ಸ್ಯಾನ್ ಫ್ರಾನ್ಸಿಸ್ಕೋ: ಫೇಸ್ಬುಕ್ ತನ್ನ ಜನಪ್ರಿಯ ಫೀಚರ್ 'ವೈ ಫೈ ಹುಡುಕಿ'ಯನ್ನು ಜಾಗತಿಕವಾಗಿ ವಿಸ್ತರಿಸಿದ್ದು, ಈಗ ಐ ಒ ಎಸ್ ಮತ್ತು ಆಂಡ್ರಾಯ್ಡ್ ಫೋನುಗಳನ್ನು ಬಳಸುವ ೨ ಬಿಲಿಯನ್ ಫೇಸ್ಬುಕ್ ಬಳಕೆದಾರರಿಗೆ ಲಭ್ಯವಾಗಲಿದೆ.
ಸಾಮಾಜಿಕ ಸಂಪರ್ಕ ಜಾಲ ದೈತ್ಯ ಕಳೆದ ವರ್ಷವಷ್ಟೇ, ಆಯ್ದ ಕೆಲವು ದೇಶಗಳಲ್ಲಿ, ಐ ಒ ಎಸ್ ಬಳಕೆದಾರರಿಗೆ 'ವೈ ಫೈ ಹುಡುಕಿ' ಫೀಚರ್ ಒದಗಿಸಿ ಪರೀಕ್ಷೆ ನಡೆಸಿತ್ತು.
"ನಾವು 'ವೈ ಫೈ ಹುಡುಕಿ'ಯನ್ನು ವಿಶ್ವದಾದ್ಯಂತ ಐ ಒ ಎಸ್ ಮತ್ತು ಆಂಡ್ರಾಯ್ಡ್ ಫೋನುಗಳ ಬಳಕೆದಾರರಿಗೆ ವಿಸ್ತರಿಸುತ್ತಿದ್ದೇವೆ. ಕಳೆದ ವರ್ಷ ಬೆರಳೆಣಿಕೆಯಷ್ಟೇ ದೇಶಗಳಲ್ಲಿ ಇದನ್ನು ಪರಿಚಯಿಸಿದ್ದೆವು. ಎಲ್ಲಿ ಮೊಬೈಲ್ ಇಂಟರ್ ನೆಟ್ ಕೊರತೆ ಇತ್ತೋ ಅಲ್ಲೆಲ್ಲ ಇದು ಬಹಳ ಉಪಯುಕ್ತವಾಗಿತ್ತು" ಎಂದು ಫೇಸ್ಬುಕ್ ನ ಎಂಜಿನಿಯರಿಂಗ್ ನಿರ್ದೇಶಕ ಅಲೆಕ್ಸ್ ಹಿಮೇಲ್ ಶುಕ್ರವಾರ ರಾತ್ರಿ ಬ್ಲಾಗ್ ನಲ್ಲಿ ಬರೆದುಕೊಂಡಿದ್ದಾರೆ.
ಫೇಸ್ಬುಕ್ ನಲ್ಲಿ ಪುಟ ತೆರೆದಿರುವ ವ್ಯಾವಹಾರಿಕ ಸಂಸ್ಥೆಗಳು ವೈ ಫೈ ಹಂಚಿಕೊಂಡಿದ್ದರೆ, ಅವುಗಳನ್ನು ಹುಡುಕಲು ಈ ಫೀಚರ್ ಅವಕಾಶ ಮಾಡಿಕೊಡುತ್ತದೆ.
"ನಿಮ್ಮ ಮೊಬೈಲ್ ಇಂಟರ್ನೆಟ್ ನಲ್ಲಿ ಸಿಗ್ನಲ್ ಕಾಣೆಯಾದಾಗ, ಹತ್ತಿರದಲ್ಲಿರುವ ಈ ವೈ ಫೈ ಸ್ಪಾಟ್ ಗಳನ್ನು ಹುಡುಕಲು ಇದು ಅನುವು ಮಾಡಿಕೊಡುತ್ತದೆ" ಎಂದು ಕೂಡ ಅವರು ಬರೆದಿದ್ದಾರೆ.
ಇದನ್ನು ಬಳಸಲು ನಿಮ್ಮ ಮೊಬೈಲ್ ನಲಿ ಫೇಸ್ಬುಕ್ ಆಪ್ ತೆರೆದು, 'ಮೋರ್' ಟ್ಯಾಬ್ ಮೇಲೆ ಕ್ಲಿಕ್ಕಿಸಿ, 'ಫೈಂಡ್ ವೈ ಫೈ' ಮೇಲೆ ಒತ್ತಬೇಕು.