ಬೆಂಗಳೂರು: ಭಾರತೀಯ ಮಾನದಂಡಗಳ ಬ್ಯೂರೋ (BIS)ದ ಬೆಂಗಳೂರು ಶಾಖಾ ಕಚೇರಿಯ ಅಧಿಕಾರಿಗಳು ಬ್ರೈನ್‌ಬೀಸ್ ಸೊಲ್ಯೂಷನ್ಸ್ ಪ್ರೈವೇಟ್ ಲಿಮಿಟೆಡ್ ನಿರ್ವಹಿಸುವ ಫಸ್ಟ್‌ಕ್ರೈನ ಗೋದಾಮಿನಲ್ಲಿ ಕಳಪೆ ಗುಣಮಟ್ಟದ ಉತ್ಪನ್ನಗಳನ್ನು ಸಂಗ್ರಹಿಸಿ ಮಾರಾಟ ಮಾಡಲಾಗುತ್ತಿದೆ ಎಂಬ ಆರೋಪದ ಮೇಲೆ ದಾಳಿ ನಡೆಸಿದ್ದಾರೆ.
ದಾಳಿಯ ಸಮಯದಲ್ಲಿ, ಹಲವಾರು ಉತ್ಪನ್ನ ಮಾದರಿಗಳನ್ನು ಮಾನ್ಯ ಬಿಐಎಸ್ ಪರವಾನಗಿಗಳಿಲ್ಲದೆ ಸಂಗ್ರಹಿಸಿ ಮಾರಾಟ ಮಾಡಲಾಗುತ್ತಿದೆ ಎಂದು ಬಿಐಎಸ್ ಪ್ರಕಟಣೆ ತಿಳಿಸಿದೆ. ಈ ಉತ್ಪನ್ನಗಳು ಐಎಸ್‌ಐ ಮಾರ್ಕ್ ನ್ನು ದುರುಪಯೋಗಪಡಿಸಿಕೊಳ್ಳುತ್ತಿವೆ ಮತ್ತು ಬಿಐಎಸ್ ಪರವಾನಗಿ ಅಡಿಯಲ್ಲಿ ನಿಗದಿಪಡಿಸಿದ ಷರತ್ತುಗಳನ್ನು ಉಲ್ಲಂಘಿಸುತ್ತಿವೆ ಎಂದು ಕಂಡುಬಂದಿದೆ. ಈ ಉತ್ಪನ್ನಗಳಲ್ಲಿ ಹಲವು ಸಂಬಂಧಿತ ಗುಣಮಟ್ಟ ನಿಯಂತ್ರಣ ಆದೇಶಗಳ (QCOs) ಅಡಿಯಲ್ಲಿ BIS ನಿಂದ ಕಡ್ಡಾಯ ಪ್ರಮಾಣೀಕರಣಕ್ಕೆ ಒಳಪಟ್ಟಿರುವ ವರ್ಗಗಳ ಅಡಿಯಲ್ಲಿ ಬರುತ್ತವೆ ಎಂದು BIS ಪ್ರಕಟಣೆ ತಿಳಿಸಿದೆ.
QCOs ಪ್ರಕಾರ, ಕಡ್ಡಾಯ ಪ್ರಮಾಣೀಕರಣದ ಅಡಿಯಲ್ಲಿ ಬರುವ ಯಾವುದೇ ಉತ್ಪನ್ನವನ್ನು ಮಾನ್ಯ ಬಿಐಎಸ್ ಪರವಾನಗಿ ಇಲ್ಲದೆ ಮತ್ತು ಅನ್ವಯವಾಗುವ ಭಾರತೀಯ ಮಾನದಂಡಗಳ ಸಂಪೂರ್ಣ ಅನುಸರಣೆ ಇಲ್ಲದೆ ತಯಾರಿಸುವುದು, ಸಂಗ್ರಹಿಸುವುದು ಅಥವಾ ಮಾರಾಟ ಮಾಡಬಾರದು.
ದಾಳಿಯ ಸಮಯದಲ್ಲಿ ಸುಮಾರು 36,924 ಯೂನಿಟ್ ಆಟಿಕೆಗಳು, ಸಿಪ್ಪರ್‌ಗಳು ಮತ್ತು ಇತರ ವಸ್ತುಗಳನ್ನು ಒಳಗೊಂಡಿರುವ ಒಟ್ಟು 33 ಉತ್ಪನ್ನ ಪ್ರಭೇದಗಳನ್ನು ವಶಪಡಿಸಿಕೊಳ್ಳಲಾಗಿದೆ ಎಂದು BIS ಹೇಳಿದೆ. ವಶಪಡಿಸಿಕೊಂಡ ಸರಕುಗಳ ಅಂದಾಜು ಮಾರುಕಟ್ಟೆ ಮೌಲ್ಯ ಸುಮಾರು 1.43 ಕೋಟಿ ರೂಪಾಯಿಯಾಗಿದೆ.
ಎಲ್ಲಾ ಗ್ರಾಹಕರು ಜಾಗರೂಕರಾಗಿರಲು ಮತ್ತು ಖರೀದಿ ಮಾಡುವ ಮೊದಲು BIS ಪ್ರಮಾಣಿತ ಗುರುತು (ISI ಗುರುತು) ಮತ್ತು ತಯಾರಕರ ಪರವಾನಗಿ ಸಂಖ್ಯೆಯನ್ನು ಪರಿಶೀಲಿಸಲು ಬಿಐಎಸ್ ಒತ್ತಾಯಿಸಿದೆ.
Advertisement