ಬೆಂಗಳೂರು: ದಿನ ಬಳಕೆಯ ಹಾಲು ಮತ್ತು ಮೊಸರಿನ ಬೆಲೆ ಏರಿಕೆಯ ಬೆನ್ನಲ್ಲೇ ಕರ್ನಾಟಕ ಹಾಲು ಮಹಾಮಂಡಳಿಯು (ಕೆಎಂಎಫ್) ರಾಜ್ಯದ ಜನತೆಗೆ ಮತ್ತೊಂದು ಆಘಾತ ನೀಡಿದೆ. ಹೌದು, ಜನಸಾಮಾನ್ಯರ ಅಡುಗೆ ಮನೆಗೆ ಅನಿವಾರ್ಯವಾಗಿರುವ ನಂದಿನಿ ತುಪ್ಪ, ಬೆಣ್ಣೆ ಹಾಗೂ ಪನೀರ್ ದರಗಳನ್ನು ಭಾರಿ ಪ್ರಮಾಣದಲ್ಲಿ ಹೆಚ್ಚಿಸಲಾಗಿದ್ದು, ಮಧ್ಯಮ ವರ್ಗದವರ ಹಾಗೂ ಹೋಟೆಲ್ ಉದ್ಯಮಿಗಳ ಜೇಬಿಗೆ ಮತ್ತಷ್ಟು ಕತ್ತರಿ ಬೀಳುವಂತಾಗಿದೆ. ನವೆಂಬರ್ 4 ರಿಂದಲೇ ಜಾರಿಗೆ ಬರುವಂತೆ ಈ ಹೊಸ ಪರಿಷ್ಕೃತ ದರಗಳನ್ನು ಅಧಿಕೃತವಾಗಿ ಘೋಷಿಸಲಾಗಿದೆ. ಪ್ರಮುಖವಾಗಿ ನಂದಿನಿ ತುಪ್ಪದ ಬೆಲೆ ಲೀಟರ್‌ಗೆ 135 ರೂಪಾಯಿ ಹೆಚ್ಚಳವಾಗಿದೆ. ಆ ಕುರಿತ ವರದಿ ಇಲ್ಲಿದೆ:
ನಂದಿನಿ ತುಪ್ಪ:
ತುಪ್ಪದ ಬೆಲೆಯಲ್ಲಿ ಪ್ರತಿ ಲೀಟರ್‌ಗೆ ₹100 ರಿಂದ ₹135 ರವರೆಗೆ ಭಾರಿ ಹೆಚ್ಚಳವಾಗಿದೆ.
1 ಲೀಟರ್ ಸ್ಯಾಚೆಟ್: ಹಳೆಯ ಬೆಲೆ ₹715 ಇದ್ದದ್ದು, ಈಗ ₹850 ಕ್ಕೆ ಏರಿಕೆಯಾಗಿದೆ (₹135 ಹೆಚ್ಚಳ).
1 ಲೀಟರ್ ಪೆಟ್ ಜಾರ್: ಹಳೆಯ ಬೆಲೆ ₹735 ಇದ್ದದ್ದು, ಈಗ ₹870 ಕ್ಕೆ ಏರಿಕೆಯಾಗಿದೆ (₹135 ಹೆಚ್ಚಳ).
15 ಕೆಜಿ ಟಿನ್: ಹಳೆಯ ಬೆಲೆ ₹11,625 ಇದ್ದದ್ದು, ಈಗ ಬರೋಬ್ಬರಿ ₹14,100 ತಲುಪಿದೆ.
200 ಮಿ.ಲೀ ಸ್ಯಾಚೆಟ್: ಹೊಸ ಬೆಲೆ ₹95.
ನಂದಿನಿ ಬೆಣ್ಣೆ:
ಬೆಣ್ಣೆಯ ಬೆಲೆಯಲ್ಲಿ ಪ್ರತಿ ಕೆಜಿಗೆ ಸುಮಾರು ₹80 ರಷ್ಟು ಏರಿಕೆಯಾಗಿದೆ.
500 ಗ್ರಾಂ ಉಪ್ಪಿಲ್ಲದ ಬೆಣ್ಣೆ: ಹಳೆಯ ಬೆಲೆ ₹285 ಇದ್ದದ್ದು, ಈಗ ₹390 ಕ್ಕೆ ಏರಿಕೆಯಾಗಿದೆ.
500 ಗ್ರಾಂ ಉಪ್ಪು ಸಹಿತ ಬೆಣ್ಣೆ: ಹೊಸ ಬೆಲೆ ₹380.
100 ಗ್ರಾಂ ಉಪ್ಪು ಸಹಿತ ಬೆಣ್ಣೆ: ಹೊಸ ಬೆಲೆ ₹90.
200 ಗ್ರಾಂ ಉಪ್ಪಿಲ್ಲದ ಬೆಣ್ಣೆ: ಹೊಸ ಬೆಲೆ ₹160.
ನಂದಿನಿ ಪನೀರ್:
ಪನೀರ್ ಬೆಲೆಯಲ್ಲಿ ಪ್ರತಿ ಕೆಜಿಗೆ ₹77 ರಷ್ಟು ಹೆಚ್ಚಳವಾಗಿದೆ.
1 ಕೆಜಿ ಪ್ಯಾಕ್: ಹಳೆಯ ಬೆಲೆ ₹408 ಇದ್ದದ್ದು, ಈಗ ₹485 ಕ್ಕೆ ಏರಿಕೆಯಾಗಿದೆ.
500 ಗ್ರಾಂ ಪ್ಯಾಕ್: ಹೊಸ ಬೆಲೆ ₹260.
200 ಗ್ರಾಂ ಪ್ಯಾಕ್: ಹಳೆಯ ಬೆಲೆ ₹96 ಇದ್ದದ್ದು, ಈಗ ₹115 ಕ್ಕೆ ಏರಿಕೆಯಾಗಿದೆ.
200 ಗ್ರಾಂ ಮೀಡಿಯಂ ಫ್ಯಾಟ್ ಪನೀರ್: ಹೊಸ ಬೆಲೆ ₹110.
ಇದರೊಂದಿಗೆ ತೃಪ್ತಿ ಹಾಲಿನ ದರದಲ್ಲೂ ಬದಲಾವಣೆಯಾಗಿದ್ದು, 135 ಎಂಎಲ್‌ಗೆ ₹11 ಹಾಗೂ 450 ಎಂಎಲ್‌ಗೆ ₹33 ನಿಗದಿಪಡಿಸಲಾಗಿದೆ. ಒಟ್ಟಾರಿಯಾಗಿ, ಹಬ್ಬಗಳ ಸರಣಿಯ ಬೆನ್ನಲ್ಲೇ ಗ್ರಾಹಕರಿಗೆ ಕೆಎಂಎಫ್ ಸರಣಿ ಶಾಕ್ ನೀಡಿದಂತಾಗಿದೆ.