ಮಂಡ್ಯ: ನಂಬಿದ್ದ ಗೆಳತಿಯೇ ಕತ್ತು ಕೊಯ್ದ ಘಟನೆ ಇದು. ತಾನು ಪ್ರೀತಿಸುತ್ತಿದ್ದ ಗೆಳತಿಗೆ ಮದುವೆಯಾಯಿತು ಎಂಬ ಕಾರಣಕ್ಕೆ ಆಕೆಯ ಸಲಿಂಗ ಗೆಳತಿಯೇ ನಿರ್ದಯವಾಗಿ ಕುತ್ತಿಗೆಗೆ ವೈರ್ ಬಿಗಿದು ಹತ್ಯೆ ಮಾಡಿರುವ ಘಟನೆ ಮಂಡ್ಯದಲ್ಲಿ ಜರುಗಿದೆ.
ಮಂಡ್ಯದ ಹಾಲಹಳ್ಳಿ ಬಡಾವಣೆಯ ದಿವ್ಯಶ್ರೀ (24) ಕೊಲೆಯಾದವಳು. ಕಳೆದ ಮಾ.8ರಂದು ವಿವಾಹವಾಗಿದ್ದ ಈಕೆಯನ್ನು ಹತ್ಯೆ ಮಾಡಿದ ವಿದ್ಯಾರ್ಥಿನಿ ಅನುಷಾ (20) ಈಗ ಜೈಲಿನಲ್ಲಿ ಕಂಬಿ ಎಣಿಸುತ್ತಿದ್ದಾಳೆ.
ಮಂಡ್ಯದ ಹೊರ ವಲಯದಲ್ಲಿರುವ ಸರ್ಕಾರಿ ರೇಷ್ಮೆ ಬಿತ್ತನೆ ಕೋಠಿ ಬಳಿ ದಿವ್ಯಶ್ರೀಯನ್ನು ಕರೆದುಕೊಂಡು ಹೋದ ಅನುಷಾ ಅಲ್ಲಿಯೇ ಆಕೆಯನ್ನು ವೈರ್‍ನಿಂದ ಬಿಗಿದು ಹತ್ಯೆ ಮಾಡಿದ್ದಳು. ನಂತರ ತನಗೇನೂ ಗೊತ್ತಿಲ್ಲದಂತೆ ಇದ್ದಳು. ಆದರೆ ಪೊಲೀಸರ ಚಾಣಾಕ್ಷತನದಿಂದ ಹಂತಕಿ ಸಿಕ್ಕಿಬಿದ್ದಿದ್ದಾಳೆ.
