ಬೆಂಗಳೂರು: ದರೋಡೆ ಮಾಡಲು ಮಾರಕಾಸ್ತ್ರಗಳೊಂದಿಗೆ ಹೊಂಚು ಹಾಕಿ ಕುಳಿತಿದ್ದ ನಾಲ್ವರು ದರೋಡೆಕೋರರನ್ನು ಬಂಧಿಸಿರುವ ಕುಮಾರಸ್ವಾಮಿ ಲೇಔಟ್ ಪೊಲೀಸರು ಆಟೋ, ಸಿಲಿಂಡರ್, ಟಿವಿ, ಒಡವೆಗಳನ್ನು ವಶಪಡಿಸಿಕೊಂಡಿದ್ದಾರೆ.
ಕದಿರೇನಹಳ್ಳಿ ನಿವಾಸಿಗಳಾದ ಯೋಗಾನಂದ (24), ಅನಿಲ್‍ಕುಮಾರ್ (22) ರಾಜು (24) ಹಾಗೂ ಬನಶಂಕರಿ ನಿವಾಸಿ ಪ್ರಭು (20) ಬಂಧಿತರು. ಆರೋಪಿಗಳು ನ.8ರಂದು ಕನಕಪುರ ರಸ್ತೆ ಸಾರಕ್ಕಿ ಗೇಟ್ ಮೆಟ್ರೋ ಸ್ಟೇಷನ್ ಕೆಳ ಭಾಗದ ಚರ್ಚ್ ಎದುರಿನ ನಿವೇಶನದಲ್ಲಿ ಆಟೋ ನಿಲ್ಲಿಸಿಕೊಂಡು ಮಾರಕಾಸ್ತ್ರ ಹಾಗೂ ಕಾರದ ಪುಡಿ ಇಟ್ಟುಕೊಂಡು ದರೋಡೆಗೆ ಹೊಂಚು ಹಾಕುತ್ತಿದ್ದರು. ಈ ವೇಳೆ ಆರೋಪಿಗಳನ್ನು ಬಂಧಿಸಲಾಗಿದೆ. ವಿಚಾರಣೆ ವೇಳೆ 3 ಸರ ಕಳವು, 3 ಮನೆ ಕಳ್ಳತನ ಹಾಗೂ ಒಂದು ಆಟೋ ಕಳವು ಪ್ರಕರಣ ಪತ್ತೆಯಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಆರೋಪಿಗಳು ನೀಡಿದ ಮಾಹಿತಿ ಆಧರಿಸಿ ಕುಮಾರಸ್ವಾಮಿ ಪೊಲೀಸ್ ಠಾಣೆ ವ್ಯಾಪ್ತಿಯ ರು.80 ಸಾವಿರ ಮೌಲ್ಯದ ಆಟೋ, ಮಡಿವಾಳ ಪೊಲೀಸ್ ಠಾಣೆ ವ್ಯಾಪ್ತಿ ಒಂದು ಸಿಲಿಂಡರ್, ತಾವರೆಕೆರೆ ಹಾಗೂ ಹಾರೋಹಳ್ಳಿ ಪೊಲೀಸ್ ಠಾಣೆ ವ್ಯಾಪ್ತಿಯ ತಲಾ ಎರಡು ಪ್ರಕರಣಗಳಿಗೆ ಸಂಬಂಧಿಸಿದಂತೆ 148 ಗ್ರಾಂ ತೂಕದ ಚಿನ್ನಾಭರಣ, ಒಂದು ಎಲ್‍ಸಿಡಿ ಟಿವಿ, ಎರಡು ಗ್ಯಾಸ್ ಸಿಲಿಂಡರ್ ಜಪ್ತಿ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಟ್ರಾನ್ಸ್ ಫಾರ್ಮರ್ ಕಳ್ಳರ ಬಂಧನ: ದ್ವಿಚಕ್ರ ವಾಹನ, ಟ್ರಾನ್ಸ್ ಫಾರ್ಮರ್ ಕಳವು ಹಾಗೂ ಮನೆಗಳ್ಳತನಕ್ಕೆ ಸಂಬಂಧಿಸಿದ ಪ್ರತ್ಯೇಕ ಪ್ರಕರಣ ಭೇದಿಸಿರುವ ತಲಘಟ್ಟಪುರ ಪೊಲೀಸರು ನಾಲ್ವರು ಆರೋಪಿಗಳನ್ನು ಬಂಧಿಸಿ ಲಕ್ಷಾಂತರ ಮೌಲ್ಯದ ವಸ್ತುಗಳನ್ನು ವಶಪಡಿಸಿಕೊಂಡಿದ್ದಾರೆ. ಬಿಡಿಎ ಬಡಾವಣೆಗಳಲ್ಲಿ ಕರ್ನಾಟಕ ವಿದ್ಯುತ್ ಮಂಡಳಿಯವರು ಅಳವಡಿಸುತ್ತಿದ್ದ ಟ್ರಾನ್ಸ್ ಫಾರ್ಮರ್ ಮತ್ತು ಅದಕ್ಕೆ ಸಂಬಂಧಿಸಿದ ಸಲಕರಣೆಗಳು ಹಾಗೂ ಟಿಸಿಗೆ ಹಾಕುವ ಆಯಿಲ್ ಕಳವು ಪ್ರಕರಣಕ್ಕೆ ಸಂಬಂಧಿಸಿದಂತೆ ಲಾಹೇರ್‍ಪಾಳ್ಯದ ನಿವಾಸಿ ಯೂಸುಫ್ (32) ಗಂಗೊಂಡನಹಳ್ಳಿ ನಿವಾಸಿ ಅಲ್ಲಾ ಭಕ್ಷ್ (30) ಎಂಬುವರನ್ನು ಬಂಧಿಸಲಾಗಿದೆ.
