ಪ್ರತಿಭಟನೆ ನಡೆಯುತ್ತಿರುವ ವಿಷಯಕ್ಕೆ ನೈತಿಕತೆ ಆಯಾಮ ನೀಡಿದಾಗ ಜನ ಹಿಂಸಾಚಾರವನ್ನು ಅನುಮೋದಿಸುತ್ತಾರೆ. ಈ ರೀತಿಯಾಗಿ  ಸಾಮಾಜಿಕ ಜಾಲತಾಣಗಳಲ್ಲಿನ ಅತಿರೇಕದ ವರ್ತನೆಗಳು ಪ್ರತಿಭಟನೆಗಳನ್ನು ಹಿಂಸಾಚಾರಕ್ಕೆ ತಿರುಗಿಸುವ ಸಾಧ್ಯತೆ ಇದೆ ಎಂದು ಸಂಶೋಧಕರು ಹೇಳಿದ್ದಾರೆ 

ಬಾಲ್ಟಿಮೋರ್ ಮತ್ತು ಚಾರ್ಲೊಟ್ಟೆಸ್ವಿಲ್ಲೆಯಲ್ಲಿನ ಪ್ರತಿಭಟನೆಗಳು ಇದಕ್ಕೆ ತಾಜಾ ಉದಾಹರಣೆಗಳಾಗಿದ್ದು, ಜನರ ಗ್ರಹಿಕೆ ಸಾಮಾಜಿಕ ಜಾಲತಾಣದಿಂದ ಪ್ರೇರಣೆ ಪಡೆದಿರುತ್ತವೆ ಎಂದು ದಕ್ಷಿಣ ಕ್ಯಾಲಿಫೋರ್ನಿಯಾದ ವಿಶ್ವವಿದ್ಯಾನಿಲಯದ ಸಂಶೋಧಕರಾದ ಮೊರ್ಟೆಜಾ ದೆಹಘಾನಿ ಹೇಳಿದ್ದಾರೆ. 

ಯಾವುದೇ ವ್ಯಕ್ತಿ ಸಾಮಾಜಿಕ ಜಾಲತಾಣದಲ್ಲಿ ಹಂಚಿಕೊಳ್ಳುವ ತನ್ನ ನಂಬಿಕೆ ಅಥವಾ ಅಭಿಪ್ರಾಯವನ್ನು, ಒಮ್ಮತದ ಅಭಿಪ್ರಾಯ ಎಂಬಂತೆ ಸಾಮಾಜಿಕ ಜಾಲತಾಣಿಗರು ಅದನ್ನು ಗುರುತಿಸುತ್ತಾರೆ.  ಇದರಿಂದಾಗಿ ಅಪಾಯಕಾರಿ ಸನ್ನಿವೇಶಗಳು ನಿರ್ಮಾಣವಾಗುತ್ತವೆ ಎಂದು ದೆಹಘಾನಿ ಅಭಿಪ್ರಾಯಪಟ್ಟಿದ್ದಾರೆ. 

ಈ ಕುರುತಿ ಅಧ್ಯಯನ ನಡೆಸುವುದಕ್ಕಾಗಿಯೇ ಅತ್ಯಾಧುನಿಕ ಯಂತ್ರ ಕಲಿಕೆ ತಂತ್ರವನ್ನು ಬಳಕೆ ಮಾಡಲಾಗಿದ್ದು 2015 ರಲ್ಲಿ ಬಾಲ್ಟಿಮೋರ್ ಪ್ರತಿಭಟನೆ ವೇಳೆ ಮಾಡಲಾಗಿದ್ದ 18 ಮಿಲಿಯನ್ ಟ್ವೀಟ್ ಗಳನ್ನು ವಿಶ್ಲೇಷಿಸಲಾಗಿದೆ. ಮಾರಲ್ ಟ್ವೀಟ್ ಗಳು ಹಾಗೂ ಬಂಧನದ ಸಂಖ್ಯೆಗಳಿಗೂ ಇರಬಹುದಾದ ನಂಟಿನ ಬಗ್ಗೆ ನೇಚರ್ ಹ್ಯೂಮನ್ ಬಿಹೇವಿಯರ್ ಎಂಬ ಜರ್ನಲ್ ಅಧ್ಯಯನಮಾಡಿದ್ದು,  ಪ್ರತಿ ಗಂಟೆಗೆ ಬಂಧನವಾಗುತ್ತಿದ್ದವರ ಸಂಖ್ಯೆಗೂ ಆ ಹಿಂದೆ ಹಿಂಸಾಚಾರವನ್ನು ಉತ್ತೇಜಿಸುವ ಟ್ವೀಟ್ ಗಳಿಗೂ ಸಂಬಂಧವಿರುತ್ತಿತ್ತು ಎಂಬುದು ಅಧ್ಯಯನ ವರದಿ ಮೂಲಕ ತಿಳಿದುಬಂದಿದೆ. ಈ ಹಿನ್ನೆಲೆಯಲ್ಲಿ ಟ್ವಿಟರ್ ಪೋಸ್ಟ್ ಗಳಿಂದ ನಿರ್ದಿಷ್ಟ ವಿಷಯದ  ಬಗ್ಗೆ ನಡೆಯುತ್ತಿರುವ ಪ್ರತಿಭಟನೆ ಹಿಂಸಾಚಾರಕ್ಕೆ ತಿರುಗುವ ಸಾಧ್ಯತೆಯನ್ನು ತಿಳಿಯಬಹುದು ಎಂದು ಸಂಶೋಧಕರು ಅಭಿಪ್ರಾಯಪಟ್ಟಿದ್ದಾರೆ.