ಕೆ. ಶ್ರೀನಿವಾಸರಾವ್, ಹರಪನಹಳ್ಳಿ
ಮಠಾಧೀಶರ ಮುಂದೆ ಅಷ್ಟೊಂದು ಶ್ರೀಗಳೇಕೆ?
- ಅವರೆಲ್ಲ 'ಅತಿಶ್ರೀ'ಗಳು, ಅದಕ್ಕೆ ಇತಿಶ್ರೀ ಹಾಕೋದು ಕಷ್ಟ!
ಎಂ.ಬಿ. ಕೃಷ್ಣಮೂರ್ತಿ, ಚಾಮರಾಜನಗರ
ಹುಡುಗರ ನಡೆಗೂ ಹುಡುಗಿಯರ ನಡೆಗೂ ವ್ಯತ್ಯಾಸವೇನು?
-ಹುಡುಗರದ್ದು ವಾಕಿಂಗ್, ಹುಡುಗಿಯರದ್ದು ಕ್ಯಾಟ್ ವಾಕಿಂಗ್!
ಎಂ.ಎಸ್. ಮಂಜುನಾಥ್ ಅಣಜಿ, ಮಾಧನಬಾವಿ
ರಾಜಕಾರಣಿಗಳು ಮಾತ್ರ ತಮ್ಮ ಮಕ್ಕಳನ್ನು ತಮ್ಮ ವೃತ್ತಿಗೆ ಬರಬೇಡ ಎಂದು ಹೇಳೋಲ್ವಲ್ಲ ಯಾಕೆ?
-ತಮ್ಮ 'ಕಸುಬು' ತಮ್ಮ ಮಕ್ಕಳಿಗೇ ಗೊತ್ತಿರಲೀ ಅಂತ!
ಬಿ.ಎಸ್. ನಾರಾಯಣಸ್ವಾಮಿ, ಬೋದನಹೊಸಹಳ್ಳಿ
ಮನಸ್ಸಿದ್ದರೆ ಮಾರ್ಗ, ಕನಸಿದ್ದರೆ?
-ಹಲವರದ್ದು ವಾಮಮಾರ್ಗ! ಕೆಲವರದ್ದು ಸನ್ಮಾರ್ಗ!
ಸ್ವಾಮಿ ನಿರ್ಮಲಾ, ಉಡಿಗಾಲ
ವ್ಯಂಗ್ಯ ಚಿತ್ರಕಾರರು ಮಂತ್ರಿಗಳನ್ನು ವಕ್ರವಾಗಿ ಚಿತ್ರಿಸುತ್ತಾರೇಕೆ?
-ಅವರು ಅವರ ಮುಖ ನೋಡೋಲ್ಲ, 'ಕೆಲಸ' ನೋಡಿ ಚಿತ್ರಿಸ್ತಾರೆ!
ವಿ. ಹೇಮಂತಕುಮಾರ್, ಬೆಂಗಳೂರು
ಕದಿಯುವುದಕ್ಕೂ ದೋಚುವುದಕ್ಕೂ ವ್ಯತ್ಯಾಸವೇನು?
-ಕದಿಯುವುದು ಸಣ್ಣತನ, ದೋಚುವುದೇ 'ದೊಡ್ಡತನ'!
ಜೆ.ಆರ್. ಆದಿನಾರಾಯಣಮುನಿ, ಶ್ರೀಕೋಡಿಹಳ್ಳಿ ಮಠ
ಸಾವು ನಗುವುದು ಯಾವಾಗ?
- ಎಲ್ಲರೂ ಅಳುತ್ತಿರುವಾಗ!

ಮೊಳಕಾಲ್ಮೂರು ಸುರೇಶ್, ಬೆಳಗಾಂ
ಆಕಳ ಹಾಲನ್ನು ಬೆಚ್ಚಗೆ ಮಾಡಿ ಕುಡಿಯಬೇಕಂತೆ, ಆದರೆ ಆಲ್ಕೋಹಾಲನ್ನು?
- ಅದು ಕುಡಿದರೆ ನೀವೇ ಬೆಚ್ಚಗಾಗ್ತೀರಿ.
ಚೇತನ್, ಕಡೂರು
ಸಚಿವ ಎಚ್. ಆಂಜನೇಯ ಯಾಕೆ ಆತುರಗೆಟ್ಟ ಆಂಜನೇಯನಂತೆ ಆಡುತ್ತಿದ್ದಾರೆ?
- ಅವರಿಗೆ ಆಡಳಿತ 'ನಡೆಸುವುದಕ್ಕಿಂತ' 'ಹಾರಿಸು'ವುದರಲ್ಲೇ ನಂಬಿಕೆ!


ಚಿಲ್ಲಿ ಕ್ವೆಶ್ಚನ್
ರಾಹುಲ್‌ಗಾಂಧಿ ಬಳ್ಳಾರಿಯಲ್ಲಿ ಎಲೆಕ್ಷನ್ನಿಗೆ ನಿಲ್ತಾರಂತೆ, ಹೌದಾ?
ಈ ಪ್ರಶ್ನೆಗೆ ಪರಿಣಾಮಕಾರಿ ತಮಾಷೆ ಉತ್ತರವನ್ನು ನೀವೇ ಕಳುಹಿಸಿ: ಆಯ್ದ ಉತ್ತರಗಳು ಮುಂದಿನ ಸಂಚಿಕೆಯಲ್ಲಿ...   khushimag@gmail.com


ಕಳೆದವಾರದ ಉತ್ತರಗಳು
ಟೆಸ್ಟ್ ಹಾಗೂ ಏಕದಿನ ಪಂದ್ಯಗಳ ಕ್ರಿಕೆಟ್‌ನಲ್ಲೇಕೆ ಚಿಯರ್ ಗರ್ಲ್ಸ್ ಇರುವುದಿಲ್ಲ?

ಉ: ಟಿ20ಯ ಹಾವಳಿಯಲ್ಲಿ ಪ್ರೇಕ್ಷಕರು ಬಂದ್ರೇನೇ ಪುಣ್ಯ, ಇನ್ನು ಚಿಯರ್ ಗರ್ಲ್ಸಾ?
- ಎಲ್.ವಿ. ಕುಮಾರಸ್ವಾಮಿ
ಉ: ಆ ದೀರ್ಘ ಪಂದ್ಯಗಳಲ್ಲಿ ಕುಣಿಯುವಷ್ಟು ತಾಕತ್ತು ಈಗಿನ ಹೆಣ್ಣುಮಕ್ಕಳಿಗಿಲ್ಲ!
- ಶಂಕರನಾರಾಯಣ ಭಟ್