ನೀವು ಬಯಸುವ ಸೌಂದರ್ಯ ಬ್ಯೂಟಿಪಾರ್ಲರ್‌ನೊಳಗೆಲ್ಲೋ ಖಂಡಿತಾ ಇಲ್ಲ. ಅದು ನಿಮ್ಮ ಮನೆಯ ಅಡುಗೆ ಕೋಣೆಯಲ್ಲಿಯೇ ಅಡಗಿ ಕುಳಿತಿದೆ. ಸಾವಿರಾರು ಹಣ ನೀಡಿ ಫೇಶಿಯಲ್ ಮಾಡಿಕೊಳ್ಳುವ ಬದಲು ಸುಲಭವಾಗಿ ದೊರೆಯುವ ವಸ್ತುಗಳಿಂದ ನಿಮ್ಮ ಸೌಂದರ್ಯಕ್ಕೆ ಇನ್ನಷ್ಟು ಮೆರುಗು ನೀಡಬಹುದು.

• ಸಾಧ್ಯವಾದಷ್ಟು ಮಟ್ಟಿಗೆ ಮುಖಕ್ಕೆ ಸಾಬೂನಿನ ಬಳಕೆ ಕಡಿಮೆಮಾಡಿ. ಸಾಬೂನು ಇಲ್ಲದೇ ನಡೆಯುವುದೇ ಇಲ್ಲವೆಂದರೆ, ಉತ್ತಮ ಗುಣಮಟ್ಟದ ಸಾಬೂನನ್ನು ಬಳಸಿ.
• ಗುಲಾಬಿ ಜಲ ಹಾಗೂ ಹಾಲಿನಲ್ಲಿ ಲಿಂಬೆರಸ ಮಿಶ್ರಣ ಮಾಡಿ ತ್ವಚೆಯ ಮೇಲೆ ಕೈಗಳಿಂದ ಸೌಮ್ಯವಾಗಿ ಮಸಾಜ್ ಮಾಡಿಕೊಳ್ಳಿ. ಇದರಿಂದ ನಿಮ್ಮ ತ್ವಚೆಗೆ ಹೊಳಪು ಬರುವುದು.
• ಮೊಸರಿಗೆ ಅರಿಶಿನ, ಕಡಲೆಹಿಟ್ಟು ಹಾಗೂ ಎರಡು ಹನಿ ಗುಲಾಬಿ ಜಲ ಸೇರಿಸಿ ಪೇಸ್ಟ್ ತಯಾರಿಸಿ ಇದನ್ನು ಮುಖ, ಕುತ್ತಿಗೆಗೆ ಹಚ್ಚಿ ಒಣಗಲು ಬಿಡಿ. 15 ನಿಮಿಷದ ನಂತರ ತಣ್ಣನೆಯ ನೀರಿನಿಂದ ತೊಳೆದುಕೊಳ್ಳಿ. ತ್ವಚೆಗೆ ಮೆರುಗು ಬರುವುದು.
• ಗುಲಾಬಿ ಜಲದಲ್ಲಿ ಅರ್ಧ ಕಪ್ ಮುಲ್ತಾನಿ ಮಣ್ಣನ್ನು ಸೇರಿಸಿ ದಟ್ಟ ಪೇಸ್ಟ್ ತಯಾರಿಸಿ. ಇದನ್ನು ಮುಖ, ಕುತ್ತಿಗೆ, ಕೈಗಳಿಗೆ ಹಚ್ಚಿಕೊಳ್ಳಿ. 15 ನಿಮಿಷದ ನಂತರ ಸಾಧಾರಣ ಬಿಸಿ ನೀರಿನಿಂದ ತೊಳೆದುಕೊಳ್ಳಿ.
• ನಿಮ್ಮದು ಎಣ್ಣೆಚರ್ಮವಾಗಿದ್ದರೆ ಗುಲಾಬಿ ಜಲ ಮತ್ತು ಗ್ಲಿಸರಿನ್‌ನಲ್ಲಿ ಕಿತ್ತಳೆ ಸಿಪ್ಪೆಯ ಚೂರ್ಣ ಹಾಕಿ. ಇದನ್ನು ಮುಖಕ್ಕೆ ಲೇಪಿಸಿ ನಿಧಾನವಾಗಿ ಮಸಾಜ್ ಮಾಡಿ. ಹತ್ತು ನಿಮಿಷಗಳ ಬಳಿಕ ಒರೆಸಿಕೊಳ್ಳಿ.
• ಜೇನು ತುಪ್ಪ, ಒಂದು ಲಿಂಬೆಹಣ್ಣಿನ ರಸವನ್ನು ಮಿಶ್ರಣ ಮಾಡಿ ಈ ಮಿಶ್ರಣವನ್ನು ಹಚ್ಚಿಕೊಳ್ಳುವುದರಿಂದ ಸುಕ್ಕುಗಳು ನಿವಾರಣೆಯಾಗುತ್ತವೆ.
• ಮುಖದ ಮೇಲೆ ಸುಕ್ಕು ಇದ್ದರೆ, ಅವುಗಳ ನಿವಾರಣೆಗೆ ಸೌತೆರಸ ಹಾಗೂ ನಿಂಬೆರಸ ಸಮಾನ ಪ್ರಮಾಣದಲ್ಲಿ ತಗೆದುಕೊಂಡು ಅದರಲ್ಲಿ ಒಂದು ಚಿಟಿಕೆಯಷ್ಟು ಅರಿಶಿನ ಪುಡಿ ಸೇರಿಸಿ ಈ ಮಿಶ್ರಣವನ್ನು ಸುಕ್ಕು ಇರುವ ಭಾಗಕ್ಕೆ ಹಚ್ಚಿ ನಿಧಾನವಾಗಿ ಮಸಾಜ್ ಮಾಡಿಕೊಳ್ಳಿ. ನಂತರ ತಣ್ಣೀರಿನಿಂದ ಮುಖ ತೊಳೆದುಕೊಳ್ಳಿ.
• ನಿಮ್ಮ ಕೂದಲಿಗೆ ದಟ್ಟ ಕಪ್ಪು ಹಾಗೂ ಇನ್ನಷ್ಟು ಹೊಳಪು ಬರುವಂತೆ ಮಾಡಬೇಕೆ? ಹಾಗಾದರೆ ಒಣಗಿದ ನೆಲ್ಲಿಕಾಯಿಗಳನ್ನು ಪುಡಿ ಮಾಡಿ ಅದರಲ್ಲಿ ನಿಂಬೆರಸ ಸೇರಿಸಿ ನಿತ್ಯ ಕೂದಲಿಗೆ ಹಚ್ಚಿಕೊಳ್ಳಿ.