ನವದೆಹಲಿ: ಹಲವು ರಾಜ್ಯಗಳಲ್ಲಿ ಇತ್ತೀಚೆಗೆ ನಡೆದ ಉಪ ಚುನಾವಣೆ ಫಲಿತಾಂಶ ಬುಧವಾರ ಪ್ರಕಟವಾಗಿದೆ. ಆಯಾ ರಾಜ್ಯಗಳಲ್ಲಿ ಅಧಿಕಾರದಲ್ಲಿರುವ ಪಕ್ಷಗಳೇ ಗೆದ್ದುಕೊಂಡಿರುವ ಮಹತ್ವಪೂರ್ಣವಾದ ಚುನಾವಣೆ ಎಂದರೆ ಮುಂಬೈನ ಬಾಂದ್ರಾ (ಪೂರ್ವ)ಕ್ಷೇತ್ರದ ಚುನಾವಣೆ.
ಮಹಾರಾಷ್ಟ್ರದ ವಿಧಾನಸಭೆ ಚುನಾವಣೆಯಲ್ಲಿ ಸ್ಪರ್ಧಿಸಿ ಸೋಲನುಭವಿಸಿದ್ದ ಮಾಜಿ ಸಿಎಂ ನಾರಾಯಣ ರಾಣೆ ಶಿವಸೇನೆ ಅಭ್ಯರ್ಥಿ ತೃಪ್ತಿ ಸಾವಂತ್ ವಿರುದ್ಧ 19,008 ಮತಗಳ ಅಂತರದಿಂದ ಸೋತಿದ್ದಾರೆ. ಕಳೆದ ಅಕ್ಟೋಬರ್‍ನಲ್ಲಿ ಮಹಾರಾಷ್ಟ್ರದ ಕಂಕವ್ಲಿ ಯಿಂದ ಸ್ಪರ್ಧಿಸಿ ಸೋತಿದ್ದರು.
ಎನ್‍ಸಿಪಿ ನಾಯಕ ಆರ್.ಆರ್.ಪಾಟೀಲ್ ನಿಧನದಿಂದ ತೆರವಾಗಿದ್ದ ತಸ್ಗಾಂವ್ ಕ್ಷೇತ್ರವನ್ನು ಅವರ ಪತ್ನಿ ಸುಮನತಿ ಪಾಟೀಲ್ ಗೆದ್ದಿದ್ದಾರೆ. ಉಳಿದಂತೆ ಪಂಜಾಬ್‍ನಲ್ಲಿ ಶಿರೋಮಣಿ ಅಕಾಲಿ ದಳ, ಉತ್ತರ ಪ್ರದೇಶದಲ್ಲಿ ಎಸ್‍ಪಿ, ಛತ್ತೀಸ್‍ಗಡದಲ್ಲಿ ಕಾಂಗ್ರೆಸ್ ತಲಾ ಒಂದು ಸ್ಥಾನ ಗೆದ್ದಿವೆ.