ನಿದ್ದೆ ಪ್ರತಿಯೊಬ್ಬರ ಜೀವನದಲ್ಲೂ ಮುಖ್ಯವಾದ ಸಂಗತಿ. ದಿನಕ್ಕೆ 8 ತಾಸು ನಿದ್ದೆ ಮಾಡಬೇಕೆಂದು ವೈದ್ಯರು ಹೇಳುತ್ತಾರೆ. ರಾತ್ರಿ ಸರಿಯಾಗಿ ನಿದ್ದೆ ಮಾಡಿಲ್ಲವೆಂದರೆ ಮಾರನೆ ದಿನ ಆರಂಭದಿಂದ ಅಂತ್ಯದವರೆಗೂ ಕಿರಿಕಿರಿಯಾಗುತ್ತದೆ. ಇತ್ತೀಚಿನ ದಿನಗಳಲ್ಲಿ ನಿದ್ರೆ ಸರಿಯಾಗಿ ಬರುವುದಿಲ್ಲ ಎಂದು ದೂರುವ ಮಂದಿ ಹೆಚ್ಚು. ನಿದ್ದೆಯ ಸಮಸ್ಯೆಯ ಪರಿಹಾರಕ್ಕೆ ಕೆಲವು ಸರಳ ಮಾರ್ಗಗಳಿವೆ.
-       ಕಾಫಿಯಲ್ಲಿನ ಕೆಫೀನ್ ಎಂಬ ಅಂಶ ಸುಮಾರು 8 ಗಂಟೆಯವರೆಗೆ ನಮ್ಮನ್ನು ಎಚ್ಚರದಿಂದ ಇರುವಂತೆ ಮಾಡುತ್ತದೆ. ಇದರಿಂದ ಸುಖಕರ ನಿದ್ದೆಗೆ ಭಂಗ ಬರುವುದು ಖಂಡಿತ. ಆದ್ದರಿಂದ ರಾತ್ರಿ ಮಲಗಲು 6 ಗಂಟೆಗೂ ಮುಂಚೆ ಕಾಫಿ ಕುಡಿಯುವುದು ಬೇಡ.
-      ಬಹಳ ಜನ ಮದ್ಯ ಸೇವಿಸಿದರೆ ನಿದ್ದೆ ಬರುತ್ತದೆ ಎಂಬ ಭ್ರಮೆಯಲ್ಲಿರುತ್ತಾರೆ. ಮೊದಮೊದಲು ಕುಡಿದರೆ ನಿದ್ದೆ ಬರುತ್ತದಾದರು ರಾತ್ರಿಪೂರ ಸುಖ ನಿದ್ದೆಯಾಗುವುದಿಲ್ಲ ಎಂಬುದು ಸಂಶೋಧನೆಯಲ್ಲಿ ತಿಳಿದು ಬಂದಿದೆ.
-      ಕೆಲವು ಮಂದಿಗೆ ಮಲಗುವ ಮುನ್ನ ದಿನದಲ್ಲಿ ನಡೆದ ಘಟನೆ ನೆನಪಿಸಿ ಮುಂದಿನ ದಿನದ ದಿನಚರಿಯನ್ನು ಯೋಜಿಸುವ ಹವ್ಯಾಸವಿರುತ್ತದೆ. ಮಲಗುವ ಕೆಲವು ಗಂಟೆಗಳ ಮುಂಚೆ ಅದನ್ನು ಮಾಡಿ ಮುಗಿಸಿ ಮನಸ್ಸನ್ನು ನಿರಾಳ ಮಾಡಿಕೊಂಡು ಹೋಗಿ.
-    ಮಲಗುವ ಮೊದಲು ಮನಸ್ಸಿಗೆ ಮುದ ನೀಡುವ ಪುಸ್ತಕ ಓದುವುದು, ಧ್ಯಾನ, ಇಲ್ಲವೇ ಬಿಸಿ ನೀರಿನಲ್ಲಿ ಸ್ನಾನ ಮಾಡಿ.
-       ನಿಯಮಿತ ವ್ಯಾಯಾಮ ನಿದ್ದೆಯಲ್ಲಿ ಪ್ರಮುಖ ಪಾತ್ರ ನಿರ್ವಹಿಸುತ್ತದೆ. ಕೆಲವು ಜನ ವ್ಯಾಯಾಮದ ನಂತರ ಕ್ರಿಯಾಶೀಲರಾಗುತ್ತಾರೆ. ಅಂತಹವರು ಮುಂಜಾನೆ ಸಮಯದಲ್ಲಿ ಮಾಡಿದರೆ ಒಳಿತು.
-     ಮಲಗುವ ಕೋಣೆಯನ್ನು ಸ್ವಲ್ಪ ಕತ್ತಲೆಯಾಗಿ ಇರುವಂತೆ ನೋಡಿಕೊಳ್ಳಿ.
-     ಹಿತವಾದ ಊಟ ಸರಿಯಾದ ನಿದ್ದೆ ಎಂಬಂತೆ ರಾತ್ರಿ ಖಾಲಿ ಹೊಟ್ಟೆಯಲ್ಲಿ ಮಲಗುವುದು ಬೇಡ. ಹಿತಮಿತವಾಗಿ ತಿಂದು ಮಲಗಿದರೆ ಒಳ್ಳೆಯ ನಿದ್ದೆ ಸಾಧ್ಯ.
-    ಮಲಗುವ ಮುನ್ನ ಅಥವಾ ನಿದ್ದೆಯಲ್ಲಿ ಎಚ್ಚರವಾದಾಗ ಧೂಮಪಾನ ಮಾಡುವುದು ಒಳ್ಳೆಯ ಹವ್ಯಾಸವಲ್ಲ.
-      ಸಾಕು ಪ್ರಾಣಿಗಳಿದ್ದರೆ ಅವುಗಳನ್ನು ಮಲಗುವ ಸಮಯದಲ್ಲಿ ಕೋಣೆಗೆ ಬಾರದಂತೆ ನೋಡಿಕೊಳ್ಳಿ.
-     ಟಿವಿ ನೋಡುವುದು, ಆಹಾರ ಸೇವಿಸುವುದಾಗಲಿ ಮಲಗುವ ಕೋಣೆಯಲ್ಲಿ ಬೇಡ. ಬೆಡ್ ಮೇಲೆ ಯಾವುದೇ ರೀತಿಯ ಮಾನಸಿಕವಾಗಿ ಘಾಸಿಗೊಳ್ಳುವ ವಿಚಾರ ಬೇಡ.

-    ರಂಜಿತ್ ಎಚ್.ಎ.