ಟೆಹ್ರಾನ್: ಹಾರ್ಮೊಜ್ ಜಲಸಂಧಿ ತೆರೆಯುವಂತೆ ಆಗ್ರಹಿಸಿ ಇರಾನ್ ಗೆ ಅಶ್ಲೀಲ ಶಬ್ದಗಳಿಂದ ನಿಂದಿಸಿದ್ದ ಅಮೆರಿಕ ಅಧ್ಯಕ್ಷರ ಸಾಮಾಜಿಕ ಜಾಲತಾಣ ಪೋಸ್ಟ್ ಬೆನ್ನಲ್ಲೇ ಇರಾನ್ ತಿರುಗೇಟು ನೀಡಿದೆ.
ಅಮೆರಿಕದ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಇಂದು ಅಶ್ಲೀಲ ಪದಗಳಿಂದ ಕೂಡಿದ ಸಾಮಾಜಿಕ ಜಾಲತಾಣದ ಪೋಸ್ಟ್ನಲ್ಲಿ, ಇರಾನ್ ಹೋರ್ಮುಜ್ ಜಲಸಂಧಿಯನ್ನು ಮರುತೆರೆಯದಿದ್ದರೆ ಅಲ್ಲಿನ ವಿದ್ಯುತ್ ಸ್ಥಾವರಗಳು ಮತ್ತು ಸೇತುವೆಗಳ ಮೇಲೆ ದಾಳಿ ನಡೆಸುವುದಾಗಿ ಬೆದರಿಕೆ ಹಾಕಿದ್ದರು. ಈ ಹೇಳಿಕೆಗೆ ವಿಶ್ವದಾದ್ಯಂತ ಇರುವ ಇರಾನ್ ರಾಯಭಾರ ಕಚೇರಿಗಳು ತೀಕ್ಷ್ಣ ವ್ಯಂಗ್ಯ ಮತ್ತು ಟೀಕೆಯಿಂದ ಪ್ರತಿಕ್ರಿಯಿಸಿವೆ.
ಟ್ರಂಪ್, “ಅದ್ಭುತ” ಎಂದು ವರ್ಣಿಸಿದ ಕಾರ್ಯಾಚರಣೆಯಲ್ಲಿ ಅಮೆರಿಕದ ಯುದ್ಧವಿಮಾನ ಪೈಲಟ್ರನ್ನು ರಕ್ಷಿಸಲಾಗಿದೆ ಎಂದು ಘೋಷಿಸಿದ ನಂತರ, ತನ್ನದೇ ಸ್ವಾಮ್ಯದ ‘ಟ್ರೂತ್ ಸೋಶಿಯಲ್’ ವೇದಿಕೆಯಲ್ಲಿ ಈ ಬೆದರಿಕೆ ಹಾಕಿದ್ದರು. “ಮಂಗಳವಾರ ಇರಾನ್ನಲ್ಲಿ ‘ಪವರ್ ಪ್ಲಾಂಟ್ ಡೇ’ ಮತ್ತು ‘ಬ್ರಿಡ್ಜ್ ಡೇ’ ಒಂದೇ ದಿನ. ಇಂಥದ್ದನ್ನು ಯಾರೂ ನೋಡಿರಲ್ಲ!!! ಆ ಶಾಪದ ಹೋರ್ಮುಜ್ ಜಲಸಂಧಿಯನ್ನು ತೆರೆಯಿರಿ, ಇಲ್ಲದಿದ್ದರೆ ನರಕದಲ್ಲಿ ಬದುಕಬೇಕಾಗುತ್ತದೆ! ಅಲ್ಲಾಹುವನ್ನು ಪ್ರಾರ್ಥಿಸಿ ಸ್ತುತಿ,” ಎಂದು ಟ್ರಂಪ್ ಅಶ್ಲೀಲ ಶಬ್ದಗಳಿಂದ ಬರೆದಿದ್ದರು.
