'ಪ್ರಧಾನಿ ಮೋದಿ ಅಷ್ಟು ದುರ್ಬಲ ಎಂದು ಭಾವಿಸಬೇಡಿ': ಇಂತಹ ಸಣ್ಣ ಕಾರ್ಯಕ್ರಮಕ್ಕೆ ಕೇಂದ್ರ ಸರ್ಕಾರ ಬೆದರಲ್ಲ; ನಟ ಶೇಖರ್ ಸುಮನ್

ನಟ ಹಾಗೂ ದೂರದರ್ಶನ ನಿರೂಪಕ ಶೇಖರ್ ಸುಮನ್ ಅವರು ತಮ್ಮ ಯೂಟ್ಯೂಬ್ ಕಾರ್ಯಕ್ರಮ 'ಶೇಖರ್ ಟುನೈಟ್' (Shekhar Tonite) ಕುರಿತಾದ ಊಹಾಪೋಹಗಳಿಗೆ ಪ್ರತಿಕ್ರಿಯಿಸಿದ್ದು, ಈ ಕಾರ್ಯಕ್ರಮವು ಕೇಂದ್ರದ ಬಿಜೆಪಿ ನೇತೃತ್ವದ ಸರ್ಕಾರವನ್ನು ಗುರಿಯಾಗಿಸಿಕೊಂಡಿದೆ ಎಂಬುದು ತಪ್ಪು ಕಲ್ಪನೆ ಎಂದು ಹೇಳಿದ್ದಾರೆ.

ಇತ್ತೀಚಿನ ಸಂದರ್ಶನವೊಂದರಲ್ಲಿ, ತಮ್ಮ ಟೀಕೆಗಳು ಅಥವಾ ವಿಶ್ಲೇಷಣೆಯು ಯಾವುದೇ ನಿರ್ದಿಷ್ಟ ರಾಜಕೀಯ ಪಕ್ಷದ ಬದಲಾಗಿ ವ್ಯವಸ್ಥೆಯಲ್ಲಿನ ಲೋಪದೋಷಗಳತ್ತ ಗಮನಹರಿಸುತ್ತವೆ. ಅಲ್ಲದೆ, ಪ್ರಧಾನಿ ನರೇಂದ್ರ ಮೋದಿ ಅಥವಾ ಅವರ ಸರ್ಕಾರವು ಈ ಕಾರ್ಯಕ್ರಮದಿಂದ ಯಾವುದೇ ರೀತಿಯಲ್ಲಿ ಬೆದರಿಕೆಯನ್ನು ಅನುಭವಿಸುತ್ತದೆ ಎಂದು ತಮಗೆ ಅನಿಸುವುದಿಲ್ಲ ಎಂದೂ ಅವರು ತಿಳಿಸಿದ್ದಾರೆ.

ಯಾವ ಪಕ್ಷ ಅಧಿಕಾರದಲ್ಲಿದೆ ಎಂಬುದನ್ನು ಲೆಕ್ಕಿಸದೆ, ರಾಜಕೀಯ ವ್ಯಂಗ್ಯದ ಕುರಿತಾದ ತಮ್ಮ ಧೋರಣೆಯು ವರ್ಷಗಳಿಂದಲೂ ಸ್ಥಿರವಾಗಿದೆ ಎಂದು ಸುಮನ್ ವಿವರಿಸಿದರು. 'ದಿ ಲಲ್ಲನ್‌ಟಾಪ್' (The Lallantop) ಜೊತೆಗಿನ ಸಂದರ್ಶನವೊಂದರಲ್ಲಿ ಸರ್ಕಾರವನ್ನು ತರಗತಿಯ ಮೇಲ್ವಿಚಾರಕನಿಗೆ (ಕ್ಲಾಸ್ ಮಾನಿಟರ್) ಹೋಲಿಸಿದ ಅವರು, 'ತರಗತಿಯ ಮೇಲ್ವಿಚಾರಕನಿಂದ ಏನಾದರೂ ಲೋಪವಾದರೆ ವಿದ್ಯಾರ್ಥಿಗಳು ಆತಂಕಗೊಂಡು ಆತನನ್ನು ಹೊಣೆಗಾರನನ್ನಾಗಿ ಮಾಡುತ್ತಾರೆ, ಅಲ್ಲವೇ? ಆ ಮೇಲ್ವಿಚಾರಕ ಯಾರು ಎಂಬುದು ಮುಖ್ಯವಲ್ಲ. ಅಧಿಕಾರದಲ್ಲಿರುವವರು ತಮ್ಮ ಕೃತ್ಯಗಳಿಗೆ ಹೊಣೆಗಾರರಾಗಿರಬೇಕು ಎಂಬುದನ್ನು ಒತ್ತಿಹೇಳಿದರು.

