ಐಸಿಸಿ ಮಹಿಳಾ ವಿಶ್ವಕಪ್: ಆಸ್ಟ್ರೇಲಿಯಾ ವಿರುದ್ಧ ಸೋಲು, ಟೀಂ ಇಂಡಿಯಾ ಸೆಮೀಸ್ ಹಾದಿ ಕಠಿಣ

ಬ್ರಿಸ್ಟಲ್: ಐಸಿಸಿ ಮಹಿಳಾ ಏಕದಿನ ವಿಶ್ವಕಪ್ ಟೂರ್ನಿಯಲ್ಲಿ ಟೀಂ ಇಂಡಿಯಾ ಮಹಿಳಾ ತಂಡ ಫಾರ್ಮ್ ಕಳೆದುಕೊಳ್ಳುತ್ತಾ ಬಂದಿದೆ. ಮೊದಲ ನಾಲ್ಕು ಪಂದ್ಯದಳಲ್ಲಿ ಗೆಲುವು ಸಾಧಿಸಿದ್ದು ತಂಡ ಇದೀಗ ದಕ್ಷಿಣ ಆಫ್ರಿಕಾ ಮತ್ತು ಆಸ್ಟ್ರೇಲಿಯಾ ವಿರುದ್ಧ ಸೋಲು ಕಂಡಿದ್ದು ಸೆಮೀಸ್ ಹಾದಿ ಕಠಿಣಗೊಂಡಿದೆ. 

ಕೌಂಟಿ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಟೀಂ ಇಂಡಿಯಾ ಮೊದಲು ಬ್ಯಾಟಿಂಗ್ ಮಾಡಿತು. ನಿಗದಿತ ಓವರ್ ನಲ್ಲಿ ಭಾರತ 7 ವಿಕೆಟ್ ನಷ್ಟಕ್ಕೆ 226 ರನ್ ಗಳಿಸಿತ್ತು. ಈ ಗುರಿ ಬೆನ್ನಟ್ಟಿದ ಆಸ್ಟ್ರೇಲಿಯಾ 45.1 ಓವರ್ ನಲ್ಲಿ 2 ವಿಕೆಟ್ ನಷ್ಟಕ್ಕೆ 227 ರನ್ ಗಳಿಸುವ ಮೂಲಕ ಸುಲಭ ಜಯ ಗಳಿಸಿತು. ಆಸ್ಟ್ರೇಲಿಯಾ ವಿರುದ್ಧದ ಸೋಲಿನಿಂದಾಗಿ ಭಾರತ ಸೆಮಿಫೈನಲ್ ಕನಸು ದುರ್ಬಲಗೊಂಡಿದೆ. ಮುಂಬರುವ ಪಂದ್ಯಗಳಲ್ಲಿ ಮಾಡು ಇಲ್ಲವೆ ಮಡಿ ಪರಿಸ್ಥಿತಿ ನಿರ್ಮಾಣವಾಗಿದೆ. 

ಭಾರತ ಪರ ಪೂನಮ್ ರಾವತ್ 106, ಮಿಥಾಲಿ ರಾಜ್ 68 ಮತ್ತು ಹರ್ಮಾನ್ ಪ್ರೀತ್ ಕೌರ್ 23 ರನ್ ಗಳಿಸಿದ್ದಾರೆ. 

ಆಸ್ಟ್ರೇಲಿಯಾ ಬೌಲಿಂಗ್ ನಲ್ಲಿ ಮೆಗನ್ ಲೂಯಿಸ್ ಶ್ಚುಟ್ ಮತ್ತು ಪೆರ್ರಿ ತಲಾ 2 ವಿಕೆಟ್ ಪಡೆದಿದ್ದಾರೆ. 

ಆಸ್ಟ್ರೇಲಿಯಾ ಪರ ಬೊಲ್ಟೊನ್ 36, ಮೂನಿ 45, ಲಿನ್ನಿಂಗ್ ಅಜೇಯ 76 ಮತ್ತು ಪೆರ್ರಿ ಅಜೇಯ 60 ರನ್ ಸಿಡಿಸಿದ್ದಾರೆ.