ಇದಾದ ಕೆಲವೇ ಹೊತ್ತಿನಲ್ಲಿ, ಇರಾನ್ ಅಮೆರಿಕ ಉಲ್ಲೇಖಿಸಿದ್ದ ರಕ್ಷಣಾ ಕಾರ್ಯಾಚರಣೆಯನ್ನು “ವಿಫಲಗೊಳಿಸಿದ್ದೇವೆ” ಎಂದು ಹೇಳಿ, ಹಲವಾರು ವಿಮಾನಗಳ ಅವಶೇಷಗಳಂತೆ ಕಾಣುವ ಚಿತ್ರಗಳನ್ನು ಹಂಚಿಕೊಂಡಿತ್ತು. ಆದರೆ ಅಮೆರಿಕ ಪಡೆಗಳು ತಮ್ಮ ಪೈಲಟ್ರನ್ನು ಹೊರತೆಗೆದಿರುವುದನ್ನು ನೇರವಾಗಿ ತಳ್ಳಿಹಾಕಲಿಲ್ಲ.
ಅಮೆರಿಕಾಗೆ ತನ್ನ ನೆಲದಲ್ಲಿ ಉಂಟಾಗಿದ್ದ ಹಳೆಯ ಸೋಲು ನೆನಪಿಸಿದ ಇರಾನ್
ಇರಾನ್, ಅಮೆರಿಕದ ವಿಶೇಷ ಪಡೆಗಳು ಇರಾನ್ನಲ್ಲಿದ್ದ ಅಮೆರಿಕ ಸಿಬ್ಬಂದಿಯನ್ನು ರಕ್ಷಿಸಲು ನಡೆಸಿದ ‘ಆಪರೇಶನ್ ಈಗಲ್ ಕ್ಲಾ’ ಎಂಬ ಮಿಷನ್ನ್ನು ಅಮೆರಿಕಗೆ ನೆನಪಿಸಿದೆ. ಆ ಕಾರ್ಯಾಚರಣೆ ಸಂಪೂರ್ಣ ವಿಫಲವಾಗಿತ್ತು. “ಇತಿಹಾಸ ಪುನರಾವರ್ತಿತವಾಗಿದೆ. ಟಾಬಾಸ್ ಮರುಭೂಮಿಯಲ್ಲಿ ನಡೆದ ಆಪರೇಶನ್ ಈಗಲ್ ಕ್ಲಾ – ಇರಾನ್ನಲ್ಲಿ ಅಮೆರಿಕ ಸೇನೆಯ ಐತಿಹಾಸಿಕ ಸೋಲು. ಏಪ್ರಿಲ್ 24, 1980,” ಎಂದು ಇರಾನ್ ರಾಯಭಾರ ಕಚೇರಿ X ನಲ್ಲಿ ಪೋಸ್ಟ್ ಮಾಡಿದೆ.
ಆಪರೇಷನ್ ಈಗಲ್ ಕ್ಲಾ ಏಪ್ರಿಲ್ 24-25, 1980 ರಂದು ಟೆಹ್ರಾನ್ನಲ್ಲಿ ಒತ್ತೆಯಾಳುಗಳಾಗಿದ್ದ 52 ಅಮೇರಿಕನ್ ರಾಯಭಾರ ಕಚೇರಿಯ ಸಿಬ್ಬಂದಿಯನ್ನು ರಕ್ಷಿಸುವ ಉದ್ದೇಶದಿಂದ ನಡೆಸಲಾದ ವಿಫಲ ಯುಎಸ್ ಮಿಲಿಟರಿ ಕಾರ್ಯಾಚರಣೆಯಾಗಿತ್ತು. ಇರಾನ್ ಒತ್ತೆಯಾಳು ಬಿಕ್ಕಟ್ಟಿನ ಸಂದರ್ಭದಲ್ಲಿ ಅಧ್ಯಕ್ಷ ಜಿಮ್ಮಿ ಕಾರ್ಟರ್ ಅವರ ಆದೇಶದಂತೆ, ಬಹು ತಾಂತ್ರಿಕ ವೈಫಲ್ಯಗಳ ನಂತರ ಡೆಸರ್ಟ್ ಒನ್ ಎಂಬ ದೂರದ ವೇದಿಕೆಯ ಸ್ಥಳದಲ್ಲಿ ಕಾರ್ಯಾಚರಣೆಯನ್ನು ಸ್ಥಗಿತಗೊಳಿಸಲಾಗಿತ್ತು.
