ಸ್ಯಾನ್ ಫ್ರಾನ್ಸಿಸ್ಕೋ: ಫೇಸ್ ಬುಕ್ ನಲ್ಲಿ ಕೆಲಸ ಮಾಡುತ್ತಿರುವ ಅಂಧ ನೌಕರರೊಬ್ಬರು ಅಂಧರಿಗಾಗಿಯೇ ತಂತ್ರಜ್ಞಾನ ಅಭಿವೃದ್ಧಿಪಡಿಸುತ್ತಿದ್ದಾರೆ.
ಸಾಮಾನ್ಯ ಜನರಿಗೆ ಕಾಣುವ ಚಿತ್ರ ಅಥವಾ ವಿಡಿಯೋವನ್ನು ಅಂಧರಿಗೆ ಮೌಖಿಕವಾಗಿ ತಿಳಿಸುವ ಸಾಮರ್ಥ್ಯ ಹೊಂದಿರುವ ತಂತ್ರಜ್ಞಾನವನ್ನು ಅಭಿವೃದ್ಧಿಪಡಿಸಲಾಗುತ್ತಿದ್ದು, ಕೃತಕ ಬುದ್ಧಿಮತ್ತೆಯ ನೆರವಿನಿಂದ ಈ ತಂತ್ರಜ್ಞಾನ ಕಾರ್ಯನಿರ್ವಹಿಸಲಿದೆ.
ಫೇಸ್ ಬುಕ್ ಇಂಜಿನಿಯರ್ ಆಗಿರುವ ಮ್ಯಾಟ್ ಕಿಂಗ್ ಈ ತಂತ್ರಜ್ಞಾನ ಅಭಿವೃದ್ಧಿಪಡಿಸುತ್ತಿರುವ ಯೋಜನೆಯ ತಂಡವನ್ನು ಮುನ್ನಡೆಸುತ್ತಿದ್ದು, ಮುಂದಿನ ದಿನಗಳಲ್ಲಿ ಫೇಸ್ ಬುಕ್ ನಿಬಂಧನೆಗಳನ್ನು ಮೀರುವ ಇಮೇಜ್ ಹಾಗೂ ವಿಡಿಯೋಗಳನ್ನು ಅಂಧರೂ ಸಹ ಗುರುತಿಸಬಹುದಾಗಿದೆ.
ಫೇಸ್ ಬುಕ್ ನಲ್ಲಿ ದಿನವೊಂದಕ್ಕೆ 2 ಬಿಲಿಯನ್ ಫೋಟೊಗಳನ್ನು ಅಪ್ ಲೋಡ್ ಮಾಡಲಾಗುತ್ತದೆ. ಈ ಹಿನ್ನೆಲೆಯಲ್ಲಿ ಕೃತಕ ಬುದ್ಧಿಮತ್ತೆ ಬಳಕೆ ಮಹತ್ವ ಪಡೆಯುತ್ತದೆ ಎಂದು ಕಿಂಗ್ ಹೇಳಿದ್ದಾರೆ.