ಬೆಂಗಳೂರು: ರಸಂ ಮತ್ತು ಸಾಂಬಾರ್ ಸರಿಯಿಲ್ಲ ಎಂಬ ಕ್ಷುಲ್ಲಕ ಕಾರಣಕ್ಕೆ ವರನೊಬ್ಬ ಮದುವೆಯನ್ನೇ ಬಿಟ್ಟು ಪರಾರಿಯಾಗಿರುವ ಘಟನೆಯೊಂದು  ತುಮಕೂರಿನ ಕುಣಿಗಲ್ ಪಟ್ಟಣದಲ್ಲಿ ಬುಧವಾರ ನಡೆದಿದೆ.

ವಧು ರಾಜು ಎಂಬ ವ್ಯಕ್ತಿಯೇ ಪರಾರಿಯಾದ ವ್ಯಕ್ತಿಯಾಗಿದ್ದು, ಈತ ಬೆಂಗಳೂರಿನ ಶ್ರೀರಾಂಪುರದ ನಿವಾಸಿಯಾಗಿದ್ದಾನೆ. ವಧು ಹಾಗೂ ವರನ ಕಡೆಯವರೂ ಒಂದೇ ಜಾತಿಯವರಾದ್ದರಿಂದ ಇಬ್ಬರೂ ಕಡೆಯ ಕುಟುಂಬದವರು ಮದುವೆಯನ್ನು ಗೊತ್ತು ಮಾಡಿದ್ದರು.

ಕುಣಿಗಲ್ ಪಟ್ಟಣದಲ್ಲಿರುವ ಕೊಲ್ಲಾಪುರದಮ್ಮ ಕಲ್ಯಾಣ ಮಂಟಪದಲ್ಲಿ ಮದುವೆ ಸಮಾರಂಭವನ್ನು ಏರ್ಪಡಿಸಲಾಗಿತ್ತು. ನಿನ್ನೆ ಆರತಕ್ಷತೆ ಸಮಾರಂಭದ ನಂತರ ಭೋಜನಕೂಟದಲ್ಲಿ ಭಾಗವಹಿಸಿದ್ದ ವರನ ಸಂಬಂಧಿಕರು ರಸಂ ಹಾಗೂ ಸಾಂಬಾರ್ ಸರಿಯಿಲ್ಲ ಎಂದು ಖ್ಯಾತೆ ತೆಗೆದಿದ್ದಾರೆ. ಇದರಿಂದಾಗಿ ಕಳೆದ ತಡ ರಾತ್ರಿಯಿಂದಲೂ ವಧು-ವರ ಇಬ್ಬರ ಕಡೆಯ ಸಂಬಂಧಿಕರ ನಡುವೆ ಜಗಳವಾಗಿದೆ.

ಈ ವೇಳೆ ರಾಜುವಿನ ಮಲತಾಯಿ ಗೌರಮ್ಮ ಕೂಡ ವಧುವಿನ ಕುಟುಂಬಸ್ಥರೊಂದಿಗೆ ಮಾತಿನ ಚಕಮಕಿ ನಡೆಸಿದ್ದಾರೆ. ನಂತರ ವರ ರಾಜು ಮಲತಾಯಿ ಗೌರಮ್ಮಳಿಗೆ ಸಾಥ್ ನೀಡಿ ಮದುವೆ ಮನೆಯಿಂದಲೇ ಪರಾರಿಯಾಗಿದ್ದಾಳೆ. ಘಟನೆಯಿಂದ ತೀವ್ರವಾಗಿ ನೊಂದಿದ್ದ ವಧು ಸೌಮ್ಯಾಳ ಕುಟುಂಬಸ್ಥರು ಸಂಬಂಧಿಕರು ಮದುವೆ ನಿಲ್ಲಲು ಬಿಡದೆ ಸಂಬಂಧಿಕ ಗೋವಿಂದರಾಜು ಎಂಬ ವ್ಯಕ್ತಿಯ ಜೊತೆ ಮದುವೆ ಮಾಡಿಸಿದ್ದಾರೆ.