ನಾಲ್ಕು ಭಾಷೆಗಳಲ್ಲಿ 'ಚೌಕ' ರಿಮೇಕ್

ಬೆಂಗಳೂರು: ತರುಣ್ ಸುಧೀರ್ ಚೊಚ್ಚಲ ನಿರ್ದೇಶನದ 'ಚೌಕ' ಈ ವಾರ ಯಶಸ್ವಿ ೫೦ ದಿನಗಳ ಪ್ರದರ್ಶನ ಪೂರೈಸಲಿದೆ. ಈ ಮಧ್ಯೆ ಈ ಸಿನೆಮಾ ನಾಲ್ಕು ಭಾಷೆಗಳಲ್ಲಿ ರಿಮೇಕ್ ಆಗುತ್ತಿದ್ದು ಚಿತ್ರತಂಡದ ಹರ್ಷವನ್ನು ಇಮ್ಮಡಿಗೊಳಿಸಿದೆ. 

ಈ ಸಿನೆಮಾದ ತಮಿಳು ಮತ್ತು ತೆಲುಗು ರಿಮೇಕ್ ಹಕ್ಕುಗಳನ್ನು ಮಾರಾಟ ಮಾಡಲಾಗಿದ್ದು, ಬೆಂಗಾಲಿ ಮತ್ತು ಮರಾಠಿ ನಿರ್ಮಾಪಕರು ಕೂಡ ಆಸಕ್ತಿ ತೋರಿದ್ದಾರಂತೆ. 

ಈ ವಿಷಯವನ್ನು ಧೃಢೀಕರಿಸುವ ಚಿತ್ರನಿರ್ದೇಶಕ ತರುಣ್ "ಎಲ್ಲ ಮಾತುಕತೆಗಳು ಅಂತಿಮಗೊಂಡಾಗ ಅಧಿಕೃತ ಘೋಷಣೆ ಮಾಡಲಾಗುವುದು" ಎನ್ನುತ್ತಾರೆ. 

ದ್ವಾರಕೀಶ್ ಪಿಕ್ಚರ್ಸ್ ನಿರ್ಮಾಣ ಸಂಸ್ಥೆಯ ೫೦ ನೆಯ ಚಿತ್ರ 'ಚೌಕ'ದಲ್ಲಿ ಐವರು ಹೀರೋಗಳು ಮತ್ತು ಹೀರೋಯಿನ್ ಗಳು ನಟಿಸಿದರೆ ನಟ ದರ್ಶನ್ ವಿಶೇಷ ಪಾತ್ರದಲ್ಲಿ ಕಾಣಿಸಿಕೊಂಡಿದ್ದಾರೆ. ಹಾಗೆಯೇ ಈ ಸಿನೆಮಾ ೨೫ ತಂತ್ರಜ್ಞರನ್ನು ಒಟ್ಟಿಗೆ ತಂದಿರುವುದು ವಿಶೇಷ.