ಈಗ ಅಮೆರಿಕಾಗೆ ಇರಾನ್ ತನ್ನ ನೆಲದಲ್ಲಿ ಉಂಟಾಗಿದ್ದ ಹಳೆಯ ಸೋಲನ್ನು ನೆನಪಿಸುವ ಮೂಲಕ ವ್ಯಂಗ್ಯವಾಡಿದೆ. ಇರಾನ್ನ ಖಾತಮ್ ಅಲ್-ಅಂಬಿಯಾ ಕೇಂದ್ರ ಕಮಾಂಡ್ ವಕ್ತಾರರು, ಅಮೆರಿಕ ಸೇನೆಯದ್ದು “ಎಂದು ಕರೆಯಲ್ಪಡುವ ರಕ್ಷಣಾ ಕಾರ್ಯಾಚರಣೆ” ಯನ್ನು, “ದಕ್ಷಿಣ ಇಸ್ಫಹಾನ್ನ ಬಿಕೋ ಎಯರ್ಫೀಲ್ಡ್ನಲ್ಲಿ ಪತನಗೊಂಡ ವಿಮಾನದ ಪೈಲಟ್ ನ್ನು ರಕ್ಷಿಸುವ ನೆಪದಲ್ಲಿ ರೂಪಿಸಲಾದ ಮೋಸಪೂರಿತ ಮಿಷನ್” ಎಂದು ವಿವರಿಸಿದ್ದಾರೆ.
ಇರಾನ್ ಸಶಸ್ತ್ರ ಪಡೆಗಳು ಸಮಯಕ್ಕೆ ತಕ್ಕಂತೆ ತಲುಪಿದ ಪರಿಣಾಮ, ಆಪರೇಷನ್ ಈಗಲ್ ಕ್ಲಾ ಯೋಜನೆ “ಸಂಪೂರ್ಣ ವಿಫಲವಾಗಿತ್ತು” ಎಂದು ಅವರು ಹೇಳಿದರು. ಟ್ರಂಪ್ ಅವರ ಸಹಾಯಕ ಕರೋಲೈನ್ ಲೆವಿಟ್ ಅಮೆರಿಕ ಸೈನಿಕರನ್ನು ಹೊಗಳಿ “ಗರ್ವ” ವ್ಯಕ್ತಪಡಿಸಿದ X ಪೋಸ್ಟ್ಗೆ ಇರಾನ್ ಕೂಡ ತೀವ್ರ ಪ್ರತಿಕ್ರಿಯೆ ನೀಡಿದೆ.
ಟ್ರಂಪ್ ತಮ್ಮ ಸೇನೆಯ ಸಾಧನೆಯ ಬಗ್ಗೆ ಬೆನ್ನುತಟ್ಟಿಕೊಂಡಿದ್ದರ ಬಗ್ಗೆ ವ್ಯಂಗ್ಯವಾಡಿರುವ ಇರಾನ್, ಇಷ್ಟೇ ಏಕೆ “ಮಿನಾಬ್ ಶಾಲೆಯ ಮಕ್ಕಳನ್ನು ಕೊಂದಿರುವುದು. ಆಸ್ಪತ್ರೆಗಳು ಮತ್ತು ವಿಶ್ವವಿದ್ಯಾಲಯಗಳ ಮೇಲೆ ದಾಳಿ ಮಾಡಿದ್ದು. ಗಾಜಾದಲ್ಲಿ ಇಸ್ರೇಲ್ ನಡೆಸುತ್ತಿರುವ ಜನಾಂಗಹತ್ಯೆಗೆ ಬೆಂಬಲ ನೀಡುತ್ತಿರುವುದು, ಎಪ್ಸ್ಟೀನ್ ಪ್ರಕರಣಗಳ ಬಗ್ಗೆಯೂ ಗರ್ವ ವ್ಯಕ್ತಪಡಿಸಿ ಎಂದು ಟ್ರಂಪ್ ಗೆ ತಿವಿದಿದೆ.
ಇರಾನ್, ತೈಲ ಮತ್ತು ಅನಿಲ ಸಾಗಣೆಗೆ ಅತ್ಯಂತ ಮಹತ್ವದ ಮಾರ್ಗವಾಗಿರುವ ಹೋರ್ಮುಜ್ ಜಲಸಂಧಿಯನ್ನು ತಡೆದು, ಇಸ್ರೇಲ್ ಮತ್ತು ಅದರ ಗಲ್ಫ್ ನೆರೆಹೊರೆಯ ದೇಶಗಳ ಮೇಲೆ ದಾಳಿಗಳನ್ನು ನಡೆಸಿದೆ. ಹೋರ್ಮುಜ್ ಮೂಲಕ ಸಾಗುವ ನೌಕಾ ಸಂಚಾರವನ್ನು ಉಸಿರುಗಟ್ಟಿಸುವ ಕ್ರಮವನ್ನು ನಿಲ್ಲಿಸಲು ಟ್ರಂಪ್ ಎಚ್ಚರಿಕೆ ನೀಡಿದ್ದಾರೆ.
