ಬೆಂಗಳೂರು: ಅಂತಾರಾಷ್ಟ್ರೀಯ ವಿಮಾನ ನಿಲ್ದಾಣದ ಮೂಲಕ ಮಾದಕವಸ್ತು ತರುತ್ತಿದ್ದ ವಿದೇಶಿ ಪ್ರಜೆಯನ್ನು ಬಂಧಿಸಿರುವ ಮಾದಕವಸ್ತು ನಿಯಂತ್ರಣ ಸಂಸ್ಥೆಯ (ಎನ್‍ಸಿಬಿ )ಅಧಿಕಾರಿಗಳು ರೂ. 20 ಕೋಟಿ ಮೌಲ್ಯದ ಕೊಕೇನ್ ವಶಪಡಿಸಿಕೊಂಡಿದ್ದಾರೆ. ಕಳ್ಳಸಾಗಣೆಗೆ ಯತ್ನಿಸಿದ್ದಪೆರುಗ್ವೆ ದೇಶದ ಪ್ರಜೆಯನ್ನು ಬಂಧಿಸಲಾಗಿದೆ.
19 ವರ್ಷ ವಯಸ್ಸಿನ ಈ ಆರೋಪಿ ಆ. 18ರಂದು ಕೆಂಪೇಗೌಡ ಅಂತರಾಷ್ಟ್ರೀಯ ವಿಮಾನ ನಿಲ್ದಾಣಕ್ಕೆ ಬರುತ್ತಿದ್ದ ಸುಳಿವಿನ ಹಿನ್ನೆಲೆಯಲ್ಲಿ ಕಾರ್ಯಾಚರಣೆ ನಡೆಸಿ ಬಂಧಿಸಲಾಗಿದೆ ಎಂದು ಎನ್ ಸಿಬಿ ಅಧಿಕಾರಿಗಳು ತಿಳಿಸಿದ್ದಾರೆ. ಬ್ರೆಜಿಲ್‍ನಿಂದ ದುಬೈ ಮಾರ್ಗವಾಗಿ ಭಾರತಕ್ಕೆ ಕೊಕೇನ್ ತರಲಾಗುತ್ತಿತ್ತು. ಆರೋಪಿಯು ಪ್ರಯಾಣಿಕರ ಲಗೇಜ್ನ ಲ್ಲಿ 3 ಕೆಜಿ 337 ಗ್ರಾಮ್ ಕೊಕೇನ್ ಅನ್ನು ಅಕ್ರಮವಾಗಿ ಸಾಗಿಸುತ್ತಿದ್ದ. ಸದ್ಯಕ್ಕೆ ಈತನನ್ನು ನ್ಯಾಯಾಂಗ ವಶಕ್ಕೆ ನೀಡಲಾಗಿದೆ. `ಕೊಕೇನ್ ಯಾರಿಗೆ ತಲುಪಿಸಬೇಕು ಎಂಬುದು ಗೊತ್ತಿಲ್ಲ. ಆದರೆ, ಭಾರತ ತಲುಪಿದ ನಂತರ ಸ್ವೀಕರಿಸುವವರಿಂದಲೇ ಕರೆ ಬರುತ್ತದೆ ಎಂದು ಸ್ಮಗ್ಲರ್‍ಗಳು ಹೇಳಿದ್ದರು ಎಂದು ಎನ್‍ಸಿಬಿ ಅಧಿಕಾರಿಗಳು ಹೇಳಿದ್ದಾರೆ.
