ನವದೆಹಲಿ: ಕಾಂಗ್ರೆಸ್ ತೊರೆದ ಸ್ವಲ್ಪ ಸಮಯದ ನಂತರ, ಮಾಜಿ ಶಾಸಕಿ ನವಜೋತ್ ಕೌರ್ ಸಿಧು ಅವರು ಲೋಕಸಭೆಯ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ವಿರುದ್ಧ ವಾಗ್ದಾಳಿ ನಡೆಸಿದ್ದಾರೆ. ಅವರು ಮೂಲಭೂತ ವಾಸ್ತವಗಳಿಂದ ಸಂಪರ್ಕ ಕಡಿದುಕೊಂಡಿದ್ದಾರೆ ಮತ್ತು ಅವರು ಮಾಡುವ ಮತ್ತು ಹೇಳುವ ವಿಷಯಗಳು ತುಂಬಾ ಭಿನ್ನವಾಗಿವೆ ಎಂದಿದ್ದಾರೆ.

ಕೊಯಮತ್ತೂರಿನಲ್ಲಿ ಮಾಧ್ಯಮಗಳೊಂದಿಗೆ ಮಾತನಾಡಿದ ಮಾಜಿ ಕಾಂಗ್ರೆಸ್ ನಾಯಕಿ, ಪಕ್ಷದ ಪಂಜಾಬ್ ಘಟಕದಲ್ಲಿ ಭ್ರಷ್ಟಾಚಾರ ನಡೆದಿದೆ ಎಂದು ಆರೋಪಿಸಿದ ಅವರು, ಮುಂದಿನ ವರ್ಷ ರಾಜ್ಯ ಚುನಾವಣೆಯಲ್ಲಿ ಪಕ್ಷದ ಸೋಲು ಖಚಿತ ಎಂದು ಭವಿಷ್ಯ ನುಡಿದರು.

ಮಾಜಿ ಕ್ರಿಕೆಟಿಗ ಮತ್ತು ಪಂಜಾಬ್ ಕಾಂಗ್ರೆಸ್ ಮಾಜಿ ಮುಖ್ಯಸ್ಥ ನವಜೋತ್ ಸಿಂಗ್ ಸಿಧು ಅವರ ಪತ್ನಿ ನವಜೋತ್ ಕೌರ್ ಸಿಧು, ರಾಹುಲ್ ಗಾಂಧಿಯವರು ತಳಮಟ್ಟದಲ್ಲಿ ಕೆಲಸ ಮಾಡಿಲ್ಲ ಮತ್ತು ಆ ಮಟ್ಟದಲ್ಲಿ ಏನು ನಡೆಯುತ್ತಿದೆ ಎಂದು ಅವರಿಗೆ ತಿಳಿದಿಲ್ಲ. ತಳಮಟ್ಟದಲ್ಲಿಯೂ ಕೆಲಸ ಮಾಡುವುದು ಬಹಳ ಮುಖ್ಯ ಎಂದು ನಾನು ಭಾವಿಸುತ್ತೇನೆ. ಹಾಗೆಯೇ, ತಳಮಟ್ಟದಲ್ಲಿ ಏನು ನಡೆಯುತ್ತಿದೆ ಎಂಬುದು ಬಹಳ ಮುಖ್ಯ. ನೀವು ಕನಸಿನ ಲೋಕದಲ್ಲಿ ಬದುಕಲು ಸಾಧ್ಯವಿಲ್ಲ' ಎಂದು ಅವರು ಹೇಳಿದರು.

ರಾಹುಲ್ ಗಾಂಧಿ ಮತ್ತು ಪ್ರಧಾನಿ ನರೇಂದ್ರ ಮೋದಿ ನಡುವೆ ಹೋಲಿಕೆ ಮಾಡಿದ ಅವರು, 'ನೀವು ಪ್ರಧಾನಿ ಮೋದಿಯತ್ತ ಬೆರಳು ತೋರಿಸಬಹುದು. ಆದರೆ, ಅವರ ವಿರುದ್ಧ ಯಾವುದೇ ವೈಯಕ್ತಿಕ ಅಥವಾ ಆರ್ಥಿಕ ತಪ್ಪುಗಳಿಲ್ಲ. ಮೋದಿ ಭ್ರಷ್ಟಾಚಾರದಿಂದ ಮುಕ್ತರಾಗಿದ್ದಾರೆ. ಮತ್ತೊಂದೆಡೆ, ರಾಹುಲ್ ಗಾಂಧಿ ಚೆನ್ನಾಗಿ ಮಾತನಾಡಬಹುದು ಮತ್ತು ಅವರ ಮಾತುಗಳು ಅರ್ಥಪೂರ್ಣವಾಗಿ ಕಾಣಿಸಬಹುದು. ಆದರೆ, ಅವರ ಮಾತಿಗೂ ನಡವಳಿಕೆಗೂ ಹೊಂದಿಕೆಯಾಗುವುದಿಲ್ಲ' ಎಂದು ಹೇಳಿದರು.