ಟ್ರಂಪ್ ಬೆದರಿಕೆಗಳ ಬಗ್ಗೆ ತೆಹ್ರಾನ್ನ ಅನೇಕ ನಿವಾಸಿಗಳು ನಿರ್ಲಕ್ಷ್ಯ ತೋರಿದಂತೆ ಕಂಡುಬಂದಿದೆ. ನಗರದ ಪಶ್ಚಿಮ ಭಾಗದಲ್ಲಿರುವ ದೊಡ್ಡ ಉದ್ಯಾನವನದಲ್ಲಿ ಯುವ ಇರಾನಿಯರ ಒಂದು ಗುಂಪು ಪಿಕ್ನಿಕ್ ಆನಂದಿಸುತ್ತಿರುವುದು ಈಗ ಎಲ್ಲೆಡೆ ವೈರಲ್ ಆಗತೊಡಗಿದೆ. ಇರಾನ್ ಸೇನೆ ನಾಲ್ಕು ಅಮೆರಿಕನ್ ವಿಮಾನಗಳನ್ನು ತಾವು ಹೊಡೆದುರುಳಿಸಿದ್ದೇವೆ ಎಂದು ಹೇಳಿದೆ. ದಕ್ಷಿಣ ಇಸ್ಫಹಾನ್ ಪ್ರಾಂತ್ಯದಲ್ಲಿರುವ ಬಿಟ್ಟುಹೋಗಿದ್ದ ವಿಮಾನ ನಿಲ್ದಾಣವೊಂದನ್ನು ಈ ಕಾರ್ಯಾಚರಣೆಗೆ ಬಳಸಲಾಗಿದೆ ಎಂದು ಅದು ಆರೋಪಿಸಿದೆ. ದಾಳಿಗಳ ವೇಳೆ ಐವರು ಸಾವನ್ನಪ್ಪಿದ್ದಾರೆ ಎಂದು ಇರಾನಿನ ಮಾಧ್ಯಮಗಳು ವರದಿ ಮಾಡಿವೆ. ಇರಾನ್ನ ಇಸ್ಲಾಮಿಕ್ ರೆವಲ್ಯೂಷನರಿ ಗಾರ್ಡ್ ಕಾರ್ಪ್ಸ್ ಬಿಡುಗಡೆ ಮಾಡಿದ ದೃಶ್ಯಗಳಲ್ಲಿ, ಮರುಭೂಮಿ ಪ್ರದೇಶವೊಂದರಲ್ಲಿ ಚದುರಿದ ಅಮೆರಿಕನ್ ವಿಮಾನದ ಸುಟ್ಟ ಅವಶೇಷಗಳು, ಇನ್ನೂ ಹೊಗೆಯುತ್ತಿರುವ ಸ್ಥಿತಿಯಲ್ಲಿ ಕಾಣಿಸುತ್ತಿವೆ.
ಇಂದು ಮತ್ತೆ ಇರಾನ್ ಗಲ್ಫ್ ಪ್ರದೇಶದ ಪ್ರಮುಖ ಮೂಲಸೌಕರ್ಯಗಳ ಮೇಲೆ ದಾಳಿ ನಡೆಸಿದ್ದು, ಯುನೈಟೆಡ್ ಅರಬ್ ಎಮಿರೇಟ್ಸ್, ಬಹ್ರೇನ್ ಮತ್ತು ಕುವೈತ್ನ ನಾಗರಿಕ ಸೌಲಭ್ಯಗಳಿಗೆ ಹಾನಿಯಾದ ಬಗ್ಗೆ ವರದಿಯಾಗಿದೆ. ಇರಾನ್ ಪರ ಸಶಸ್ತ್ರ ಗುಂಪುಗಳು ಇರಾಕ್ನಲ್ಲಿರುವ ಅಮೆರಿಕದ ರಾಜತಾಂತ್ರಿಕ ಕೇಂದ್ರಗಳ ಮೇಲೆ ಕಳೆದ ರಾತ್ರಿ ಎರಡು ದಾಳಿಗಳನ್ನು ನಡೆಸಿವೆ ಎಂದು ಬಗ್ದಾದ್ನ ಅಮೆರಿಕ ರಾಯಭಾರಿ ಕಚೇರಿ ತಿಳಿಸಿದೆ.
