ಮೀರ್ಪುರ್: ಆರಂಭಿಕ ಅನುಭವಿ ಬ್ಯಾಟ್ಸ್‍ಮನ್ ತಮೀಮ್ ಇಕ್ಬಾಲ್‍ರ ಆಕರ್ಷಕ ಶತಕದ ನೆರವಿನಿಂದ ಬಾಂಗ್ಲಾದೇಶ ತಂಡ ಎರಡನೇ ಏಕದಿನ ಕ್ರಿಕೆಟ್ ಪಂದ್ಯದಲ್ಲೂ ಪಾಕಿಸ್ತಾನ ವಿರುದ್ಧ 7 ವಿಕೆಟ್‍ಗಳ ಜಯ ದಾಖಲಿಸಿದೆ.

ಆ ಮೂಲಕ ಇನ್ನೂ ಒಂದು ಪಂದ್ಯ ಉಳಿದಿರುವಂತೆಯೇ ಆತಿಥೇಯ ಬಾಂಗ್ಲಾದೇಶ ಆಟಗಾರರು ಮೂರು ಪಂದ್ಯಗಳ ಏಕದಿನ ಸರಣಿಯನ್ನು 2-0 ಮುನ್ನಡೆಯೊಂದಿಗೆ ಗೆದ್ದುಕೊಂಡಿದ್ದಾರೆ. ಶೇರೇ ಬಾಂಗ್ಲಾ ರಾಷ್ಟ್ರೀಯ ಕ್ರೀಡಾಂಗಣದಲ್ಲಿ ಭಾನುವಾರ ನಡೆದ ಪಂದ್ಯದಲ್ಲಿ ಟಾಸ್ ಗೆದ್ದು ಮೊದಲು ಬ್ಯಾಟ್ ಮಾಡಿದ ಪಾಕಿಸ್ತಾನ ನಿಗದಿತ 50 ಓವರುಗಳಲ್ಲಿ 6 ವಿಕೆಟ್ ನಷ್ಟಕ್ಕೆ 239
ರನ್‍ಗಳಿಸಿತು.

ಇದಕ್ಕೆ ಉತ್ತರವಾಗಿ ಬಾಂಗ್ಲಾದೇಶ ಇನ್ನೂ 11.5 ಓವರುಗಳು ಉಳಿದಿರುವಂತೆಯೇ ಕೇವಲ 3 ವಿಕೆಟ್ ಕಳೆದುಕೊಂಡು 240 ರನ್‍ಗಳಿಸಿ ಗೆಲವು ಸಂಪಾದಿಸಿತು. ತಮೀಮ್ ಇಕ್ಬಾಲ್ 116 ಎಸೆತಗಳಲ್ಲಿ 17 ಬೌಂಡರಿ, 1 ಸಿಕ್ಸರ್ ಸೇರಿದಂತೆ ಅಜೇಯ 116 ರನ್‍ಗಳಿಸಿ ಬಾಂಗ್ಲಾದ ಸರಣಿಗೆ ಗೆಲವಿಗೆ ನೆರವಾದರು. ತಮೀಮ್ ಪಂದ್ಯಶ್ರೇಷ್ಠ ಗೌರವಕ್ಕೂ ಪಾತ್ರರಾದರು.

ಸಂಕ್ಷಿಪ್ತ ಸ್ಕೋರ್
ಪಾಕಿಸ್ತಾನ 50 ಓವರುಗಳಲ್ಲಿ 6 ವಿಕೆಟ್‍ಗೆ 239 (ನಸೀಂ ಅಜೇಯ 77, ವಾಹಬ್ ಅಜೇಯ 51, ಹ್ಯಾರಿಸ್ 44, ಅಜರ್ 36, ಶಕೀಬ್ 51ಕ್ಕೆ2).
ಬಾಂಗ್ಲಾದೇಶ 38.1 ಓವರುಗಳಲ್ಲಿ 3 ವಿಕೆಟ್‍ಗೆ 240 (ಇಕ್ಬಾಲ್ ಅಜೇಯ 116, ಮುಷ್ತೀಕರ್ ರಹೀಂ 65, ಅಜ್ಮಲ್ 49ಕ್ಕೆ1).