ದಿನವಿಡೀ ಕೆಲಸ ಮಾಡಿ ದಣಿದ ಬಳಿಕ ಒಂದಷ್ಟು ಹೊತ್ತು ಹಾಸಿಗೆಯಲ್ಲಿ ವಿಶ್ರಾಂತಿ ಪಡೆಯುವುದು ಸಹಜ. ದೇಹಕ್ಕೆ ವಿಶ್ರಾಂತಿ ನೀಡುವುದು ಆರೋಗ್ಯಕ್ಕೆ ಅಗತ್ಯವೂ ಹೌದು. ಆದರೆ, ಯಾವುದೇ ಕೆಲಸವಿಲ್ಲದೆ ಗಂಟೆಗಟ್ಟಲೆ ಹಾಸಿಗೆಯಲ್ಲೇ ಮಲಗಿರುವುದು ಅಭ್ಯಾಸವಾಗಿದ್ದರೆ ಅದರ ಹಿಂದಿನ ಕಾರಣವೇನು ಎಂಬುದನ್ನು ತಿಳಿದುಕೊಳ್ಳುವುದು ಮುಖ್ಯ.
ಕೆಲವೊಮ್ಮೆ ಸರಿಯಾಗಿ ನಿದ್ರೆ ಬಾರದಿರುವುದು, ನಿರಂತರ ಆಯಾಸ, ಮಾನಸಿಕ ಒತ್ತಡ ಅಥವಾ ದೈಹಿಕ ಚಟುವಟಿಕೆ ಕಡಿಮೆಯಾಗಿರುವುದು ಇದಕ್ಕೆ ಕಾರಣವಾಗಿರಬಹುದು. ಇನ್ನು ಕೆಲವು ಸಂದರ್ಭಗಳಲ್ಲಿ ಇದು ದೇಹದಲ್ಲಿನ ಯಾವುದೋ ಆರೋಗ್ಯ ಸಮಸ್ಯೆಯ ಸಂಕೇತವೂ ಆಗಿರಬಹುದು.
ದೈಹಿಕ ಚಟುವಟಿಕೆ ಕಡಿಮೆಯಾಗುವುದು
ದಿನದ ಬಹುಪಾಲು ಸಮಯ ಹಾಸಿಗೆಯಲ್ಲೇ ಕಳೆಯುವುದರಿಂದ ದೇಹದ ಚಲನವಲನ ಕಡಿಮೆಯಾಗುತ್ತದೆ. ಹೀಗೆ ದೀರ್ಘಕಾಲ ದೈಹಿಕ ಚಟುವಟಿಕೆ ಇಲ್ಲದಿದ್ದರೆ ಹೃದಯದ ಕಾರ್ಯಕ್ಷಮತೆ ಮತ್ತು ಸ್ನಾಯುಗಳ ಬಲ ಕುಂದುವ ಸಾಧ್ಯತೆಯಿದೆ. ರಕ್ತದೊತ್ತಡ, ರಕ್ತ ಪರಿಚಲನೆ ಮತ್ತು ದೇಹದ ಚಯಾಪಚಯ ಕ್ರಿಯೆ ಉತ್ತಮವಾಗಿರಲು ನಿಯಮಿತ ದೈಹಿಕ ಚಟುವಟಿಕೆ ಅಗತ್ಯ. ಪ್ರತಿದಿನ ಸ್ವಲ್ಪ ಹೊತ್ತು ನಡೆಯುವುದು, ಲಘು ವ್ಯಾಯಾಮ ಅಥವಾ ಸರಳವಾದ ದೇಹದಾರ್ಢ್ಯ ಚಟುವಟಿಕೆಗಳಲ್ಲಿ ತೊಡಗಿಸಿಕೊಳ್ಳುವುದು ಉತ್ತಮ.
