ನವದೆಹಲಿ: ಉಗ್ರ ಬುರ್ಹಾನಿಯೊಬ್ಬ ಹೋರಾಟಗಾರ, ಯುವ ನಾಯಕ ಎಂಬ ಪಾಕಿಸ್ತಾನ ಪ್ರಧಾನಮಂತ್ರಿ ನವಾಜ್ ಷರೀಫ್ ಅವರ ಪ್ರಶಂಸೆಯ ಮಾತುಗಳನ್ನು ಕೇಳಿದರೆ, ಅವರೂ ಕೂಡ ಇಸಿಸ್ ಸಂಘಟನೆ ಸೇರಿದಂತಿದೆ ಎಂದು ಮಾಜಿ ನಿವೃತ್ತ ವಿದೇಶಾಂಗ ಕಾರ್ಯದರ್ಶಿ ಭುಪತ್ರೇ ಶಶಾಂಕ್ ಅವರು ಬುಧವಾರ ಅಭಿಪ್ರಾಯಪಟ್ಟಿದ್ದಾರೆ.

ವಿಶ್ವಸಂಸ್ಥೆಯ ಸಾಮಾನ್ಯ ಸಭೆಯಲ್ಲಿ ಉಗ್ರ ಬುರ್ಹಾನ್ ವಾನಿಯನ್ನು ನವಾಜ್ ಶರೀಫ್ ಅವರು ಕೊಂಡಾಡಿರುವುದರ ಕುರಿತಂತೆ ಪ್ರತಿಕ್ರಿಯೆ ನೀಡಿರುವ ಅವರು, ಬುರ್ಹಾನ್ ವಾನಿಯನ್ನು ನವಾಜ್ ಷರೀಫ್ ಅವರು ಪ್ರಶಂಸಿಸಿರುವುದನ್ನು ನೋಡಿದರೆ, ನವಾಜ್ ಷರೀಫ್ ಅವರು ಇಸಿಸ್ ಸಂಘಟನೆ ಸೇರಿರಬೇಕು ಅಥವಾ ಇಸ್ಲಾಮಿಕ್ ಸ್ಟೇಟ್ ಮತ್ತು ಕಾಶ್ಮೀರ, ಪಾಕಿಸ್ತಾನದ ನಡುವೆ ಯಾವುದೇ ವ್ಯತ್ಯಾಸವಿಲ್ಲ ಎಂದು ತಿಳಿದಿರಬೇಕು ಎಂದು ಹೇಳಿದ್ದಾರೆ.

ಭಯೋತ್ಪಾದನೆ ಕುರಿತಂತೆ ಮೊದಲು ಷರೀಫ್ ಅವರು ತಮ್ಮ ನಿಲುವನ್ನು ಸ್ಪಷ್ಟಪಡಿಸಬೇಕಿದೆ. ಪಾಕಿಸ್ತಾನ, ಭಾರತ ಮತ್ತು ಕಾಶ್ಮೀರ ಕುರಿತಂತೆ ಅವರು ಯಾವ ರೀತಿಯಲ್ಲಿ ಆಲೋಚನೆ ಮಾಡುತ್ತಿದ್ದಾರೆ? ಇಸ್ಲಾಮಿಕ್ ಸ್ಟೇಟ್ ಉಗ್ರ ಸಂಘಟನೆಯಲ್ಲಿ ಇವರೂ ಭಾಗಿಯಾಗಿದ್ದಾರೆಯೇ? ಉಗ್ರ ಬುರ್ಹಾನ್ ವಾನಿಯನ್ನು ಹೀರೋ ಎಂದು ಷರೀಫ್ ಕರೆದಿದ್ದಾರೆಂದರೆ ಆತ ಪಾಕಿಸ್ತಾನದ ಹೀರೋ ಎಂಬ ಅರ್ಥವೇ ಬರುತ್ತದೆ. ಪಾಕಿಸ್ತಾನ ಕಾಶ್ಮೀರಕ್ಕಾಗಿ ಹೋರಾಟ ಮಾಡುತ್ತಿದೆ. ವಾನಿ ಕೂಡ ಭಾರತವನ್ನು ಇಸ್ಲಾಮಿಕ್ ಸ್ಟೇಟ್ ನ ಭಾಗ ಮಾಡಬೇಕೆಂದು ಬಯಸಿದ್ದ.

ಮೊದಲು ಷರೀಫ್ ಅವರು ತಮ್ಮ ನಿಲುವನ್ನು ಸ್ಪಷ್ಟಪಡಿಸಬೇಕಿದೆ. ಇಲ್ಲದಿದ್ದರೆ ಭಾರತೀಯರು ಷರೀಫ್ ಅವರಿಗೆ ದಿಟ್ಟ ಉತ್ತರ ನೀಡಲಿದ್ದಾರೆಂದು ತಿಳಿಸಿದ್ದಾರೆ.