ಟೋಕಿಯೋ: ಜಪಾನ್ ನ ಪೂರ್ವ ಕರಾವಳಿ ಭಾಗದಲ್ಲಿ ಶುಕ್ರವಾರ ಪ್ರಬಲ ಭೂಕಂಪನ ಸಂಭವಿಸಿದ್ದು, ರಿಕ್ಟರ್ ಮಾಪಕದಲ್ಲಿ 6.4ರಷ್ಟು ತೀವ್ರತೆ ದಾಖಲಾಗಿದೆ.

ಪೂರ್ವ ಜಪಾನ್ ನ ಕಟ್ಸೂರಾ ನಗರದಲ್ಲಿ ಬೆಳಗ್ಗೆ ಸುಮಾರು 9.14ರ ವೇಳೆಯಲ್ಲಿ ಭೂಕಂಪನ ಸಂಭವಿಸಿದ್ದು, ರಿಕ್ಟರ್ ಮಾಪಕದಲ್ಲಿ 6.4ರಷ್ಟು ತೀವ್ರತೆ ದಾಖಲಾಗಿದೆ ಎಂದು ತಿಳಿದುಬಂದಿದೆ.  ಭೂಕಂಪನ ಬಳಿಕ ಸಂಭವಿಸಿದ ಉಪಕಂಪನ ಕೂಡ ಪ್ರಬಲವಾಗಿದ್ದು, 6.5ರಷ್ಟು ತೀವ್ರತೆ ದಾಖಲಾಗಿದೆ ಎಂದು ಜಪಾನ್ ಹವಮಾನ ಇಲಾಖೆ ಹೇಳಿದೆ. ಆದರೆ ಈ ಪ್ರಬಲ ಕಂಪನದಿಂದ  ಸುನಾಮಿ ಭೀತಿ ಇಲ್ಲ ಎಂದು ಸ್ಪಷ್ಟಪಡಿಸಿರುವ ಇಲಾಖೆ, ಉಪಕಂಪನಗಳಿಂದ ಭೀತಿಗೊಳ್ಳುವ ಅವಶ್ಯಕತೆ ಇಲ್ಲ ಎಂದು ಹೇಳಿದೆ.

ಇನ್ನು ಭೂಕಂಪನದಿಂದಾಗಿ ಕಟ್ಸೂರಾ ನಗರದ ಕೆಲ ಬಹುಮಹಡಿ ಕಟ್ಟಡಗಳಿಗೆ ಹಾನಿಯಾದ ಕುರಿತು ಮಾಹಿತಿ ಕೇಳಿಬಂದಿದೆಯಾದರೂ, ಸಾವು-ನೋವಿನ ಕುರಿತು ಯಾವುದೇ ರೀತಿಯ  ವರದಿಗಳು ಬಂದಿಲ್ಲ.

ಇದೇ ಜಪಾನ್ ಈಶಾನ್ಯ ಕರಾವಳಿಯಲ್ಲಿ 2011ರ ಮಾರ್ಚ್ ನಲ್ಲಿ ಸಂಭವಿಸಿದ ಪ್ರಬಲ ಭೂಕಂಪದಿಂದಾಗಿ ಸಂಭವಿಸಿದ ಸುನಾಮಿಯಿಂದಾಗಿ ಸುಮಾರು 18 ಸಾವಿರಕ್ಕೂ ಅಧಿಕ ಮಂದಿ ಸಾವನ್ನಪ್ಪಿದ್ದರು.