ಚಂಡೀಘಡ: ಅತ್ಯಾಚಾರ ಪ್ರಕರಣ ಸಂಬಂಧ ಜೈಲು ಸೇರಿರುವ ಡೇರಾ ಸಚ್ಚಾ ಸೌಧದ ಮುಖ್ಯಸ್ಥ ಬಾಬಾ ರಾಮ್ ರಹೀಂ ಗೆ ರೋಹ್ಟಕ್ ನ ಸುನಾರಿಯಾ ಜೈಲಿನಲ್ಲಿ ವಿಶೇಷ ಕೊಠಡಿ ನೀಡಲಾಗಿದ್ದು, ಓರ್ವ ಸಹಾಯಕನನ್ನು ಬಾಬಾ  ಸೇವೆಗೆ ನಿಯೋಜಿಸಲಾಗಿದೆ ಎಂದು ತಿಳಿದುಬಂದಿದೆ.

ಅಂತೆಯೇ ಜೈಲಿನ ಕೊಠಡಿಯಲ್ಲಿ ಬಾಬಾಗೆ ವಿಶೇಷ ಮಿನರಲ್ ನೀರಿನ ಬಾಟಲ್ ವ್ಯವಸ್ಥೆ ಮಾಡಲಾಗಿದ್ದು, ಜೈಲಿನ ಸುತ್ತ ಮುತ್ತ ವ್ಯಾಪಕ ಭದ್ರತೆ ಒದಗಿಸಲಾಗಿದೆ. ಇಂದು ಜೈಲಿನ ಬಳಿ ಬಾಬಾ ಅನುಯಾಯಿಗಳು ಆಗಮಿಸುವ  ಶಂಕೆ ಇರುವುದರಿಂದ ಜೈಲಿನ ಭದ್ರತೆಯನ್ನು ಗಣನೀಯವಾಗಿ ಹೆಚ್ಚಳ ಮಾಡಲಾಗಿದೆ. ಬಾಬಾ ರಾಮ್ ರಹೀಮ್ ಜೈಲು ಸೇರುತ್ತಿದ್ದಂತೆಯೇ ಜೈಲಿನ ಸುಮಾರು 5 ಕಿ.ಮೀ ವ್ಯಾಪ್ತಿಯಲ್ಲಿ ವ್ಯಾಪಕ ಭದ್ರತೆ ಒದಗಿಸಲಾಗಿದ್ದು, ಸುಮಾರು  6 ತುಕಡಿಗಳ ಕೇಂದ್ರೀಯ ಮೀಸಲು ಪಡೆ, ಸಿಐಎಸ್ ಎಫ್ ಹಾಗೂ ಬಿಎಸ್ ಎಫ್ ಯೋಧರನ್ನು ರೋಹ್ಟಕ್ ನಲ್ಲಿ ಭದ್ರತೆಗೆ ನಿಯೋಜಿಸಲಾಗಿದೆ. ಇಡೀ ಜೈಲಿಗೆ ಸೇನಾಪಡೆಗಳ ಭದ್ರಕೋಟೆಯನ್ನು ನಿರ್ಮಿಸಲಾಗಿದೆ.

ಬಾಬಾ ಅನುಪಸ್ಥಿತಿಯಲ್ಲಿ ಶಿಕ್ಷೆ ಪ್ರಮಾಣ ಪ್ರಕಟ ಸಾಧ್ಯತೆ
ಇದೇ ವೇಳೆ ಬಾಬಾ ರಾಮ್ ರಹೀಂ ವಿರುದ್ಧದ ಅತ್ಯಾಚಾರ ಪ್ರಕರಣದ ಶಿಕ್ಷೆ ಪ್ರಮಾಣವನ್ನು ಇದೇ ಸೋಮವಾರ ಪಂಚಕುಲದಲ್ಲಿರುವ ಸಿಬಿಐ ವಿಶೇಷ ನ್ಯಾಯಾಲಯ ಪ್ರಕಟಿಸಲಿದ್ದು, ದೋಷಿ ಬಾಬಾ ಅನುಪಸ್ಥಿತಿಯಲ್ಲೇ ಶಿಕ್ಷೆ  ಪ್ರಮಾಣ ಪ್ರಕಟ ಮಾಡುವ ಸಾಧ್ಯತೆ ಇದೆ. ನಿನ್ನೆ ತೀರ್ಪು ಪ್ರಕಟವಾಗುತ್ತಿದ್ದಂತೆಯೇ ವ್ಯಾಪಕತ ಹಿಂಸಾಚಾರ ಭುಗಿಲೆದ್ದ ಪರಿಣಾಮ ಸೋಮವಾರ ಅವರನ್ನು ನ್ಯಾಯಾಲಯಕ್ಕೆ ಕರೆತರದಿರಲು ಪೊಲೀಸರು ನಿರ್ಧರಿಸಿದ್ದಾರೆ ಎಂದು  ಹೇಳಲಾಗಿದೆ. ಹೀಗಾಗಿ ಅಪರಾಧಿಯ ಅನುಪಸ್ಥಿತಿಯಲ್ಲೇ ಪಂಚಕುಲ ವಿಶೇಷ ಸಿಬಿಐ ಕೋರ್ಟ್ ಶಿಕ್ಷೆ ಪ್ರಮಾಣ ಪ್ರಕಟ ಮಾಡಲಿದೆ.