ಎಲಿಜಬೆತ್ ರಾಣಿಯ ಆಳ್ವಿಕೆಯಲ್ಲಿದ್ದ ಡಾ. ಥಾಮಸ್ ಕೂಪರ್ ಸಹ ಪದಕೋಶ(ಡಿಕ್ಷನರಿ)ಕ್ಕಾಗಿ ಅವಿರತವಾಗಿ ದುಡಿದವನೇ. ವಿಶಿಷ್ಟವಾದ ಪದಕೋಶವನ್ನು ಸಂಪಾದಿಸುವುದರ ಜೊತೆಗೆ, 33000 ಪದಗಳನ್ನು ಸೇರ್ಪಡೆ ಮಾಡಿದ್ದರು. ಎಲ್ಲಿಲ್ಲಿಂದಲೋ ತರಿಸಿಕೊಂಡ ಟಿಪ್ಪಣಿಗಳನ್ನು ತಮಗೆ ಬೇಕಾದಂತೆ ಜೋಡಿಸಿಟ್ಟುಕೊಳ್ಳಲು ಸುಮಾರು ಎಂಟು ವರ್ಷಗಳನ್ನೇ ಕಳೆದಿದ್ದರು! ಇದನ್ನೆಲ್ಲಾ ಸಹಿಸಿಕೊಂಡಿದ್ದ ಅವರ ಹೆಂಡತಿಗೆ ಒಂದು ದಿನ ತಡೆದುಕೊಳ್ಳಲಾರದಷ್ಟು ಸಿಟ್ಟುಬಂತು. ನೇರವಾಗಿ ಗಂಡನ ಕೋಣೆಗೆ ಹೋದಳು. ಅಷ್ಟೇನೂ ವಿದ್ಯಾವಂತಳಾಗಿರದ ಆಕೆಯ ಕಣ್ಣಿಗೆ ಕಾಣಿಸಿದ್ದು ಹಳೆಯ ಕಾಗದಗಳ ಕಟ್ಟುಗಳು. 'ಈ ಹಳೆಯ ಕಾಗದಗಳನ್ನು ನೋಡಿ ನೋಡಿ ನನ್ನ ಗಂಡನ ಕಣ್ಣುಗಳು ಇಂಗಿಹೋಗುತ್ತವೆ, ಹಾಗೆಯೇ ಅವರು ಸತ್ತು ಹೋಗುತ್ತಾರೆ' ಅನ್ನಿಸಿತು. ಇವು ಇಲ್ಲಿದ್ದರೆ ತಾನೇ ಇವರು ಕೆಲಸ ಮಾಡುವುದು ಅಂದುಕೊಂಡು ಎಲ್ಲವನ್ನೂ ಸುಟ್ಟುಹಾಕಿದಳು.  ಕಾಗದದ ಬೂದಿ ಗಾಳಿಗೆ ಹಾರಿಹೋದ ಮೇಲೆ ಡಾ.ಕೂಪರ್ ತಮ್ಮ ಲೈಬ್ರೆರಿಗೆ ಬಂದರು. ದಾಖಲೆಗಳಿದ್ದ ಕಪಾಟುಗಳು ಕಪ್ಪು ಬಣ್ಣಕ್ಕೆ ತಿರುಗಿ ಖಾಲಿಯಾಗಿದ್ದವು. ಶೂನ್ಯ ದೃಷ್ಟಿ ಬೀರುತ್ತಾ ಕೇಳಿದಳು, 'ಯಾರು ಇದಕ್ಕೆ ಬೆಂಕಿ ತಗುಲಿಸಿದ್ದು?!'
'ನಾನೇ, ಇವು ಇದ್ದರೆ ನಿಮ್ಮ ತಲೆ ಕೆಡತ್ತೆ, ಹುಚ್ಚು ಹಿಡಿಯತ್ತೆ ಅಥವಾ ಪ್ರಾಣವೇ ಹೋದರೂ ಆಶ್ಚರ್ಯವಿಲ್ಲ!' ಅಂತ ಗುಡುಗಿದಳು ಹೆಂಡತಿ. ಡಾ. ಕೂಪರ್‌ಗೆ ಒಂದು ಕ್ಷಣ ಸೊಕ್ರೆಟೀಸ್‌ರ ಹೆಂಡತಿ ಕ್ಸಾಂತಿಪ್ಪೆಯ ನೆನಪಾಯಿತು.  ಸಹನಾ ಮೂರ್ತಿಯಾಗಿದ್ದ ಕೂಪರ್ 'ಡೀನಾ, ಎಂಥಾ ಕೆಲಸ ಮಾಡಿಬಿಟ್ಟೆ! ನನ್ನ ಎಂಟು ವರ್ಷದ ಶ್ರಮವನ್ನು ಸುಟ್ಟು ಬೂದಿ ಮಾಡಲು ನೀನು ಎಂಟು ನಿಮಿಷ ಕೂಡ ತೆಗೆದುಕೊಳ್ಳಲಿಲ್ಲವಲ್ಲಾ' ಅಂದರೇ ಹೊರತು ಸಾಮಾನ್ಯರಂತೆ ರೇಗಾಡಲಿಲ್ಲ, ಕೂಗಾಡಲಿಲ್ಲ.
ಸುಟ್ಟುಹೋದ ಕಾಗದಗಳನ್ನೆಲ್ಲಾ ಮತ್ತೆ ಹುಡುಕಿ, ತರಿಸಿ, ಜೋಡಿಸಿದರು. ಇಂತಹ ಭಾಷಾಭಿಮಾನಿಗಳು ಸಿಗಲು ಸಾಧ್ಯವೇ?