ಆತನು ಅದೆಲ್ಲಿಂದಲೋ ತಂದು, ಅಕ್ಕರೆಯಿಂದ ನೆಟ್ಟು, ಪ್ರೀತಿಸಿ, ಪೋಷಿಸಿದ ಸಸ್ಯವು ಬೆಳೆದು ಹೆಮ್ಮರವಾಯಿತು. ಆದರೆ ನೆರಳು, ಹವಾ, ಹಣ್ಣುಗಳನ್ನು ನೀಡುವ ಬದಲು ಆತನ ಮೇಲೆಯೇ ಮುರಿದು ಬಿದ್ದು, ಆತನ ಸಾವಿಗೆ ಕಾರಣವಾದದ್ದು ವಿಪರ್ಯಾಸ.
ಮುಂಜಾನೆಯ ಹೊಂಬಿಸಿಲಿನಲ್ಲಿ ಶ್ರೇಷ್ಠರು ತಮ್ಮೊಳಗೆ ಯಾರೆಂಬ ತರ್ಕದಲ್ಲಿ ತೊಡಗಿದ್ದ ದಾಸವಾಳ ಹಾಗೂ ದೂರ್ಲೆ ಹಲ್ಲುಗಳನ್ನು ಪೂಜಾರಿಯು ಕೋಯ್ದು ದೇವರ ಮುಡಿಯಲ್ಲಿ ಇರಿಸಿದಾಗ ತಾವೆಲ್ಲರೂ ಸಮಾನರು ಎಂಬ ಅರಿವು ಉಂಟಾಯಿತು.
-ಅರವಿಂದ ಹೆಗಡೆ ಹೊಸ್ತೋಟ
ಭೂಮಿಯ ಮೇಲೆ ಪ್ರೀತಿಸಲು ಜನರು, ಉಪಯೋಗಿಸಲು ವಸ್ತುಗಳಿದ್ದವು. ಆದರೆ ಬಹುತೇಕ ಮಂದಿ ವಸ್ತುಗಳನ್ನು ಪ್ರೀತಿಸಿ, ಜನರನ್ನು ಉಪಯೋಗಿಸಿಕೊಳ್ಳುತ್ತಿದ್ದರು!?
ತನ್ನ ಮಗನಿಗೆ ಮಾರಣಾಂತಿಕ ಕಾಯಿಲೆಯಿರುವ ವಿಷಯವನ್ನು ಮುಚ್ಚಿಟ್ಟು ಬಡ ಸುಂದರ ಕನ್ಯೆಯೊಂದಿಗೆ ಮಗನ ಮದುವೆ ಮಾಡಿದಳು. ವಿವಾಹವಾಗಿ ಕೆಲ ದಿನಗಳು ಸಂದ ನಂತರ, ಮಗನು ಮಡಿಯಲು, ಅವನ ಸಾವಿಗೆ 'ಸೊಸೆಯ ಕಾಲ್ಗುಣ ಸರಿಯಿಲ್ಲ' ಎಂಬ ಸುದ್ದಿ ಹಬ್ಬಿಸಿದಳು!
ದಂಪತಿಗಳು ಮಕ್ಕಳಾಗದ್ದಕ್ಕೆ ವ್ಯಕ್ತಿಯೊಬ್ಬನ ಸಲಹೆಯಂತೆ, ಅದೀಗ ತಾನೆ ಮರಿ ಹಾಕಿದ್ದ ಕುರಿಯನ್ನು ತಂದು ದೇವರಿಗೆ ಹರಕೆಯಾಗಿ ಬಲಿ ಕೊಟ್ಟಿದ್ದರು!?
-ಬಸವನಗೌಡ ಹೆಬ್ಬಳಗೆರೆ, ಚನ್ನಗಿರಿ