ನೀವು ತೋರಿಸಿದ್ದು ಹಣ್ಣೆನಿಸಲಿಕ್ಕೆ
ನಾನು ಈ ಮೊದಲು ಹಣ್ಣು ನೋಡಿರಬೇಕು
ಮತ್ತು ನೋಡಿದ್ದು ನೆನಪಿರಬೇಕು
ಅದು ಕಿತ್ತಳೆಯಲ್ಲ ಸೇಬೇ ಅನಿಸಲಿಕ್ಕೆ
ನನಗೆ ಎರಡೂ ಗೊತ್ತಿರಬೇಕು
ಹಾಗೆ ನೆನಪಿರಬೇಕು

ಒಂದು ನೋಡುವಾಗ ನೆನಪಾಗಲೂ
ಬಹುದು ಇನ್ನೊಂದು
ನನ್ನನ್ನು ನೋಡಿದಾಗ ನನ್ನ ಅಪ್ಪ
ಅಥವಾ ಹಳೆಯ ಕನ್ನಡ ಸಿನೆಮಾಗಳಲ್ಲಿನ
ವಜ್ರಮುನಿ
ತಪ್ಪನ್ನಲಾಗುವುದಿಲ್ಲ
ನಿಮ್ಮ ನೋಟದ ತಪ್ಪೂ ಅದಲ್ಲ
ನಿಮ್ಮ ನೆನಪಿನದೂ ಅಲ್ಲ

ಹೇಳುತ್ತಾರೆ
ವಿಶ್ಲೇಷಣೆಗೆ ಒಗ್ಗದ ಹತ್ತು ಹಲವು ಸೂಕ್ಷ್ಮ
ಗಳಿವೆ ನಮ್ಮ ಮನಸ್ಸೊಳಗೆ
ಫ್ರಾಯ್ಡಂತಹ ಫ್ರಾಯ್ಡಿಗೂ ನಿಲುಕದ ಅವಿವರಗಳೂ ಇದ್ದಾವು

ಇವೊತ್ತು ಬೆಳಗ್ಗೆ ಟಾಯ್ಲೆಟಿನಲ್ಲಿ
ಪೇಪರುರೋಲಿನ ಸುರುಳಿ ಸೆಳೆದಾಗ
ಏನೋ ಕರ್ಮವೋ ಕಾಣೆ
ಬಳಿಕ ಎಳೆಯದೆಯೂ
ಎಳೆದೆಳೆದು ತಂತಾನೆ ಹೊಮ್ಮಿತು
ಹರಿದೂ ಹರಿಯದೆಯೆ ಹರಿಯತೊಡಗಿತು

ಅದೇ ಕಾಣದ ಕರ್ಮದ ಮೇರೆಗೆ
ಹಿಂದಾನೊಮ್ಮೆ ಆ ಪರಮಾತ್ಮ ದಯಪಾಲಿಸಿದ
ದ್ರೌಪದಿಯ ಸೀರೆ ನೆನಪಾಯಿತು

ತಲೆ ಕೆಡಿಸಿಕೊಳ್ಳುವುದೇನಿಲ್ಲ
ಜಾಸ್ತಿ ಓದಿಕೊಂಡವರು
ಈ ಕುರಿತೊಂದು ತೌಲನಿಕ ಅಧ್ಯಯನ
ಗೈದುಕೊಳ್ಳಲಿ ಬಿಡಿ

=  ನಾಗರಾಜ ವಸ್ತಾರೆ
vastarey@vastareysmdc.co.in