ನವದೆಹಲಿ: ಭಾರತೀಯ ಆಹಾರ ಪದ್ಧತಿಗೆ ಮಾರು ಹೋಗಿರುವ ಆಸ್ಟ್ರೇಲಿಯಾ ಪ್ರಧಾನಮಂತ್ರಿ ಸ್ಕಾಟ್ ಮಾರಿಸನ್ ಅವರು ಪ್ರಧಾನಮಂತ್ರಿ ನರೇಂದ್ರ ಮೋದಿಯವರಿಗೆ ಸಮೋಸಾ ಟ್ವೀಟ್ ಮಾಡಿದ್ದು, ಇದಕ್ಕೆ ಪ್ರತಿಕ್ರಿಯೆ ನೀಡಿರುವ ಪ್ರಧಾನಿ ಮೋದಿಯವರು ಕೊರೋನಾ ಬಳಿಕ ಇಬ್ಬರು ಕುಳಿತು ಸಮೋಸಾ ತಿನ್ನೋಣ ಎಂದು ಹೇಳಿದ್ದಾರೆ.
ಸಮೋಸಾ ಹಾಗೂ ಮಾವಿನಕಾಯಿ ಚಟ್ನಿ ತಯಾರಿಸುವುದನ್ನು ಕಲಿತುಕೊಂಡಿರುವ ಆಸ್ಟ್ರೇಲಿಯಾ ಪ್ರಧಾನಮಂತ್ರಿಗಳು, ತಾವು ಸಿದ್ಧಪಡಿಸಿರುವ ಈ ಖಾದ್ಯವನ್ನು ಟ್ವಿಟರ್ ನಲ್ಲಿ ಪ್ರಧಾನಿ ಮೋದಿಯವರ ಜೊತೆ ಹಂಚಿಕೊಂಡಿದ್ದಾರೆ.
ನಾನು ಭಾನುವಾರ ಸ್ಕೊಮೋಸಾ (ಸಮೋಸಾಗೆ ಇಟ್ಟಿರುವ ಹೆಸರು) ಸಿದ್ದಪಡಿಸಿದ್ದೇನೆ. ಈ ಖಾದ್ಯವನ್ನು ಮೋದಿಯವರ ಜೊತೆ ಹಂಚಿಕೊಳ್ಳಲು ಇಷ್ಟಪಡುತ್ತೇನೆಂದು ಟ್ವೀಟ್ ಮಾಡಿದ್ದರು.
ಈ ಟ್ವೀಟ್'ಗೆ ಪ್ರತಿಕ್ರಿಯೆ ನೀಡಿರುವ ಮೋದಿಯವರು, ನಾವು ಸಮೋಸಾ ಮೂಲಕ ಒಂದಾಗಿದ್ದೇವೆ. ಸ್ವಾದಿಷ್ಟವಾಗಿ ಕಾಣುತ್ತಿದೆ. ಕೊರೋನಾ ಬಳಿಕ ಇಬ್ಬರೂ ಕೂತು ಸಮೋಸಾ ತಿನ್ನೋಣ ಎಂದಿದ್ದಾರೆ.