-ಪಾಕಿಸ್ತಾನ, ನೇಪಾಳ ನಾಯಕರ ಮೂಲಕ ಸದಸ್ಯತ್ವಕ್ಕೆ ಯತ್ನ
ಕಠ್ಮಂಡು: ಏಷ್ಯಾದಲ್ಲಿ ಪ್ರಮುಖ ಶಕ್ತಿಯಾಗಿ ಬೆಳೆಯಲು ಹಪಾಹಪಿಸುತ್ತಿರುವ ಚೀನಾದ ಕಣ್ಣು ಈಗ ಸಾರ್ಕ್ ಗುಂಪಿನ ಮೇಲೆ ಬಿದ್ದಿದೆ. ದಕ್ಷಿಣ ಏಷ್ಯಾದ ಎಂಟು ರಾಷ್ಟ್ರಗಳ ಗುಂಪಾದ ಸಾರ್ಕ್ ಸದಸ್ಯತ್ವ ಪಡೆಯಲು ಈಗ ಚೀನಾ ಲಾಬಿ ಆರಂಭಿಸಿದೆ.
ಇದಕ್ಕಾಗಿ ನೇಪಾಳದ ಪ್ರಮುಖ ರಾಜಕಾರಣಗಳು ಮತ್ತು ರಾಯಭಾರಿಗಳ ಮೂಲಕ ಸಾರ್ಕ್ ಸದಸ್ಯತ್ವ ರಾಷ್ಟ್ರಗಳ ಮೇಲೆ ಒತ್ತಡ ಹೇರಲು ಹೊರಟಿದೆ.
ಚೀನಾ ಎಷ್ಟೇ ವಿಶ್ವದ ಹಿರಿಯಣ್ಣನಾದ ಅಮೆರಿಕದ ಸರಿಸಮನಾಗಿ ಬೆಳೆಯುತ್ತಿದ್ದರೂ ದಕ್ಷಿಣ ಏಷ್ಯಾದಲ್ಲಿ ಭಾರತ ತನ್ನದೇ ಆದ ಪ್ರಭಾವ ಉಳಿಸಿಕೊಂಡಿದೆ. ಈ ಪ್ರಭಾವವನ್ನು ಮುರಿಯುವುದು ಚೀನಾದ ಗುರಿ. ಇದೇ ಕಾರಣಕ್ಕೆ ಚೀನಾದ ವಿದೇಶಾಂಗ ಖಾತೆ ಸಹಾಯಕ ಸಚಿವ ಲಿಯು ಝೆನ್ ನೇತೃತ್ವದ ನಿಯೋಗವೊಂದು ಸಾರ್ಕ್ ಸದಸ್ಯ ರಾಷ್ಟ್ರಗಳ ನಾಯಕರನ್ನು ಭೇಟಿಯಾಗಲಿದೆ ಎಂದು ಹೇಳಲಾಗಿದೆ.
ಚೀನಾದ ಪರ ಪಾಕಿಸ್ತಾನವೂ ತೀವ್ರ ಲಾಬಿ ಆರಂಭಿಸಿದೆ. ಈ ಗುಂಪಿನಲ್ಲಿ ವೀಕ್ಷಕನಾಗಿ ಚೀನಾಗೆ ಮಹತ್ವದ ಪಾತ್ರ ನೀಡಬೇಕು ಎಂದು ಮಂಗಳವಾರ ನಡೆದ ಸಾರ್ಕ್ ರಾಷ್ಟ್ರಗಳ ವಿದೇಶಾಂಗ ಸಚಿವರ ಸಭೆಯಲ್ಲಿ ಒತ್ತಾಯಿಸಿದೆ. ಶ್ರೀಲಂಕಾ ಕೂಡ ಚೀನಾದ ಕೃಪಾಕಟಾಕ್ಷದಲ್ಲೇ ಇದೆ. ಇನ್ನು ನೇಪಾಳ ಇತರೆ ರಾಷ್ಟ್ರಗಳು ಒಪ್ಪಿದರೆ ಚೀನಾಗೆ ಸದಸ್ಯತ್ವ ನೀಡುವುದಕ್ಕೆ ನಮ್ಮದೇನೂ ಅಭ್ಯಂತರವಿಲ್ಲ ಎಂದು ಈಗಾಗಲೇ ಸ್ಪಷ್ಟಪಡಿಸಿದೆ. ಸದ್ಯ ಚೀನಾವು ಸಾರ್ಕ್‌ನ ಎಂಟು ವೀಕ್ಷಕ ರಾಷ್ಟ್ರಗಳಲ್ಲಿ ಒಂದಾಗಿದೆ.
ಪ್ರಸ್ತಾಪ ಆಗಿಲ್ಲ: ಸಾರ್ಕ ರಾಷ್ಟ್ರಗಳ ವಿದೇಶಾಂಗ ಸಚಿವರ ಸಭೆಯಲ್ಲಿಚೀನಾಗೆ ಸದಸ್ಯತ್ವ ನೀಡುವ ವಿಚಾರ ಪ್ರಸ್ತಾಪವಾಗಿಲ್ಲ. ಈ ವಿಚಾರ ಸಭೆಯ ಕಾರ್ಯಸೂಚಿಯಲ್ಲೇ ಇರಲಿಲ್ಲ ಎಂದು ಭಾರತದ ವಿದೇಶಾಂಗ ಸಚಿವಾಲಯದ ಮೂಲಗಳು ತಿಳಿಸಿವೆ.
