ಕಾಳೀಹುಂಡಿ ಶಿವಕುಮಾರ್ ಮೈಸೂರು 9844883581
ಪ್ರೇಮಿಗಳ ದಿನಾಚರಣೆಯನ್ನು ನೀವು ಆಚರಿಸಿದ್ರಾ ಭಟ್ರೇ?
ಅದೊಂದೇ ದಿನ ಆಚರಿಸುವಷ್ಟು ಅರಸಿಕ ನಾನಲ್ಲ!

ರಮೇಶಭಟ್ ಅವರ್ತೆ, ಕುಂದಾಪುರ 9164276058
ಮಹಿಳೆಯರ ಮೇಲೆ ಅತ್ಯಾಚಾರ ತಪ್ಪಿಸಲು ಮುಸ್ಲಿಂ ಮಹಿಳೆಯರಂತೆ ಹಿಂದೂ ಮಹಿಳೆಯರಿಗೂ ಬುರ್ಖಾ ತೊಡುವ ಸಂಪ್ರದಾಯ ಜಾರಿಗೆ (ತಂದರೆ) ಹೇಗೆ?
ಗಂಡಸರೂ ಬುರ್ಖಾ ತೊಡುವಂತಾಗಲಿ ಎಂದು ಹಗಲು ಬಿಜೆಪಿಯಲ್ಲಿ, ರಾತ್ರಿ ಕೆಜೆಪಿಯಲ್ಲಿ ಇರುವವರ ಆಗ್ರಹವಂತೆ!

ಕೆ.ಎನ್. ನಾರಾಯಣರೆಡ್ಡಿ, ಕೆ.ಜಿ.ಎಫ್.
ನಮ್ಮ ದೇಶದಲ್ಲಿ ದುಷ್ಟರು ಹೆಚ್ಚಾಗುವ ಹಾಗೆ ಪೂಜಾಮಂದಿರಗಳೂ ಹೆಚ್ಚಾಗುತ್ತಿವೆಯಲ್ಲಾ; ಕಾರಣವೇನು?
ದುಷ್ಟರಿಗೆ ಸಾಂತ್ವನ ಸಿಗುವ ತಾಣ ಅದೊಂದೇ!

ಫ್ಯಾಷನ್ ಡಿಸೈನರ್ ಮಧು, 99457-37427
ಆ ಚೆಲುವಗೆ ಕಾಲ್ ಮಾಡಿದರೆ "ನೀವು ಕರೆ ಮಾಡಿರುವ ಸುಂದರಿ ಮೇಕಪ್‌ನಲ್ಲಿ ಬ್ಯುಸಿಯಾಗಿದ್ದಾಳೆ ಒಂದು ಗಂಟೆ ನಂತರ ಪುನಃ ಪ್ರಯತ್ನಿಸಿ" ಎಂಬ ಧ್ವನಿ ಕೇಳುತ್ತಲ್ಲಾ?
ನನ್ನ ಚೆಲುವೆಗೆ ಹೋಲಿಸಿದರೆ ಒಂದು ಗಂಟೆ ಕಾಯೋದೇ ವಾಸಿ!

ಬಸವನ ಗೌಡ ಹೆಬ್ಬಳಗೆರೆ, ಚನ್ನಗಿರಿ
ಸಿನಿಮಾದಲ್ಲಿ 'ಆದರ್ಶಪ್ರೇಮ'ದ ಸಂದೇಶವನ್ನು ಸಾರುವ ಕೆಲ ನಟಿಯರೇಕೆ ನಿಜ ಜೀವನದಲ್ಲಿ ಅದನ್ನು ಅನುಸರಿಸುವುದಿಲ್ಲ?
ವೇಶ್ಯೆಯ ಪಾತ್ರ ಮಾಡಿದ ನಟಿಯ ಬಳಿಯೂ ಹೀಗೇ ಕೇಳಿದರೆ ಕಷ್ಟ!

-ಬಾಣಭಟ್ಟ