ಮುಂದುವರಿಯಲಿದೆ "ಮೌಕಾ-ಮೌಕಾ"

ಕೋಲ್ಕತಾ: ಬಹುಶಃ ಪಾಕಿಸ್ತಾನದ ಅಭಿಮಾನಿಗಳು ಮೌಕಾ-ಮೌಕಾ ಜಾಹಿರಾತು ಶನಿವಾರಕ್ಕೆ ಅಂತ್ಯವಾಗಲಿದೆ ಎಂದು ಎಣಿಸಿದ್ದರು ಎಂದೆನಿಸುತ್ತದೆ. ಭಾರತ ತಂಡ ಪಾಕಿಸ್ತಾನದ ವಿರುದ್ಧ ಮತ್ತೆ ವಿಶ್ವಕಪ್ ನಲ್ಲಿ ಜಯಗಳಿಸಿದ್ದು, ಮೌಕಾ-ಮೌಕಾ ಜಾಹಿರಾತು ಮತ್ತೆ ಮುಂದುವರೆಯಲಿದೆ.

ಭಾರತ ಮತ್ತು ಪಾಕಿಸ್ತಾನ ತಂಡಗಳು ಈ ವರೆಗೂ ವಿವಿಧ ವಿಶ್ವಕಪ್ ಟೂರ್ನಿಯಲ್ಲಿ 11 ಬಾರಿ ಮುಖಾಮುಖಿಯಾಗಿದ್ದು, 11 ಬಾರಿಯೂ ಭಾರತ ತಂಡವೇ ಗೆಲುವು ಸಾಧಿಸಿದೆ. ನಿನ್ನೆ ಕೋಲ್ಕತಾದಲ್ಲಿ ನಡೆದ ಪಂದ್ಯ 11ನೇ ಪಂದ್ಯವಾಗಿದ್ದು, ಆ ಪಂದ್ಯದಲ್ಲಿಯೂ ಭಾರತ ಅಭೂತಪೂರ್ವ ಜಯಗಳಿಸುವ ಮೂಲಕ ವಿಶ್ವಕಪ್ ನಲ್ಲಿ ಪಾಕಿಸ್ತಾನದ ವಿರುದ್ಧ ತನ್ನ ಜೈತ್ರ ಯಾತ್ರೆಯನ್ನು ಮುಂದುವರೆಸಿದೆ.

ಏಕದಿನ ವಿಶ್ವಕಪ್ ಪಂದ್ಯದಲ್ಲಿ ಭಾರತ ತಂಡ 6 ಬಾರಿ ಪಾಕಿಸ್ತಾನವನ್ನು ಮಣಿಸಿದ್ದು, 19992, 1996, 1999, 2003, 2011 ಮತ್ತು 2015ರಲ್ಲಿ ಪಾಕಿಸ್ತಾನ ತಂಡವನ್ನು ವಿಶ್ವಕಪ್ ನಲ್ಲಿ ಮಣಿಸಿತ್ತು. ಇನ್ನು ಟಿ20 ವಿಶ್ವಕಪ್ ನಲ್ಲಿ ಒಟ್ಟು 5 ಬಾರಿ ಪಾಕಿಸ್ತಾನಕ್ಕೆ ಸೋಲಿನ ರುಚಿ ತೋರಿಸಿದೆ. 2007ರಲ್ಲಿ 2 ಬಾರಿ (ಡರ್ಬನ್ ಮತ್ತು ಜೋಹಾನ್ಸ್ ಬರ್ಗ್), 2012-(ಕೊಲಂಬೋ), 2014-ಮೀರ್ ಪುರ ಮತ್ತು 2016-ಕೋಲ್ಕತಾದಲ್ಲಿ ಪಾಕಿಸ್ತಾನವನ್ನು ಮಣಿಸಿದೆ.

ಒಟ್ಟಾರೆ ಯಾವುದೇ ಮಾದರಿಯ ವಿಶ್ವಕಪ್ ನಲ್ಲಿಯೂ ಪಾಕಿಸ್ತಾನ ಭಾರತ ತಂಡವನ್ನು ಮಣಿಸಲು ವಿಫಲವಾಗಿದ್ದು, ಪಾಕಿಸ್ತಾನದ ಅಭಿಮಾನಿಗಳಲ್ಲಿ ಮಾತ್ರ ನಿರಾಶೆ ಮತ್ತೆ ಮುಂದುವರೆದಿದೆ.