ನಿದ್ರೆಯ ಗುಣಮಟ್ಟ ಸರಿಯಾಗಿಲ್ಲದಿರುವುದು
ರಾತ್ರಿ ಸಾಕಷ್ಟು ಹೊತ್ತು ಮಲಗಿದರೂ ಬೆಳಗ್ಗೆ ಎದ್ದಾಗ ಆಯಾಸವಾಗುತ್ತಿದೆಯೇ? ಇದಕ್ಕೆ ನಿದ್ರೆಯ ಗುಣಮಟ್ಟ ಕಳಪೆಯಾಗಿರುವುದು ಕಾರಣವಾಗಿರಬಹುದು. ನಿದ್ರೆಯಲ್ಲಿ ಉಸಿರಾಟಕ್ಕೆ ಪದೇಪದೆ ಅಡಚಣೆಯಾಗುವ ಸ್ಲೀಪ್ ಅಪ್ನಿಯಾ ಸಮಸ್ಯೆಯೂ ಇದಕ್ಕೆ ಕಾರಣವಾಗಬಹುದು. ಜೋರಾಗಿ ಗೊರಕೆ ಹೊಡೆಯುವುದು, ನಿದ್ರೆಯ ವೇಳೆ ಉಸಿರಾಟ ನಿಲ್ಲಿಸಿ ಮತ್ತೆ ಆರಂಭವಾಗುವುದು ಹಾಗೂ ಬೆಳಗ್ಗೆ ಎದ್ದಾಗ ತಲೆನೋವು ಕಾಣಿಸಿಕೊಳ್ಳುವುದು ಈ ಸಮಸ್ಯೆಯ ಲಕ್ಷಣಗಳಾಗಿರಬಹುದು. ಇಂತಹ ಲಕ್ಷಣಗಳು ಕಂಡುಬಂದರೆ ವೈದ್ಯರನ್ನು ಸಂಪರ್ಕಿಸುವುದು ಸೂಕ್ತ.
ದಿನನಿತ್ಯದ ಕೆಲಸಗಳನ್ನೂ ಮಾಡಲು ಕಷ್ಟಕರ ಎನಿಸುವುದು
ಸ್ವಲ್ಪ ದೂರ ನಡೆದರೂ ಉಸಿರು ಬಿಗಿಯಾಗುವುದು, ಮೆಟ್ಟಿಲು ಹತ್ತುವಾಗ ಸುಸ್ತಾಗುವುದು ಅಥವಾ ಮನೆಯ ಸಾಮಾನ್ಯ ಕೆಲಸಗಳನ್ನು ಮಾಡುವಾಗಲೇ ದೇಹದಲ್ಲಿ ಶಕ್ತಿ ಇಲ್ಲದಂತಾಗುವುದು ಎಚ್ಚರಿಕೆಯ ಲಕ್ಷಣವಾಗಿರಬಹುದು. ಹಿಂದೆ ಸುಲಭವಾಗಿ ಮಾಡುತ್ತಿದ್ದ ಕೆಲಸಗಳನ್ನು ಈಗ ಮಾಡಲು ಸಾಧ್ಯವಾಗುತ್ತಿಲ್ಲ ಎಂದಾದರೆ ಅದನ್ನು ಕೇವಲ ದೈಹಿಕ ಸಾಮರ್ಥ್ಯ ಕಡಿಮೆಯಾಗಿದೆ ಎಂದು ನಿರ್ಲಕ್ಷಿಸಬಾರದು. ಇಂತಹ ಬದಲಾವಣೆಗಳು ಪದೇಪದೆ ಕಾಣಿಸಿಕೊಂಡರೆ ಅಥವಾ ತೀವ್ರವಾಗುತ್ತಿದ್ದರೆ ವೈದ್ಯಕೀಯ ತಪಾಸಣೆ ಮಾಡಿಸಿಕೊಳ್ಳಬೇಕು.
ನಿರಂತರ ಮಾನಸಿಕ ಒತ್ತಡ
ದೀರ್ಘಕಾಲದ ಮಾನಸಿಕ ಒತ್ತಡವು ನಿದ್ರೆ, ರಕ್ತದೊತ್ತಡ, ಆಹಾರ ಸೇವನೆಯ ಅಭ್ಯಾಸ ಮತ್ತು ಒಟ್ಟಾರೆ ಆರೋಗ್ಯದ ಮೇಲೆ ಪರಿಣಾಮ ಬೀರಬಹುದು. ಕೆಲವರು ಒತ್ತಡವನ್ನು ಎದುರಿಸುವ ಬದಲು ಹೆಚ್ಚು ಹೊತ್ತು ವಿಶ್ರಾಂತಿ ಪಡೆಯಲು ಅಥವಾ ಹಾಸಿಗೆಯಲ್ಲೇ ಉಳಿಯಲು ಬಯಸುತ್ತಾರೆ. ಆದರೆ, ಇದು ಸಮಸ್ಯೆಗೆ ಪರಿಹಾರವಲ್ಲ. ನಿಯಮಿತ ದೈಹಿಕ ಚಟುವಟಿಕೆ, ಸಾಕಷ್ಟು ನಿದ್ರೆ, ಮನಸ್ಸಿಗೆ ನೆಮ್ಮದಿ ನೀಡುವ ಹವ್ಯಾಸಗಳು ಹಾಗೂ ಸ್ನೇಹಿತರೊಂದಿಗೆ ಸಮಯ ಕಳೆಯುವುದು ಒತ್ತಡವನ್ನು ನಿರ್ವಹಿಸಲು ನೆರವಾಗಬಹುದು.