ವ್ಯಂಗ್ಯದ ಕುರಿತಾದ ತಮ್ಮ ದೀರ್ಘಕಾಲೀನ ಧೋರಣೆಗೆ ಉದಾಹರಣೆಯಾಗಿ, ತಮ್ಮ ಹಿಂದಿನ ದೂರದರ್ಶನ ಕಾರ್ಯಕ್ರಮ 'ಮೂವರ್ಸ್ ಅಂಡ್ ಶೇಕರ್ಸ್' (Movers & Shakers) ಅನ್ನು ಉಲ್ಲೇಖಿಸಿದರು; ಈ ಕಾರ್ಯಕ್ರಮ ಮೊದಲು 1997ರಲ್ಲಿ ಕೇಂದ್ರದಲ್ಲಿ ಬಿಜೆಪಿ ಅಧಿಕಾರದಲ್ಲಿದ್ದಾಗ ಪ್ರಸಾರವಾಗಿತ್ತು ಮತ್ತು ನಂತರ 2012ರಲ್ಲಿ ಕಾಂಗ್ರೆಸ್ ನೇತೃತ್ವದ ಸರ್ಕಾರದ ಅವಧಿಯಲ್ಲಿ ಮರುಪ್ರಾರಂಭಗೊಂಡಿತ್ತು.

'ಹಿಂದೆ ನಾವು ಪ್ರಧಾನಿ ಅಟಲ್ ಬಿಹಾರಿ ವಾಜಪೇಯಿ ಅವರ ಬಗ್ಗೆ ಹೇಗೆ ವ್ಯಂಗ್ಯವಾಡುತ್ತಿದ್ದೆವೋ, ಹಾಗೆಯೇ ಪ್ರಧಾನಿ ಮನಮೋಹನ್ ಸಿಂಗ್ ಅವರ ಬಗ್ಗೆಯೂ ವ್ಯಂಗ್ಯವಾಡುತ್ತಿದ್ದೆವು. ನಾವು ಯಾವುದೇ ವ್ಯಕ್ತಿ ಅಥವಾ ಸರ್ಕಾರದ ಬಗ್ಗೆ ಅಲ್ಲ, ಬದಲಾಗಿ ಒಟ್ಟಾರೆ ವ್ಯವಸ್ಥೆಯ ಬಗ್ಗೆ ಪ್ರತಿಕ್ರಿಯಿಸುತ್ತೇವೆ. ವ್ಯವಸ್ಥೆಯನ್ನು ಮುನ್ನಡೆಸಲು ನೀವು ಯಾರನ್ನಾದರೂ ಆಯ್ಕೆ ಮಾಡಿದಾಗ, ಅವರು ದಾರಿ ತಪ್ಪಿದರೆ ಅದನ್ನು ಅವರಿಗೆ ತಿಳಿಸಬೇಕಾಗುತ್ತದೆ. ಹಾಗಾಗಿ ಇದು ಯಾರ ವಿರುದ್ಧವೂ ಅಲ್ಲ, ಬದಲಾಗಿ ಜನರ ಪರವಾಗಿದೆ. ನಾವು ಕೇವಲ ಜನರನ್ನು ಪ್ರತಿನಿಧಿಸುತ್ತಿದ್ದೇವೆ ಮತ್ತು ಅವರ ಧ್ವನಿಯನ್ನು ಪ್ರಬಲಗೊಳಿಸುತ್ತಿದ್ದೇವೆ. ಭವಿಷ್ಯದಲ್ಲಿ ಬೇರೆಯವರು ಅಧಿಕಾರದಲ್ಲಿದ್ದಾಗಲೂ ನಾವು ಇದನ್ನೇ ಮುಂದುವರಿಸುತ್ತೇವೆ' ಎಂದು ಹೇಳಿದರು.