ಪಂಜಾಬ್ ಕಾಂಗ್ರೆಸ್ ಮುಖ್ಯಸ್ಥರಿಂದ ಆದ 'ಅನ್ಯಾಯ'ದ ಬಗ್ಗೆ ತಿಳಿಸಲು ರಾಹುಲ್ ಗಾಂಧಿಯವರ ಅಪಾಯಿಂಟ್ಮೆಂಟ್ ಪಡೆಯಲು ಎಂಟು ತಿಂಗಳ ಕಾಲ ಪ್ರಯತ್ನಿಸಿದ್ದೆ ಎಂದು ನವಜೋತ್ ಕೌರ್ ಸಿಧು ಹೇಳಿದರು.

'ಪಂಜಾಬ್‌ನಲ್ಲಿ ನಿಮ್ಮ ಪಕ್ಷ ನಾಶವಾಗುತ್ತಿದೆ ಎಂದು ಹೇಳಲು ನಾನು ನಿಮ್ಮನ್ನು ಭೇಟಿಗೆ ಆಹ್ವಾನಿಸಿದೆ. ಅವರು ಈಗಾಗಲೇ ಟಿಕೆಟ್‌ಗಳನ್ನು ಮಾರಾಟ ಮಾಡಿದ್ದಾರೆ. ನಿಮ್ಮ ಕೆಳಗೆ ಏನು ನಡೆಯುತ್ತಿದೆ ಎಂದು ನಿಮಗೆ ತಿಳಿದಿಲ್ಲದಿದ್ದರೆ, ಕ್ಷಮಿಸಿ, ನೀವು ಆ ಕುರ್ಚಿಗೆ ಅರ್ಹರಲ್ಲ. ನೀವು ಏನು ಮಾಡುತ್ತಿದ್ದೀರಿ ಎಂಬುದಕ್ಕೆ ನೀವೇ ಜವಾಬ್ದಾರರು' ಎಂದು ಅವರು ಹೇಳಿದರು.

'ನಾವು ಪಂಜಾಬ್‌ಗಾಗಿ ಎಲ್ಲವನ್ನೂ ತೊರೆದೆವು ಮತ್ತು ನೀವು ನಮಗೆ ಏಳು ಇಲಾಖೆಗಳೊಂದಿಗೆ ಉಪಮುಖ್ಯಮಂತ್ರಿ ಹುದ್ದೆ ಮತ್ತು ನನಗೆ ಸಂಸದೆ ಸ್ಥಾನ ನೀಡುವ ಭರವಸೆ ನೀಡಿದ್ದೀರಿ. ಆದರೆ, ನೀವು ನಮಗೆ ಏನನ್ನೂ ನೀಡಿಲ್ಲ. ನಿಮ್ಮ ಸ್ವಂತ ಜನರು ಭ್ರಷ್ಟರಾಗಿರುವಾಗ ನೀವು ಭ್ರಷ್ಟಾಚಾರದ ವಿರುದ್ಧ ಏಕೆ ಮಾತನಾಡುತ್ತಿದ್ದೀರಿ? ಮತ್ತು ನಿಮ್ಮ ಸುತ್ತಲಿನ ಆ ಭ್ರಷ್ಟ ಜನರನ್ನು ನೀವು ಇಷ್ಟಪಡುತ್ತಿದ್ದೀರಿ. ನಿಮ್ಮ ಸುತ್ತಲಿನ ಜನರು ಸಂಪೂರ್ಣವಾಗಿ ಭ್ರಷ್ಟರು. ಇದು ತಪ್ಪು ಎಂದು ಹೇಳಲು ಬಯಸುವ ಪ್ರಾಮಾಣಿಕರ ಮಾತುಗಳನ್ನು ಕೇಳಲು ನಿಮಗೆ ಸಮಯವಿಲ್ಲ. ನೀವು ಮತ್ತೆ ಪಂಜಾಬ್ ಗೆಲ್ಲಲು ಸಾಧ್ಯವಿಲ್ಲ' ಎಂದರು.

62 ವರ್ಷದ ಅವರು ಈ ಹಿಂದೆ ಬಿಜೆಪಿಯಲ್ಲಿದ್ದರು ಮತ್ತು 2012 ರಿಂದ 2016 ರವರೆಗೆ ಶಾಸಕಿಯಾಗಿ ಸೇವೆ ಸಲ್ಲಿಸಿದ್ದರು. ನಂತರ ಅವರು ಕಾಂಗ್ರೆಸ್ ಸೇರಿದರು. ಇತ್ತೀಚೆಗೆ, ಪಂಜಾಬ್ ಕಾಂಗ್ರೆಸ್ ಮುಖ್ಯಸ್ಥ ಅಮರಿಂದರ್ ಸಿಂಗ್ ರಾಜಾ ವಾರಿಂಗ್ ವಿರುದ್ಧ ಗಂಭೀರ ಆರೋಪಗಳನ್ನು ಮಾಡಿದ ಅವರು, ಕಾಂಗ್ರೆಸ್ ಚುನಾವಣೆಯಲ್ಲಿ ಗೆದ್ದರೆ ಮುಖ್ಯಮಂತ್ರಿ ಹುದ್ದೆಗೆ ಪ್ರತಿಯಾಗಿ ರಾಜ್ಯ ನಾಯಕತ್ವವು ₹500 ಗಳನ್ನು ಬೇಡಿಕೆ ಇಡುತ್ತಿದೆ ಎಂದು ಹೇಳಿದರು. ಆ ಹೇಳಿಕೆಯ ನಂತರ ಗದ್ದಲದ ನಡುವೆ ಅವರನ್ನು ಅಮಾನತುಗೊಳಿಸಲಾಯಿತು.