ಬೆಂಗಳೂರಿನಲ್ಲಿ 'ಕೆಜಿಎಫ್' ಹವಾ: ಮುಂಜಾನೆ 4 ಗಂಟೆಗೇ ಮೊದಲ ಶೋ

ಬೆಂಗಳೂರು: ರಾಕಿಂಗ್ ಸ್ಟಾರ್ ಯಶ್ ಅಭಿನಯದ ಬಹು ನಿರೀಕ್ಷಿತ ಚಿತ್ರ ಕೆಜಿಎಫ್ ಚಿತ್ರ ಬಿಡುಗಡೆಯಾಗಿದ್ದು ಕರ್ನಾಟಕದಾದ್ಯಂತ ಸುಮಾರು 350ಕ್ಕೂ ಅಧಿಕ ಚಿತ್ರ ಮಂದಿರಗಳಲ್ಲಿ ಚಿತ್ರ ಬಿಡುಗಡೆಯಾಗಿದೆ.

ಚಿತ್ರ ವೀಕ್ಷಣೆಗಾಗಿ ಮಧ್ಯರಾತ್ರಿಯಿಂದಲೇ ಥಿಯೇಟರ್ ಗಳತ್ತ ಅಭಿಮಾನಿಗಳು ಧಾವಿಸುತ್ತಿದ್ದು, ಸಿಲಿಕಾನ್ ಸಿಟಿ ಬೆಂಗಳೂರಿನ ಊರ್ವಶಿ ಥಿಯೇಟರ್‍ ನಲ್ಲಿ 4 ಗಂಟೆಗೆ ಶೋ ಶುರುವಾಗಿದೆ. ಅಲ್ಲದೇ ಪಟಾಕಿ ಸಿಡಿಸಿ ರಾಕಿಭಾಯ್‍ಗೆ ಅದ್ಧೂರಿ ಸ್ವಾಗತ ಕೋರಿದ್ದಾರೆ. ಗೌಡನಪಾಳ್ಯದ ಶ್ರೀನಿವಾಸ್ ಥಿಯೇಟರ್‍ ನಲ್ಲಿ ರಾತ್ರಿಯಿಂದಲೇ ಅಭಿಮಾನಿಗಳು ಜಮಾಯಿಸಿದ್ದು, ಕುಣಿದು ಕುಪ್ಪಳಿಸಿ, ಕಟೌಟ್ ಮುಂದೆ ತೆಂಗಿನ ಕಾಯಿ ಒಡೆದು ತಮ್ಮ ನೆಚ್ಚಿನ ನಟನ ಚಿತ್ರವನ್ನು ಸ್ವಾಗತಿಸಿದ್ದಾರೆ.

ಅಂತೆಯೇ ನಗರದ ವೀರೇಶ್ ಥಿಯೇಟರ್ ನಲ್ಲಿ ಬೆಳಗ್ಗೆ 6.15 ರಿಂದ ಸಿನಿಮಾ ಪ್ರದರ್ಶನ ಆರಂಭವಾಗಿದೆ. ಮಂಡ್ಯ, ಮೈಸೂರಿನಿಂಂದ ರಾತ್ರಿಯೇ ಬಂದು ಮೆಜೆಸ್ಟಿಕ್ ನ ನರ್ತಕಿ ಮುಂದೆಯೂ ಅಭಿಮಾನಿಗಳು ಚಳಿಯನ್ನೂ ಲೆಕ್ಕಿಸದೇ ಚಿತ್ರ ವೀಕ್ಷಣೆಗೆ ಕಾದು ಕುಳಿತಿದ್ದರು. ಅಲ್ಲದೇ ಸಲಾಂ ರಾಕಿ ಭಾಯ್ ಅಂತಾ ಘೋಷಣೆ ಕೂಗಿದ್ದಾರೆ. ಈ ದಿನದ ಪ್ರತೀ ಪ್ರದರ್ಶನದ ಟಿಕೆಟ್ ಸೋಲ್ಡ್ ಔಟ್ ಆಗಿದ್ದು, ಇಂದು ಮಾತ್ರವಲ್ಲ ವಾರಂತ್ಯವಾದ ನಾಳೆ ಮತ್ತು ಭಾನುವಾರದ ಎಲ್ಲ ಟಿಕೆಟ್ ಗಳು ಸೋಲ್ಡ್ ಔಟ್ ಆಗಿವೆ.

ನವರಂಗ್ ಚಿತ್ರಮಂದಿರದಲ್ಲಿ 6 ಗಂಟೆಗೆ ಕೆಜಿಎಫ್ ಸಿನಿಮಾ ನೋಡಲು ಥಿಯೇಟರ್ ಎದುರು ಅಭಿಮಾನಿಗಳ ದಂಡು ಆಗಮಿಸಿದ್ದು, ಯಶ್ ಪೋಸ್ಟರ್ ಗೆ ಹಾಲಿನ ಅಭಿಷೇಕ ಮಾಡುವ ಮೂಲಕ ಅಭಿಮಾನಿಗಳು ಸಂಭ್ರಮಿಸಿದ್ದಾರೆ. ಮೆಜಿಸ್ಟಿಕ್ ನಲ್ಲಿರುವ ಭೂಮಿಕಾ ಚಿತ್ರಮಂದಿರದಲ್ಲಿ 7 ಗಂಟೆಗೆ ಶೋ ಆರಂಭವಾಗಿದ್ದು, ಇಲ್ಲಿ ಚಿತ್ರಮಂದಿರದಲ್ಲಿ ಕೆಜಿಎಫ್ 3 ಶೋ ತೆಲುಗು ಹಾಗೂ 3 ಶೋ ಹಿಂದಿ ವರ್ಷನ್ ಪ್ರದರ್ಶನ ಮಾಡಲಾಗಿದೆ.

ಕೆಜಿಎಫ್ ಸಿನಿಮಾವನ್ನು ಥಿಯೇಟರ್‍ಗೇ ಹೋಗಿ ನೋಡುವಂತೆ ರಾಕಿಂಗ್ ಸ್ಟಾರ್ ಯಶ್ ಮನವಿ ಮಾಡಿದ್ದಾರೆ. ಗುರುವಾರ ಇನ್ ಸ್ಟಾಗ್ರಾಂಗೆ ವಿಡಿಯೋ ಹಾಕಿರುವ ಯಶ್, ನಮ್ಮ ಇಷ್ಟು ದಿನದ ಪರಿಶ್ರಮ ತೆರೆ ಮೇಲೆ ಬರ್ತಿದೆ. ಎಲ್ರೂ ನೋಡಿ ಅಂತ ಹೇಳಿದ್ದಾರೆ.