ಭದ್ರವಿದ್ದರೆ ಕುಡಿಕೆ ವಿದೇಶಿ ಪೌರತ್ವದಲ್ಲೂ ಮಾಡಬಹದು ಹೂಡಿಕೆ!

1. ಬ್ರೆಕ್ಸಿಟ್ ನಂತರ ಜಗತ್ತಿನ ವಿತ್ತ ಪ್ರಪಂಚ ಕುಸಿಯುವ ಸಾಧ್ಯತೆ ದಟ್ಟವಾಗಿದೆ. ಚರಿತ್ರೆಯ ಪ್ರಕಾರ ಬ್ರಿಟನ್ ಮತ್ತು ಅಮೇರಿಕಾ ಆರ್ಥಿಕವಾಗಿ ಕುಸಿದಾಗೆಲ್ಲ ಅವರು ಯಾವುದಾರೊಂದು ದೇಶದ ಮೇಲೆ ಕಾಲುಕೆರೆದು ಯುದ್ಧ ಮಾಡುತ್ತಾರೆ. ಜಗತ್ತಿನಲ್ಲಿ ಅಶಾಂತಿ ಮತ್ತು ಅಸ್ಥಿರತೆಯನ್ನ ಸೃಷ್ಟಿಸುತ್ತಾರೆ. ಭಯದ ವಾತಾವರಣದಲ್ಲಿ ಮದ್ದು ಗುಂಡುಗಳ ಮಾರಾಟ ಕೂಡ ಬಹಳ ಹೆಚ್ಚಾಗುತ್ತದೆ. ಈ ರೀತಿಯ ಅಸ್ಥಿರ ಸಮಾಜದ ಭಯ ಮುಂದುವರಿಯುತ್ತಿರುವ ಅಥವಾ ಹಿಂದುಳಿದ ದೇಶದಲ್ಲಿ ವಾಸಿಸುತ್ತಿರುವ ಹಣವಂತ ಜನರನ್ನ  ಪ್ರಸಿದ್ಧ ಮತ್ತು ಮುಂದುವರೆದ ದೇಶದ ಸಿಟಿಜನ್ ಶಿಪ್ ನಲ್ಲಿ ಹೂಡಿಕೆ ಮಾಡುವಂತೆ ಪ್ರಚೋದಿಸುತ್ತದೆ. 
2. ಟ್ರಂಪ್ ಜಯ ಕೂಡ ಬಹಳಷ್ಟು ಅಸ್ಥಿರತೆಯನ್ನ ಹುಟ್ಟಿಹಾಕಿದೆ, ಇದರ ಜೊತೆಗೆ ಸಿರಿಯಾ ದೇಶದಲ್ಲಿನ ಅರಾಜಕತೆ, ಟರ್ಕಿಯಲ್ಲಿನ ವಾತಾವರಣ ಇವೆಲ್ಲವೂ ಇಂತಹ ಹೂಡಿಕೆಯ ಬೇಡಿಕೆಯನ್ನ ಹೆಚ್ಚಿಸುತ್ತಿವೆ. 
3. ಡಿಮೋನಿಟೈಸೇಷನ್ ನಂತರ ಭಾರತದಲ್ಲಿನ ಹೈ ನೆಟ್ ವರ್ತ್ ಇಂಡಿವಿಜುಯಲ್ ಗಳಲ್ಲಿ ಕೂಡ ಒಂದು ಸಣ್ಣ ನಡುಕ ಶುರುವಾಗಿದೆ. ಇದು ಅಪರೋಕ್ಷವಾಗಿ ಇಂತಹ ಹೂಡಿಕೆಗಳನ್ನ ಹೆಚ್ಚು ಜನಪ್ರಿಯಗೊಳಿಸುತ್ತವೆ. 
4. ಭಾರತ, ಚೀನಾ, ಆಫ್ರಿಕಾದ ಹಲವು ದೇಶಗಳಲ್ಲಿ ವಾಸಿಸುವ ಸಾಹುಕಾರ ಜನರಲ್ಲಿ ಬೇರೆ ದೇಶದ ಪೌರತ್ವ ಹೊಂದಿರುವುದನ್ನ 'ಸ್ಟೇಟಸ್ ಸಿಂಬಲ್' ಎನ್ನುವಂತೆ ಕೂಡ ಕಾಣಲಾಗುತ್ತದೆ ಇನ್ನೊಂದಷ್ಟು ಜನರಿಗೆ ಈ ರೀತಿಯ ಪೌರತ್ವ ಪಡೆಯುವುದರಿಂದ ವೀಸಾ ರಗಳೆ ಇರುವುದಿಲ್ಲ ಜೊತೆಗೆ ಬಿಸಿನೆಸ್ ಕೂಡ ಆ ದೇಶದೊಂದಿಗೆ ಬಹಳ ಸರಾಗವಾಗಿ ಮಾಡಬಹದು ಎನ್ನುವ ಲೆಕ್ಕಾಚಾರದ ಹೂಡಿಕೆ ಕೂಡ ಆಗಿದೆ. 

-ರಂಗಸ್ವಾಮಿ ಮೂಕನಹಳ್ಳಿ

muraram@yahoo.com