ಲಖನೌ: ತೀವ್ರ ಕುತೂಹಲ ಕೆರಳಿಸಿರುವ ಪಂಚರಾಜ್ಯಗಳ ವಿಧಾನಸಭಾ ಚುನಾವಣೆಗಳ ಪೈಕಿ ಉತ್ತರಪ್ರದೇಶ ಮತ್ತು ಮಣಿಪುರ ರಾಜ್ಯಗಳಲ್ಲಿ ಅಂತಿಮ ಹಂತದ ಮತದಾನ ಪ್ರಕ್ರಿಯೆ ಬುಧವಾರ ಆರಂಭಗೊಂಡಿದೆ. 

ಬಿಗಿ ಭದ್ರತೆಗಳ ನಡುವೆ ಉಭಯ ರಾಜ್ಯಗಳಲ್ಲಿ ಮತದಾನ ಪ್ರಕ್ರಿಯೆಗಳು ಆರಂಭಗೊಂಡಿವೆ. ಉತ್ತರಪ್ರದೇಶದಲ್ಲಿ ಈಗಾಗಲೇ 6 ಹಂತಗಳ ಚುನಾವಣೆ ಪೂರ್ಣಗೊಂಡಿದ್ದು, ಇಂದು 7ನೇ ಹಂತದಲ್ಲಿ ಮತದಾನ ಪ್ರಕ್ರಿಯೆ ಆರಂಭಗೊಂಡಿದೆ. ಮತ್ತೊಂದೆಡೆ ಮಣಿಪುರದಲ್ಲಿಯೂ ಎರಡನೇ ಹಾಗೂ ಕೊನೆಯ ಹಂತದಲ್ಲಿ ಮತದಾನ ಚುನಾವಣೆ ನಡೆಯುತ್ತಿದೆ. 

ಉತ್ತಪ್ರದೇಶ ಒಟ್ಟು 404 ವಿಧಾನಸಭಾ ಕ್ಷೇತ್ರಗಳನ್ನು ಹೊಂದಿದ್ದು, ಪ್ರಧಾನಮಂತ್ರಿ ನರೇಂದ್ರ ಮೋದಿಯವರ ಸ್ವಕ್ಷೇತ್ರ ವಾರಣಾಸಿ, ಸೋನ್ ಭದ್ರ, ಮೀರ್ಜ್ ಪುರ್, ಚಂದೌಲಿ ಸೇರಿದಂತೆ ಒಟ್ಟು 7 ಜಿಲ್ಲೆಗಳ 40 ಕ್ಷೇತ್ರಗಳಲ್ಲಿ ಮತದಾನ ನಡೆಯುತ್ತಿದೆ. 51 ಮಂದಿ ಮಹಿಳಾ ಅಭ್ಯರ್ಥಿಗಳು ಸೇರಿ ಒಟ್ಟು 535 ಅಭ್ಯರ್ಥಿಗಳ ಭವಿಷ್ಯ ಇಂದು ನಿರ್ಧಾರವಾಗಲಿದೆ. 

40 ಕ್ಷೇತ್ರಗಳಲ್ಲಿ ಒಟ್ಟು 1.41 ಮತದಾರರಿದ್ದು, ಇದರಲ್ಲಿ 64.99 ಲಕ್ಷ ಮಹಿಳೆಯರು, 76.67 ಲಕ್ಷ ಪುರುಷರು ಹಾಗೂ 706 ತೃತೀಯ ಲಿಂಗಿಗಳು ಮತದಾರರಿದ್ದಾರೆ. ಮತದಾನ ಹಿನ್ನಲೆಯಲ್ಲಿ ಒಟ್ಟು 14,468 ಮತಗಟ್ಟೆಗಳನ್ನು ಈಗಾಗಲೇ ತೆರೆಯಲಾಗಿದೆ. 

ಮಣಿಪುರ 66 ವಿಧಾನಸಭಾ ಕ್ಷೇತ್ರಗಳನ್ನು ಹೊಂದಿದ್ದು, ಇಂದು ಒಟ್ಟು 22 ಕ್ಷೇತ್ರಗಳಿಗೆ ಮತದಾನ ಪ್ರಕ್ರಿಯೆಗಳು ನಡೆಯುತ್ತಿವೆ. ಒಟ್ಟು 98 ಅಭ್ಯರ್ಥಿಗಳು ಕಣದಲ್ಲಿ ನಿಂತಿದ್ದಾರೆ. ಮತದಾನ ಹಿನ್ನಲೆಯಲ್ಲಿ ಈಗಾಗಲೇ 1,151 ಮತಕೇಂದ್ರಗಳನ್ನು ಸ್ಥಾಪನೆ ಮಾಡಲಾಗಿದೆ.