ಖ್ಯಾತ ಗಾಯಕಿ ಆಶಾ ಭೋಸ್ಲೆ ಹಿರಿಯ ಪುತ್ರ ಹೇಮಂತ್ ನಿಧನ

ನವದೆಹಲಿ: ಖ್ಯಾತ ಗಾಯಕಿ ಆಶಾ ಭೋಸ್ಲೆ ಅವರ ಹಿರಿಯ ಪುತ್ರ ಹೇಮಂತ್ ಅವರು ಸೋಮವಾರ ನಿಧನರಾಗಿದ್ದಾರೆ ಎಂದು ತಿಳಿದುಬಂದಿದೆ.

ದೀರ್ಘಕಾಲದಿಂದ ಕ್ಯಾನ್ಸರ್ ಗೆ ತುತ್ತಾಗಿ ಸ್ಕಾಟ್ ಲೆಂಡ್ ನಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದ 66 ವರ್ಷದ ಹೇಮಂತ್ ಚಿಕಿತ್ಸೆ ಫಲಿಸದೇ ಸೋಮವಾರ ನಿಧನರಾಗಿದ್ದಾರೆ ಎಂದು ಕುಟುಂಬದ ಮೂಲಗಳ  ತಿಳಿಸಿವೆ. ವಿಪರ್ಯಾಸವೆಂದರೆ ಆಶಾ ಭೋಸ್ಲೆ ಅವರ ಹಿರಿಯ ಸಹೋದರಿ ಖ್ಯಾತ ಗಾಯಕಿ ಲತಾ ಮಂಗೇಶ್ಕರ್ ಅವರ 86ನೇ ಜನ್ಮದಿನದಂದೇ ಹೇಮಂತ್ ಇಹಲೋಕ ತ್ಯಜಿಸಿದ್ದಾರೆ.

ಬಹುಮುಖ ಪ್ರತಿಭೆಯಾಗಿದ್ದ ಹೇಮಂತ್ ಸಂಗೀತ ಸಂಯೋಜಕರಾಗಿದ್ದರು. ಅಲ್ಲದೆ ಸುಮಾರು 15 ಚಿತ್ರಗಳಿಗೆ ಸಂಗೀತ ಸಂಯೋಜನೆ ಮಾಡಿದ್ದಾರೆ. ‘ದಾಮಾದ್’ ಚಿತ್ರದಲ್ಲಿ ಅವರು ಸಂಗೀತ  ನೀಡಿದ್ದ ‘ಜಾಗೆ ಜಾಗೆ ನೈನೋ ಮೇ’ ಅವರಿಗೆ ಚಿತ್ರರಂಗದಲ್ಲಿ ಖ್ಯಾತಿ ತಂದು ಕೊಟ್ಟಿತ್ತು. ಅಲ್ಲದೇ ಮರಾಠಿ ಭಾಷೆಯಲ್ಲಿ ಆಶಾ ಭೋಸ್ಲೆ ಹಾಡಿದ ಹಲವಾರು ಟಾಪ್‌ ಹಾಡುಗಳಿಗೆ ಅವರು ಸಂಗೀತ   ಸಂಯೋಜನೆ ಮಾಡಿದ್ದರು.