ವಾಶಿಂಗ್ಟನ್: ಟ್ವಿಟ್ಟರ್ ನಲ್ಲಿ ಒಂದು ದಶಲಕ್ಷ ಅನುಯಾಯಿಗಳನ್ನು ಅತಿ ವೇಗವಾಗಿ ಪಡೆದ ಗಿನ್ನಿಸ್ ದಾಖಲೆಯನ್ನು ಅಮೇರಿಕಾ ಅಧ್ಯಕ್ಷ ಒಬಾಮಾ ಮುರಿದಿದ್ದಾರೆ. ಅವರ ಟ್ವಿಟ್ಟರ್ ಖಾತೆ @POTUS ಐದು ಘಂಟೆಗಳಿಗೂ ಕಡಿಮೆ ಅವಧಿಯಲ್ಲಿ ಒಂದು ದಶಲಕ್ಷ ಬೆಂಗಲಿಗರನ್ನು ದಾಟಿದೆ.

ಅಧಿಕೃತ ವಿಶ್ವ ದಾಖಲೆಗಳನ್ನು ಪರಿಶೀಲಿಸುವ-ದಾಖಲಿಸುವ ಗಿನ್ನಿಸ್ ವಿಶ್ವ ದಾಖಲೆ ಸಂಸ್ಥೆ ಮಂಗಳವಾರ ತಮ್ಮ ಅಂತರ್ಜಾಲ ತಾಣದಲ್ಲಿ ಅಮೇರಿಕಾ ಅಧ್ಯಕ್ಷ ಒಂದು ದಿನದ ಕೆಳಗೆ ವಿಶ್ವ ದಾಖಲೆ ಮಾಡಿರುವ ಬಗ್ಗೆ ಘೋಷಣೆ ಮಾಡಿದ್ದಾರೆ.

ಐದು ಘಂಟೆಗಳಿಗೂ ಕಡಿಮೆ ಸಮಯದಲ್ಲಿ ೧ ಮಿಲಯನ್ ಹಿಂಬಾಲಕರನ್ನು ಪಡೆದು ಒಬಾಮ ನಟ ರಾಬರ್ಟ್ ದೌನೆ ಜೂನಿಯರ್ ಅವರ ಹಿಂದಿನ ದಾಖಲೆಯನ್ನು ಅಳಿಸಿಹಾಕಿದ್ದಾರೆ ಎಂದಿದೆ. ಈ ಹಿಂದೆ ಈ ನಟ ಏಪ್ರಿಲ್ ೨೦೧೪ರಲ್ಲಿ ೨೩ ಘಂಟೆ ೨೨ ನಿಮಿಷಗಳಲ್ಲಿ ಒಂದು ದಶಲಕ್ಷ ಅನುಯಾಯಿಗಳನ್ನು ಪಡೆದ ದಾಖಲೆ ಮಾಡಿದ್ದರು.

"ಹಲ್ಲೋ, ಟ್ವಿಟ್ಟರ್! ನಾನು ಬರಾಕ್. ನಿಜವಾಗಿಯೂ! ಆರು ವರ್ಷ ಕಳೆಯಿತು. ಕೊನೆಗೂ ಅವರು ನನ್ನದೇ ಆದ ಒಂದು ಖಾತೆಯನ್ನು ನೀಡಿದ್ದಾರೆ" ಎಂದು ಒಬಾಮ ಮೊದಲ ಟ್ವೀಟ್ ಮಾಡಿದ್ದಾರೆ.