ತೂಕ ಹೆಚ್ಚಳ ಮತ್ತು ದೈಹಿಕ ಚಟುವಟಿಕೆಯ ಕೊರತೆ
ದೈಹಿಕ ಚಟುವಟಿಕೆ ಕಡಿಮೆಯಾದಾಗ ದೇಹದ ತೂಕ ಹೆಚ್ಚಾಗುವ ಸಾಧ್ಯತೆಯಿದೆ. ಹೆಚ್ಚಿದ ತೂಕವು ಅಧಿಕ ರಕ್ತದೊತ್ತಡ, ಮಧುಮೇಹ ಮತ್ತು ಕೆಟ್ಟ ಕೊಲೆಸ್ಟ್ರಾಲ್‌ನಂತಹ ಹೃದಯ ಸಂಬಂಧಿ ಅಪಾಯಗಳಿಗೆ ಕಾರಣವಾಗಬಹುದು. ಕಡಿಮೆ ಚಟುವಟಿಕೆಯಿಂದ ತೂಕ ಹೆಚ್ಚಾಗಿ, ತೂಕ ಹೆಚ್ಚಾದಂತೆ ಚಲನವಲನ ಮತ್ತಷ್ಟು ಕಷ್ಟವಾಗುವ ಚಕ್ರ ಆರಂಭವಾಗಬಹುದು. ಇದನ್ನು ತಪ್ಪಿಸಲು ಪ್ರತಿದಿನ ನಡೆಯುವುದು, ದೇಹಕ್ಕೆ ಒಗ್ಗುವ ವ್ಯಾಯಾಮ ಮಾಡುವುದು ಮತ್ತು ಆರೋಗ್ಯಕರ ಆಹಾರ ಸೇವಿಸುವುದು ಮುಖ್ಯ.
ದೇಹದ ಆರಂಭಿಕ ಎಚ್ಚರಿಕೆ ಲಕ್ಷಣಗಳ ನಿರ್ಲಕ್ಷಿಸುವುದು
ಕೆಲವರು ದೈಹಿಕ ಚಟುವಟಿಕೆ ಮಾಡಿದಾಗ ಕಾಣಿಸಿಕೊಳ್ಳುವ ಅಸ್ವಸ್ಥತೆಯನ್ನು ತಪ್ಪಿಸಿಕೊಳ್ಳಲು ಹಾಸಿಗೆಯಲ್ಲೇ ಉಳಿಯುತ್ತಾರೆ. ಆದರೆ, ಸ್ವಲ್ಪ ಕೆಲಸ ಮಾಡಿದರೂ ಉಸಿರಾಟದ ತೊಂದರೆ, ಎದೆಯಲ್ಲಿ ಒತ್ತಡ ಅಥವಾ ನೋವು, ತಲೆಸುತ್ತು, ಹೃದಯ ಬಡಿತ ವೇಗವಾಗುವುದು ಹಾಗೂ ಅತಿಯಾದ ಬೆವರುವಿಕೆ ಕಾಣಿಸಿಕೊಂಡರೆ ಅದನ್ನು ನಿರ್ಲಕ್ಷಿಸಬಾರದು. ವಿಶೇಷವಾಗಿ ಹೃದಯ ಸಂಬಂಧಿ ಅಪಾಯಗಳಿರುವವರು ಇಂತಹ ಲಕ್ಷಣಗಳನ್ನು ಗಂಭೀರವಾಗಿ ಪರಿಗಣಿಸಬೇಕು.