ಮತ್ತೊಂದು, ಇರಾನ್ ಬೆಂಬಲಿತ ಹಿಜ್ಬುಲ್ಲಾ ಸಂಘಟನೆ ಇಸ್ರೇಲ್ನ್ನು ಗುರಿಯಾಗಿಸಲು ಆರಂಭಿಸಿದ ನಂತರ ಲೆಬನಾನ್ ಕ್ರಮೇಣ ಈ ಸಂಘರ್ಷಕ್ಕೆ ಇನ್ನಷ್ಟು ಎಳೆಯಲ್ಪಟ್ಟಿದೆ. ಇದಕ್ಕೆ ಪ್ರತಿಯಾಗಿ ಇಸ್ರೇಲ್ ದಾಳಿ ನಡೆಸಿ ತನ್ನ ಭೂಸೇನೆಯನ್ನು ದಕ್ಷಿಣ ಲೆಬನಾನ್ ಒಳಗೆ ಕಳುಹಿಸಿದೆ. ದಕ್ಷಿಣ ಲೆಬನಾನ್ನ ಕ್ಫರ್ ಹಟ್ಟಾ ಪ್ರದೇಶದ ಮೇಲೆ ಇಸ್ರೇಲ್ ನಡೆಸಿದ ದಾಳಿಯಲ್ಲಿ ಸ್ಥಳಾಂತರಗೊಳ್ಳಲು ಕಾಯುತ್ತಿದ್ದ ಆರು ಮಂದಿ ಕುಟುಂಬ ಸದಸ್ಯರು ಹಾಗೂ ಅವರನ್ನು ಕರೆದುಕೊಂಡು ಹೋಗಲು ಬಂದಿದ್ದ ಮತ್ತೊಬ್ಬ ಸಂಬಂಧಿ ಸಾವನ್ನಪ್ಪಿದ್ದಾರೆ ಎಂದು ಎಎಫ್ಪಿ ವರದಿ ಮಾಡಿದೆ.
ದಕ್ಷಿಣ ಬೈರೂತ್ ಮೇಲೆ ನಡೆದ ಮತ್ತೊಂದು ಇಸ್ರೇಲಿ ದಾಳಿಯಲ್ಲಿ ಕನಿಷ್ಠ ನಾಲ್ವರು ಮೃತಪಟ್ಟಿದ್ದಾರೆ ಎಂದು ಲೆಬನಾನ್ ಆರೋಗ್ಯ ಸಚಿವಾಲಯ ತಿಳಿಸಿದೆ. ಇರಾನ್ ವಿದೇಶಾಂಗ ಸಚಿವ ಅಬ್ಬಾಸ್ ಅರಘ್ಚಿ, ದಕ್ಷಿಣ ಕರಾವಳಿಯ ಬುಶೆಹರ್ ಅಣು ವಿದ್ಯುತ್ ಸ್ಥಾವರದ ಮೇಲೆ ದಾಳಿಗಳು ಮುಂದುವರಿದರೆ, ಅಂತಿಮವಾಗಿ ಕಿರಣೋತ್ಪಾತದ ಪರಿಣಾಮ ಉಂಟಾಗಿ “ತೆಹ್ರಾನ್ ಅಲ್ಲ, ಗಲ್ಫ್ ಸಹಕಾರ ಮಂಡಳಿ (ಜಿಸಿಸಿ) ದೇಶಗಳ ರಾಜಧಾನಿಗಳಲ್ಲೇ ಜೀವದ ಅಂತ್ಯವಾಗಬಹುದು” ಎಂದು ಎಚ್ಚರಿಸಿದ್ದಾರೆ. ಬುಶೆಹರ್, ಇರಾನ್ ರಾಜಧಾನಿ ತೆಹ್ರಾನ್ಗಿಂತ ಕುವೈತ್, ಬಹ್ರೇನ್ ಮತ್ತು ಖತರ್ಗೆ ಭೌಗೋಳಿಕವಾಗಿ ಹೆಚ್ಚು ಸಮೀಪದಲ್ಲಿದೆ.