುವಿನಿಂದ ಹಲ್ಲೆಗೈದಿರುವ ವ್ಯಕ್ತಿ, ಪೊಲೀಸರಿಗೆ ಶರಣಾಗಿರುವ ಘಟನೆ ಮಂಗಳವಾರ ಗರುಡಾಚಾರ್ ಪಾಳ್ಯದ ಲಕ್ಷ್ಮಿಸಾಗರದಲ್ಲಿ ನಡೆದಿದೆ.

ಘಟನೆಯಲ್ಲಿ ಇರಿತಕ್ಕೆ ಒಳಗಾಗಿರುವ ಅಮರಾವತಿ (34) ಆಸ್ಪತ್ರೆಯಲ್ಲಿ ಸಾವು ಬದುಕಿನ ನಡುವೆ ಹೋರಾಡುತ್ತಿದ್ದಾರೆ. ಈಕೆಯ ಪತಿ ನಾಗರಾಜ್ ಪೊಲೀಸರ ವಶದಲ್ಲಿದ್ದಾನೆ. ಶ್ರೀನಿವಾಸಪುರ ಮೂಲದ ನಾಗರಾಜ್ ಸರ್ಜಾಪುರದಲ್ಲಿ ಸೈಕಲ್ ಶಾಪ್ ನಲ್ಲಿ ಕೆಲಸ ಮಾಡುತ್ತಿದ್ದ. 17 ವರ್ಷದ ಹಿಂದೆ ಅಮರಾವತಿ ಅವರನ್ನು ವಿವಾಹವಾಗಿದ್ದ.

ದಂಪತಿಗೆ ಇಬ್ಬರು ಮಕ್ಕಳಿದ್ದು, ಕಳೆದ 8 ವರ್ಷಗಳಿಂದ ಲಕ್ಷ್ಮೀ ಸಾಗರದಲ್ಲಿ ನೆಲೆಸಿದ್ದರು. ಎದುರು ಮನೆ ವ್ಯಕ್ತಿಯೊಂದಿಗೆ ಅಮರಾವತಿ ಅಕ್ರಮ ಸಂಬಂಧ ಹೊಂದಿದ್ದಳು. ಈ ಬಗ್ಗೆ ಅನೇಕ ಬಾರಿ ನಾಗರಾಜ್ ಬುದ್ಧಿ ಹೇಳಿ, ಎಚ್ಚರಿಕೆ ನೀಡಿದ್ದ ಎಂದು ಪೊಲೀಸರು ತಿಳಿಸಿದ್ದಾರೆ.

ನಂತರವೂ ಅಮರಾವತಿ ಅಕ್ರಮ ಸಂಬಂಧ ಮುಂದುವರಿಸಿದ್ದಳು. ಎಷ್ಟೇ ಹೇಳಿದರೂ ತನ್ನ ಮಾತಿಗೆ ಗೌರವ ನೀಡಿದ್ದರಿಂದ ಕೋಪಗೊಂಡ ನಾಗರಾಜ್ ಮಧ್ಯಾಹ್ನ 1ರ ಸುಮಾರಿಗೆ ಅಮರಾವತಿಯ ಕುತ್ತಿಗೆ ಬಲವಾಗಿ ಇರಿದು ಹೊರ ನಡೆದಿದ್ದಾನೆ. ಬಳಿಕ ಈಕೆಯ ಚೀರಾಟ ಕೇಳಿದ ನೆರೆಹೊರೆಯವರು ಮನೆಗೆ ಬಂದು ನೋಡುವ ವೇಳೆಗೆ ಅಮರಾವತಿ ರಕ್ತದ ಮಡುವಿನಲ್ಲಿ ಒದ್ದಾಡುತ್ತಿದ್ದಳು. ತಕ್ಷಣ ಆಕೆಯನ್ನು ಸಮೀಪದ ಆಸ್ಪತ್ರೆಗೆ ದಾಖಲಿಸಿದ್ದರು.

ನೇರ ಠಾಣೆಗೆ
ಪತ್ನಿಗೆ ಚಾಕುವಿನಿಂದ ಇರಿದ ಬಳಿಕ ನಾಗರಾಜ್, ನೇರ ಮಹದೇವಪುರ ಪೊಲೀಸ್ ಠಾಣೆಗೆ ತೆರಳಿದ್ದಾನೆ. ಪತ್ನಿಯನ್ನು ಕೊಲೆಗೈದಿರುವುದಾಗಿ ಹೇಳಿ ಶರಣಾಗಿದ್ದಾನೆ. ಮೂರು ವರ್ಷಗಳಿಂದ ಅಮರಾವತಿ ಅನೈತಿಕ ಸಂಬಂಧ ಹೊಂದಿದ್ದಳು. ಎಷ್ಟೇ ಬುದ್ಧಿವಾದ ಹೇಳಿದರೂ ಕೇಳದೆ ಚಾಳಿ ಮುಂದುವರಿಸಿದ್ದಳು. ಹಾಗಾಗಿ ಆಕೆಯನ್ನು ಕೊಲೆ ಮಾಡಲು ಇರಿದೆ ಎಂದು ಒಪ್ಪಿಕೊಂಡಿದ್ದಾನೆ.