'ಸಲಾಂ ರಾಕಿಂಗ್ ಭಾಯ್': ಕೆಜಿಎಫ್ ಚಿತ್ರದ ಮೊದಲ ಲಿರಿಕಲ್ ಸಾಂಗ್ ರಿಲೀಸ್!

ಬೆಂಗಳೂರು: ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹು ನಿರೀಕ್ಷಿತ ಚಿತ್ರ ಕೆಜಿಎಫ್ ಬಿಡುಗಡೆಗೆ ಸಜ್ಜಾಗಿರುವಂತೆಯೇ ಚಿತ್ರದ ತಂಡ ಚಿತ್ರದ ಮೊದಲ ಹಾಡನ್ನು ಬಿಡುಗಡೆ ಮಾಡಿದ್ದು, ಅಭಿಮಾನಿಗಳಲ್ಲಿ ಮತ್ತಷ್ಟು ಕ್ರೇಜ್ ಹೆಚ್ಚಾಗುವಂತೆ ಮಾಡಿದೆ.

ಟ್ವಿಟರ್ ನಲ್ಲಿ ನಟ ಯಶ್ ಚಿತ್ರದ 'ಸಲಾಂ ರಾಕಿಂಗ್ ಭಾಯ್' ಎಂಬ ಲಿರಿಕಲ್ ಹಾಡನನ್ನು ಬಿಡುಗಡೆ ಮಾಡಿದ್ದು, ಈ ಮಾಸ್ ಸಾಂಗ್ ಯಶ್ ಅಭಿಮಾನಿಗಳ ಹುಚ್ಚೆಬ್ಬಿಸಿದೆ. ಹಾಡು ಬಿಡುಗಡೆಯಾದ ಕೆಲವೇ ಗಂಟೆಗಳಲ್ಲಿ ಬರೊಬ್ಬರಿ ಸುಮಾರು 4 ಲಕ್ಷದ 0 ಸಾವಿರ ಮಂದಿ ಈ ಹಾಡನ್ನು ಕೇಳಿದ್ದಾರೆ.

ಕನ್ನಡ ಮಾತ್ರವಲ್ಲದೆ ಒಟ್ಟು ಭಾಷೆಯಲ್ಲಿ ಚಿತ್ರ ಬಿಡುಗಡೆಯಾಗುತ್ತಿದ್ದು, ಇಂದು ಬಿಡುಗಡೆಯಾದ ಲಿರಿಕಲ್ ಸಾಂಗ್ ಕೂಡ ಕನ್ನಡ ಮಾತ್ರವಲ್ಲದೇ ತಮಿಳು, ತೆಲುಗು ಮತ್ತು ಮಲಯಾಳಂ ನಲ್ಲಿ ಬಿಡುಗಡೆಯಾಗಿದೆ. ಲಹರಿ ಮ್ಯೂಸಿಕ್ಸ್ ಚಿತ್ರದ ಹಾಡಿನ ಹಕ್ಕು ಪಡೆದುಕೊಂಡಿದ್ದು, ಲಹರಿ ಮ್ಯೂಸಿಕ್ ಯೂಟ್ಯೂಬ್ ಖಾತೆಯಲ್ಲಿ ಹಾಡನ್ನು ಬಿಡುಗಡೆ ಮಾಡಲಾಗಿದೆ.

ಇನ್ನು ತಮಿಳು ವರ್ಷನ್ ಸಾಂಗ್ ಅನ್ನು ಸುಮಾರು 51 ಸಾವಿರ ಮಂದಿ ವೀಕ್ಷಣೆ ಮಾಡಿದ್ದು, ತೆಲುಗು ವರ್ಷನ್ ಸಾಂಗ್ ಅನ್ನು 1 ಲಕ್ಷಕ್ಕೂ ಅಧಿಕ ಮಂದಿ ವೀಕ್ಷಣೆ ಮಾಡಿದ್ದಾರೆ. ಆದರೆ ಮಲಯಾಳಂ ವರ್ಷನ್ ಸಾಂಗ್ ಗೆ ತಾಂತ್ರಿಕ ದೋಷ ಎದುರಾದಂತಿದೆ. ನಟ ಯಶ್ ಅವರು ಶೇರ್ ಮಾಡಿರುವ ಮಲಯಾಳಂ ವರ್ಷನ್ ಸಾಂಗ್ ಪ್ಲೇ ಆಗುತ್ತಿಲ್ಲ.