ದೈಹಿಕ ಚಟುವಟಿಕೆ ಮಾಡಲು ಭಯಪಡುವುದು
ಈ ಹಿಂದೆ ಆರೋಗ್ಯ ಸಮಸ್ಯೆ ಎದುರಿಸಿದ ಕೆಲವರಿಗೆ ಮತ್ತೆ ವ್ಯಾಯಾಮ ಅಥವಾ ನಡೆಯುವುದರಿಂದ ಹೃದಯಕ್ಕೆ ತೊಂದರೆಯಾಗಬಹುದು ಎಂಬ ಭಯವಿರುತ್ತದೆ. ಹೀಗಾಗಿ ಅವರು ದೈಹಿಕ ಚಟುವಟಿಕೆಗಳಿಂದ ದೂರ ಉಳಿಯುತ್ತಾರೆ. ಆದರೆ, ಹೃದಯದ ಆರೋಗ್ಯ ಕಾಪಾಡಿಕೊಳ್ಳಲು ಸೂಕ್ತವಾದ ದೈಹಿಕ ಚಟುವಟಿಕೆ ಮುಖ್ಯ ವಯಸ್ಸು, ದೈಹಿಕ ಸಾಮರ್ಥ್ಯ ಮತ್ತು ಹಿಂದಿನ ಆರೋಗ್ಯ ಸಮಸ್ಯೆಗಳಿಗೆ ಅನುಗುಣವಾಗಿ ವ್ಯಾಯಾಮದ ಪ್ರಮಾಣ ಹಾಗೂ ತೀವ್ರತೆಯನ್ನು ನಿರ್ಧರಿಸಬೇಕು. ಹೃದಯ ಕಾಯಿಲೆ ಇರುವವರು ಅಥವಾ ಆತಂಕಕಾರಿ ಲಕ್ಷಣಗಳನ್ನು ಅನುಭವಿಸುತ್ತಿರುವವರು ವೈದ್ಯರ ಸಲಹೆ ಪಡೆದು ವ್ಯಾಯಾಮ ಆರಂಭಿಸಬೇಕು. ಏಕಾಏಕಿ ಕಠಿಣ ವ್ಯಾಯಾಮ ಮಾಡುವುದು ಸೂಕ್ತವಲ್ಲ.
ಇತರ ಆರೋಗ್ಯ ಸಮಸ್ಯೆಗಳು
ನಿರಂತರ ಆಯಾಸಕ್ಕೆ ಜೀವನಶೈಲಿಯೇ ಯಾವಾಗಲೂ ಕಾರಣವಾಗಿರುವುದಿಲ್ಲ. ರಕ್ತಹೀನತೆ, ಥೈರಾಯ್ಡ್ ಸಮಸ್ಯೆ, ಪೌಷ್ಟಿಕಾಂಶದ ಕೊರತೆ, ಸೋಂಕುಗಳು, ಕೆಲವು ಔಷಧಿಗಳ ಅಡ್ಡಪರಿಣಾಮಗಳು ಹಾಗೂ ಇತರ ಆರೋಗ್ಯ ಸಮಸ್ಯೆಗಳಿಂದಲೂ ಸುಸ್ತು ಕಾಣಿಸಿಕೊಳ್ಳಬಹುದು. ಹೀಗಾಗಿ ದೀರ್ಘಕಾಲ ಆಯಾಸ ಕಾಡುತ್ತಿದ್ದರೆ ಅದನ್ನು ಕೇವಲ ನಿದ್ರೆಯ ಕೊರತೆ ಅಥವಾ ಸೋಮಾರಿತನ ಎಂದು ಭಾವಿಸದೆ ಸೂಕ್ತ ತಪಾಸಣೆ ಮಾಡಿಸಿಕೊಳ್ಳಬೇಕು.
ಯಾವಾಗ ವೈದ್ಯರ ಸಂಪರ್ಕಿಸಬೇಕು?
ಸಾಮಾನ್ಯಕ್ಕಿಂತ ಹೆಚ್ಚು ಹೊತ್ತು ಹಾಸಿಗೆಯಲ್ಲಿ ಕಳೆಯುವುದು ಕೆಲವೊಮ್ಮೆ ಸಹಜವಾಗಿರಬಹುದು. ಆದರೆ ನಿರಂತರ ಆಯಾಸ, ದೈಹಿಕ ಚಟುವಟಿಕೆಯಲ್ಲಿ ಇಳಿಕೆ ಅಥವಾ ದಿನನಿತ್ಯದ ಕೆಲಸಗಳನ್ನು ಮಾಡಲು ಕಷ್ಟವಾಗುತ್ತಿದ್ದರೆ ವೈದ್ಯರನ್ನು ಸಂಪರ್ಕಿಸುವುದು ಮುಖ್ಯ.
ಅದರಲ್ಲೂ ಎದೆನೋವು, ಉಸಿರಾಟದ ತೊಂದರೆ, ಹೃದಯ ಬಡಿತ ವೇಗವಾಗುವುದು, ತಲೆಸುತ್ತು, ಮೂರ್ಛೆ ಹೋಗುವುದು, ಅತಿಯಾದ ಬೆವರುವಿಕೆ, ಕಾಲುಗಳಲ್ಲಿ ಊತ ಅಥವಾ ದೈಹಿಕ ಚಟುವಟಿಕೆಯಲ್ಲಿ ದಿಢೀರ್ ಕುಸಿತ ಕಂಡುಬಂದರೆ ತಕ್ಷಣ ವೈದ್ಯಕೀಯ ನೆರವು ಪಡೆಯಬೇಕು.