ನವದೆಹಲಿ: ಬಾಲಿವುಡ್ ಭಾಯ್ಜಾನ್ ಸಲ್ಮಾನ್ ಖಾನ್, ಫೋರ್ಬ್ಸ್ ಇಂಡಿಯಾ ೧೦೦ ಜನರ ತಾರಾಪಟ್ಟಿಯಲ್ಲಿ ಮೊದಲ ಸ್ಥಾನ ಪಡೆದುಕೊಂಡಿದ್ದಾರೆ. ಇವರ ಒಟ್ಟು ಆದಾಯವನ್ನು ೨೭೦.೩೩ ಕೋಟಿ ಎಂದು ಅಂದಾಜಿಸಲಾಗಿದೆ.
ಈ ಸ್ಥಾನದಿಂದ ಅವರು ಸಹನಟ ಶಾರುಖ್ ಖಾನ್ ಅವರನ್ನು ಎರಡನೇ ಸ್ಥಾನಕ್ಕೆ ತಳ್ಳಿದ್ದಾರೆ. ಶಾರುಖ್ ಅವರ ಒಟ್ಟು ಆದಾಯ ೨೨೧.೭೫ ಕೋಟಿ ಎಂದು ಅಂದಾಜಿಸಲಾಗಿದೆ. ಇದು ಬಾಕ್ಸ್ ಆಫಿಸ್, ಜಾಹಿರಾತು ಪ್ರಚಾರದಿಂದ ಪಡೆದ ಆದಾಯ.
೧೩೩.೪೪ ಕೋಟಿ ಆದಾಯದೊಂದಿಗೆ ಭಾರತದ ಟೆಸ್ಟ್ ಕ್ರಿಕೆಟ್ ಕ್ಯಾಪ್ಟನ್ ವಿರಾಟ್ ಕೊಹ್ಲಿ ಮೂರನೇ ಸ್ಥಾನದಲ್ಲಿದ್ದರೆ, ೧೨೨.೪೮ ಕೋಟಿ ಆದಾಯದೊಂದಿಗೆ ಒಂದಿ ದಿನ ಕ್ರಿಕೆಟ್ ಕ್ಯಾಪ್ಟನ್ ಮಹೇಂದರ್ ಸಿಂಗ್ ಧೋನಿ ಐದನೇ ಸ್ಥಾನ ಅಲಂಕರಿಸಿದ್ದಾರೆ.
ಮೊದಲ ೧೦ ಸ್ಥಾನಗಳಲ್ಲಿರುವ ಇತರ ತಾರೆಯರೆಂದರೆ ಅಕ್ಷಯ್ ಕುಮಾರ್ (೪), ದೀಪಿಕಾ ಪಡುಕೋಣೆ (೬), ಸಚಿನ್ ತೆಂಡೂಲ್ಕರ್ (೭), ಪ್ರಿಯಾಂಕಾ ಚೋಪ್ರಾ (೮). ಅಮಿತಾಬ್ ಬಚ್ಚನ್ (೯) ಮತ್ತು ಹೃತಿಕ್ ರೋಷನ್ (೧೦).