ಪ್ರಧಾನಿ ನರೇಂದ್ರ ಮೋದಿ ಹಾಗೂ ಕಾಂಗ್ರೆಸ್ ನಾಯಕ ಹಾಗೂ ವಿರೋಧ ಪಕ್ಷದ ನಾಯಕ ರಾಹುಲ್ ಗಾಂಧಿ ಅವರ ಬಗ್ಗೆ ತಮಗೆ ಅಪಾರ ಗೌರವವಿದೆಯಾದರೂ, 'ಏನಾದರೂ ತಪ್ಪಾದಾಗ, ಅದರ ವಿರುದ್ಧ ಧ್ವನಿ ಎತ್ತುವುದು ಸಮಂಜಸವಾಗುತ್ತದೆ' ಎಂದರು.

ಮೋದಿಯವರನ್ನು ಟೀಕಿಸುವ ಸಾಮಾಜಿಕ ಜಾಲತಾಣದ ವಿಡಿಯೋಗಳನ್ನು ತೆಗೆದುಹಾಕಲಾಗುತ್ತಿದೆ ಎಂಬ ಕಳವಳಗಳಿಗೆ ಪ್ರತಿಕ್ರಿಯಿಸಿದ ಸುಮನ್, ಅಂತಹ ಘಟನೆಗಳು ನಡೆಯುತ್ತವೆ ಎಂಬುದನ್ನು ಒಪ್ಪಿಕೊಂಡರಾದರೂ, ಮೂಲ ಸಮಸ್ಯೆ ವ್ಯವಸ್ಥೆಯಲ್ಲಿದೆ. 'ಇದು ನಡೆಯುತ್ತಿದೆ, ನಡೆಯುತ್ತಲೇ ಇದೆ. ಇದಕ್ಕಾಗಿ ನೀವು ಯಾವುದೇ ಒಬ್ಬ ವ್ಯಕ್ತಿಯನ್ನು ಹೊಣೆಗಾರರನ್ನಾಗಿ ಮಾಡಲು ಸಾಧ್ಯವಿಲ್ಲ, ಆದರೆ ವ್ಯವಸ್ಥೆಯಲ್ಲಿ ಎಲ್ಲೋ ಲೋಪವಿದೆ. ಮುಂಚೂಣಿಯಲ್ಲಿರುವವರು ಕೇವಲ ಮುಖಗಳು ಅಷ್ಟೇ; ಆದರೆ ಅಲ್ಲಿ ಹೊಣೆಗಾರಿಕೆ ಇರಲೇಬೇಕು' ಎಂದು ಹೇಳಿದರು.

ತಮ್ಮ ಟೀಕೆಗಳನ್ನು ಮೃದುಗೊಳಿಸುವಂತೆ ಅಥವಾ ಕಾರ್ಯಕ್ರಮವನ್ನು ನಿಲ್ಲಿಸುವಂತೆ ಬಿಜೆಪಿ ನೇತೃತ್ವದ ಸರ್ಕಾರದಿಂದ ಯಾವುದೇ ಕರೆ ಬಂದಿದೆ ಎಂಬುದನ್ನು ನಿರಾಕರಿಸಿದ ಅವರು, ಹಲವು ರಾಜಕಾರಣಿಗಳು ಕಾರ್ಯಕ್ರಮದ ಬಗ್ಗೆ ಮೆಚ್ಚುಗೆ ವ್ಯಕ್ತಪಡಿಸಲು ತಮ್ಮನ್ನು ಸಂಪರ್ಕಿಸಿದ್ದರು ಎಂದು ಅವರು ಹೇಳಿದರು.

