ಸುಖದುಃಖಗಳನ್ನು ಪರಸ್ಪರ ಸಮನಾಗಿ ಹಂಚಿಕೊಳ್ಳೋಣವೆಂದು ಆ ಪ್ರೇಮಿಗಳು ಆಣೆ-ಪ್ರಮಾಣ ಮಾಡಿದ್ದರು. ಮತ್ತು ಅಂತೆಯೇ ನಡೆದುಕೊಂಡರು. ಸಿರಿವಂತನನ್ನು ಮದುವೆಯಾಗಿ ಅವಳು ತನ್ನ ಪಾಲಿನ ಸುಖವನ್ನು ಕೊಂಡೊಯ್ದಳು ಮತ್ತು ಜನ್ಮಪೂರ್ತಿ ಆಗುವಷ್ಟು ದುಃಖವನ್ನು ಈತನ ಪಾಲಿಗೆ ಬಿಟ್ಟುಹೋದಳು!
ಪ್ರತಿಯೊಂದು ಓಟಿಗೂ ಸಾವಿರಾರು ರೂ.ಗಳನ್ನು 'ಜನರಿಗಾಗಿ' ಹಂಚಿದ. ಗೆದ್ದು ಬಂದು ಮಂತ್ರಿಯೂ ಆದ. ಮುಂದೆ ಸರ್ಕಾರದ ಉಚಿತ ಸವಲತ್ತುಗಳನ್ನು ದೊರಕಿಸಿಕೊಡಲು ಅದೇ 'ಜನರಿಂದ' ಲಕ್ಷಾಂತರ ರೂ.ಗಳನ್ನು ವಸೂಲಿ ಮಾಡಿದ. "ಜನರಿಂದ, ಜನರಿಗಾಗಿ ಇರುವುದೇ ಪ್ರಜಾಪ್ರಭುತ್ವ" ಎಂಬ ವ್ಯಾಖ್ಯೆಯು ಪಕಪಕ ನಗುತ್ತಿತ್ತು!
ಮನೆಗೆ ಹೊಸ ಕಾರು ಬಂದ ಖುಷಿಯಲ್ಲಿ ಸಾರಾಯಿ ಅಂಗಡಿ ಮಾಲೀಕನ ಕುಟುಂಬ ಸಂಭ್ರಮಿಸುತ್ತಿತ್ತು. ಅದೇ ಬೀದಿಯ ಕೊನೆಯ ಮನೆಯೊಂದು, ಕುಡಿತಕ್ಕೆ ಬಲಿಯಾಗಿ ಕುಟುಂಬದ ಹಿರಿ ಜೀವವನ್ನೇ ಕಳೆದುಕೊಂಡ ಸೂತಕದಲ್ಲಿತ್ತು.
ಆತ್ಮಹತ್ಯೆ ಮಾಡಿಕೊಳ್ಳಲೆಂದು ರೈಲು ಕಂಬಿಯ ಮೇಲೆ ತಲೆಯಿಟ್ಟು ಮಲಗಿದ್ದ ಈತ, ಪಕ್ಕದ ಹಳಿಯಲ್ಲಿ ಇದೇ ಪ್ರಯತ್ನದಲ್ಲಿದ್ದ ಸುಂದರ ಯುವತಿಯನ್ನು ನೋಡಿದ. ಅವರದೀಗ ಸುಖೀ ಸಂಸಾರ.
ಆ ಪ್ರೇಮಿಗಳು ಎಷ್ಟೇ ಗೋಗರೆದರೂ ಹುಡುಗಿಯ ತಂದೆ ತಾಯಿ ಅವರ ಮದುವೆಗೆ ಒಪ್ಪಲಿಲ್ಲ. ಬಡವನೆಂಬ ಕಾರಣಕ್ಕೆ ಹುಡುಗನನ್ನು ಓದ್ದೋಡಿಸಿದರು. ಕೆಲದಿನಗಳ ತರುವಾಯ ಅವರೇ ಆ ಯುವಕನಲ್ಲಿ ಹೋಗಿ, ತಮ್ಮ ಮಗಳನ್ನು ಮದುವೆಯಾಗೆಂದು ಕಾಲು ಹಿಡಿದರು. ಮೂರು ವರ್ಷದ ಪ್ರೀತಿಯಿಂದ ಸಾಧ್ಯವಾಗದ್ದು, ಮಗಳ ಹೊಟ್ಟೆಯಲ್ಲಿ ಬೆಳೆಯುತ್ತಿರುವ ಮೂರು ತಿಂಗಳ ಮಗುವಿನಿಂದ ಸಾಧ್ಯವಾಗಿತ್ತು!
-ಸಂತೋಷಕುಮಾರ್ ಸಂಪಗಾವಿ, ಬೆಳಗಾವಿ