ಆರೋಪಿಗಳು ನೀಡಿದ ಮಾಹಿತಿ ಮೇರೆಗೆ ರು.9 ಲಕ್ಷ ಮೌಲ್ಯದ ನಾಲ್ಕು ಟ್ರಾನ್ಸ್ ಫಾರ್ಮರ್, ಸಲಕರಣೆಗಳು, ಆಯಿಲ್ ಹಾಗೂ ಕೃತ್ಯಕ್ಕೆ ಬಳಸಿದ ಟಾಟಾ ಏಸ್ ವಶಪಡಿಸಿಕೊಳ್ಳಲಾಗಿದೆ. ಇವರ ಬಂಧನದಿಂದ 2 ಪ್ರಕರಣಗಳು ಪತ್ತೆಯಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಮನೆಕಳ್ಳಿ ಸೆರೆ: ಮನೆಗಳವು ಪ್ರಕರಣಕ್ಕೆ ಸಂಬಂಧಿಸಿದಂತೆ ತಲಘಟ್ಟಪುರ ಗ್ರಾಮದ ನಿವಾಸಿ ರಾಜೇಶ್ವರಿ (32) ಎಂಬ ಮನೆಗೆಲಸದವಳನ್ನು ಬಂಧಿಸಿರುವ ಪೊಲೀಸರು ರು.7.5 ಲಕ್ಷ ಮೌಲ್ಯದ 250 ಗ್ರಾಂ ಚಿನ್ನಾಭರಣ ವಶಪಡಿಸಿಕೊಂಡಿದ್ದಾರೆ. ಕೇರಳ ಮೂಲದ ಸಾಫ್ಟ್ ವೇರ್ ಉದ್ಯೋಗಿ ಸಂಜಯ್, ಎಲೆಕ್ಟ್ರಾನಿಕ್ ಸಿಟಿಯ ಸಾಫ್ಟ್ ವೇರ್ ಕಂಪನಿಯಲ್ಲಿ ಕೆಲಸ ಮಾಡುತ್ತಿದ್ದು, ಅಪಾರ್ಟ್ ಮೆಂಟ್‍ನಲ್ಲಿ ವಾಸವಾಗಿದ್ದರು. ಇವರ ಮನೆಯಲ್ಲಿ ಕೆಲಸಕ್ಕೆಂದು 6 ತಿಂಗಳ ಹಿಂದೆ ರಾಜೇಶ್ವರಿ ಸೇರಿದ್ದಳು. ಮನೆ ಸ್ವಚ್ಛ ಮಾಡುವಾಗ ಬಾಗಿಲು ಕೀಲಿ ಸಿಕ್ಕಿತ್ತು. ಇದನ್ನು ಮಾಲೀಕರಿಗೆ ಕೊಡದೆ ತನ್ನ ಬಳಿಯೇ ಇಟ್ಟುಕೊಂಡಿದ್ದಳು.
ಬಾಗಿಲು ಕೀಲಿ ಸಿಗದೆ ಎಲ್ಲೆಡೆ ಹುಡುಕಾಡಿದ ಸಂಜಯ್, ಕಳೆದು ಹೋಗಿರಬೇಕೆಂದು ಮತ್ತೊಂದು ಕೀಲಿ ಬಳಸುತ್ತಿದ್ದರು. ಇತ್ತೀಚೆಗೆ ಸಂಜಯ್, ಕುಟುಂಬ ಸಮೇತರಾಗಿ ಕೇರಳಕ್ಕೆ ಹೋದಾಗ, ರಾಜೇಶ್ವರಿ, ತನ್ನ ಬಳಿಯಿದ್ದ ಕೀಲಿ ಬಳಸಿ ಬಾಗಿಲು ತೆಗೆದು ಆಭರಣ ಕಳವು ಮಾಡಿದ್ದಳು. ಊರಿನಿಂದ ಮನೆ ಮಾಲೀಕರು ವಾಪಸ್ ಬಂದಾಗ ಪ್ರಕರಣ ಬೆಳಕಿಗೆ ಬಂದಿತ್ತು. ತನಿಖೆ ಕೈಗೊಂಡ ಪೊಲೀಸರು, ಅಪಾರ್ಟ್ ಮೆಂಟ್‍ನಲ್ಲಿ ಅಳವಡಿಸಿದ್ದ ಸಿಸಿ ಕ್ಯಾಮರಾ ದೃಶ್ಯಾವಳಿ ಆಧರಿಸಿ ಆರೋಪಿ ಬಂಧಿಸಿದ್ದಾರೆ.
