ಬ್ರಿಟನ್ ನಲ್ಲಿ 'ಪದ್ಮಾವತಿ' ಬಿಡುಗಡೆಗೆ ಬ್ರಿಟಿಷ್ ಸೆನ್ಸಾರ್ ಮಂಡಳಿ ಅಸ್ತು

ಲಂದನ್: 'ಪದ್ಮಾವತಿ' ಚಿತ್ರ ವಿವಾದದಿಂದಾಗಿ ಭಾರತದಲ್ಲಿ ಚಲನಚಿತ್ರದ ಬಿಡುಗಡೆ ಮುಂದೂಡಿದ್ದರೂ, ಬ್ರಿಟಿಷ್ ಬೋರ್ಡ್ ಆಫ್ ಫಿಲ್ಮ್ ಕ್ಲಾಸಿಫಿಕೇಷನ್ (ಬಿಬಿಎಫ್ ಸಿ) ಬ್ರಿಟನ್ ನಲ್ಲಿ ಚಿತ್ರ ಬಿಡುಗಡೆಗೆ ಅನುಮತಿ ನೀಡಿದೆ. ಬಿಬಿಎಫ್ ಸಿ ಭಾರತೀಯ ಚಿತ್ರಕ್ಕೆ 12A ಸರ್ಟಿಫಿಕೇಟ್ ನೀಡಿದೆ. ಸಂಜಯ್ ಲೀಲಾ ಬನ್ಸಾಲಿ ನಿರ್ದೇಶನದ  'ಪದ್ಮಾವತಿ' ಬ್ರಿಟನ್ ನಲ್ಲಿ ಡಿಸೆಂಬರ್ 1 ರಂದು ಬಿಡುಗಡೆಯಾಗಲು ಅಲ್ಲಿನ ಸೆನ್ಸಾರ್ ಸಮಿತಿ  ಅನುಮೋದನೆ ನೀಡಿದೆ.

ಬಿಬಿಎಫ್ ಸಿ ಜಾಲತಾಣದ ಮಾಹಿತಿಯಂತೆ 'ಪದ್ಮಾವತಿ' ಚಿತ್ರದ ಯಾವ ದೃಶ್ಯಕ್ಕೂ ಕತ್ತರಿ ಹಾಕದೆ ಪೂರ್ಣ ಚಿತ್ರವನ್ನು ಪ್ರದರ್ಶಿಸಲು ಆನುಮತಿ ದೊರಕಿದೆ.

ಇದೇ ವೇಳೆ ಭಾರತದಲ್ಲಿ ಡಿ.1ರಂದು ಬಿಡುಗಡೆಗೊಳ್ಳಬೇಕಿದ್ದ 'ಪದ್ಮಾವತಿ' ಚಿತ್ರಕ್ಕೆ ಸಿಬಿಎಫ್ಸಿ ಇದುವರೆಗೆ  ಸೆನ್ಸಾರ್‌ ಸರ್ಟಿಫಿಕೇಟ್‌ ನೀಡಿಲ್ಲ. ಸೆನ್ಸಾರ್‌ ಮಂಡಳಿ ಸದಸ್ಯರು ಈ ಚಿತ್ರವನ್ನಿನ್ನೂ ವಿಕ್ಷಿಸಿಲ್ಲ, ಇನ್ನು ಒಂದು ವೇಳೆ ಸೆನ್ಸಾರ್ ಸರ್ಟಿಫಿಕೇಟ್ ನೀಡಿದರೂ ಸಹ  ಚಿತ್ರ ಬಿಡುಗಡೆಗೆ ಅವಕಾಶ ನೀಡುವುದಿಲ್ಲ ಎಂದು ರಜಪೂತ್‌ ಸಂಘಟನೆಗಳು ಹೇಳಿದೆ.