'ಇಂತಹ ಸಣ್ಣ ಕಾರ್ಯಕ್ರಮವೊಂದಕ್ಕಾಗಿ ನನ್ನನ್ನು ಸಂಪರ್ಕಿಸುವಷ್ಟು ಪ್ರಧಾನಿ ಮೋದಿ ಅವರ ಸರ್ಕಾರ ದುರ್ಬಲವಾಗಿದೆ ಎಂದು ನಾನು ಭಾವಿಸುವುದಿಲ್ಲ. ಅವರು ಅತ್ಯಂತ ಪ್ರಭಾವಶಾಲಿ ವ್ಯಕ್ತಿ. ಜಗತ್ತಿನಲ್ಲಿ ಅವರ ಗಮನವನ್ನು ಹೆಚ್ಚು ಬಯಸುವಂತಹ ಅನೇಕ ವಿಷಯಗಳು ನಡೆಯುತ್ತಿವೆ. 'ಶೇಖರ್ ಟುನೈಟ್' (Shekhar Tonite) ಹೊರತಾಗಿಯೂ ಜಗತ್ತಿನಲ್ಲಿ ಇತರ ದುಃಖ-ದುಮ್ಮಾನಗಳಿವೆ' ಎಂದು ಅವರು ಫೈಜ್ ಅಹ್ಮದ್ ಫೈಜ್ ಅವರ 'ಮುಜ್ಸೆ ಪಹ್ಲಿ ಸಿ ಮೊಹಬ್ಬತ್ ಮೇರೆ ಮೆಹಬೂಬ್ ನಾ ಮಾಂಗ್' (Mujhse Pehli Si Mohabbat Mere Mehboob Na Maang) ಕವಿತೆಯ ಸಾಲೊಂದನ್ನು ಉಲ್ಲೇಖಿಸುತ್ತಾ ಹೇಳಿದರು.

ಯೂಟ್ಯೂಬ್‌ನಲ್ಲಿ ‘ಶೇಖರ್ ಟುನೈಟ್’ (Shekhar Tonite) ಕಾರ್ಯಕ್ರಮದ ಮೊದಲ ಸಂಚಿಕೆ ಪ್ರಸಾರವಾದಾಗ, ಅದರ ಎರಡನೇ ಸಂಚಿಕೆ ಎಂದಿಗೂ ಬರುವುದಿಲ್ಲ ಎಂದು ಅನೇಕ ವೀಕ್ಷಕರು ಭವಿಷ್ಯ ನುಡಿದಿದ್ದನ್ನು ಸುಮನ್ ನೆನಪಿಸಿಕೊಂಡರು.

'ಏಕೆ? ಯಾರು ಇದನ್ನು ತಡೆಯುತ್ತಾರೆ? ಪ್ರಧಾನಿ ಮೋದಿಯವರೇ? ತಮ್ಮನ್ನು ಟೀಕಿಸುವುದನ್ನು ತಾವು ಇಷ್ಟಪಡುವುದಾಗಿ ಸ್ವತಃ ಹಲವು ಬಾರಿ ಹೇಳಿದ್ದಾರೆ. ಹಾಗಾಗಿ, ನಾವು ಅದನ್ನೇ ಆಧಾರವಾಗಿಟ್ಟುಕೊಂಡೆವು. ಅವರಿಗೆ ಹಾಸ್ಯಪ್ರಜ್ಞೆ ಇದೆ ಮತ್ತು ಅವರು ಇದನ್ನು ಅತಿಯಾಗಿ ಗಂಭೀರವಾಗಿ ಪರಿಗಣಿಸುವುದಿಲ್ಲ ಎಂದು ನಾನು ಭಾವಿಸುತ್ತೇನೆ. ಇದು ಪ್ರಜಾಪ್ರಭುತ್ವದ ಹಾಗೂ ನನ್ನ ವೃತ್ತಿಯ ಒಂದು ಭಾಗ. ನಾವು ಹೇಳುತ್ತಿರುವುದು ಮನರಂಜನೆ ಮತ್ತು ವ್ಯಂಗ್ಯದ ಚೌಕಟ್ಟಿನಲ್ಲಿಯೇ ಹೊರತು ಬೇರೇನಲ್ಲ. ಆದ್ದರಿಂದ, ಸರ್ಕಾರ ಆತಂಕಪಡಲು ಯಾವುದೇ ಕಾರಣವಿಲ್ಲ. ನನ್ನ ಕಾರ್ಯಕ್ರಮ ಅಷ್ಟೇನೂ ಮಹತ್ವದ್ದೇನಲ್ಲ' ಎಂದು ಅವರು ಹೇಳಿದರು.