ವಾಷಿಂಗ್ಟನ್: ``ಭಯೋತ್ಪಾದಕರನ್ನು ಮುಂದಿಟ್ಟುಕೊಂಡು ನಡೆಸುತ್ತಿರುವ ಛದ್ಮ ಸಮರ ನಿಲುವು ಬದಲಾಯಿಸಿಕೊಳ್ಳಿ. ಹೀಗೆ ಮಾಡಿದರೆ ಮಾತ್ರ ನಿಮಗೆ ಹಣಕಾಸು ನೆರವು ಕೊಡುತ್ತೇವೆ''
ಹೀಗೆಂದು ಪಾಕಿಸ್ತಾನ ಸರ್ಕಾರಕ್ಕೆ ಸ್ಪಷ್ಟ ಸಂದೇಶ ನೀಡಿದ್ದು ಒಬಾಮ ಆಡಳಿತ. ಇಷ್ಟು ಮಾತ್ರವಲ್ಲ, ಈ ಷರತ್ತು ಪೂರೈಸಿದರೆ ಮಾತ್ರ ವಾಷಿಂಗ್ಟನ್‍ಗೆ ಭೇಟಿ ನೀಡಿ ಎಂದು ಅಮೆರಿಕ ಸರ್ಕಾರ ಪಾಕಿಸ್ತಾನ ಪ್ರಧಾನಿ ನವಾಜ್ ಷರೀಫ್ ಗೂ ಸೂಚನೆ ನೀಡಿದೆ. ಇದೇ ಕಾರಣಕ್ಕೆ ಅಮೆರಿಕವು ಷರೀಫ್ ಭೇಟಿ ಕುರಿತು ಈವರೆಗೆ ಅಧಿಕೃತ ಘೋಷಣೆ ಹೊರಡಿಸಿಲ್ಲ.
ಇಂಥ ಖಡಕ್ ಸೂಚನೆ ನೀಡುವ ಮೂಲಕ ಪಾಕಿಸ್ತಾನದ ಪಾಲಿಗೆ ಒಂದು ಕಾಲದ ಮಿತ್ರನಾಗಿದ್ದ ಅಮೆರಿಕ ಕೂಡ ಈಗ ಬಿಸಿ ಮುಟ್ಟಿಸಲು ಆರಂಭಿಸಿದೆ. ಭಯೋತ್ಪಾದಕರನ್ನು ಮುಂದಿಟ್ಟುಕೊಂಡು ಛದ್ಮ ಸಮರ ನಡೆಸುವ ನಿಲುವು ಬದಲಾಯಿಸಿಕೊಂಡರಷ್ಟೇ ಹಣಕಾಸು ನೆರವು ನೀಡುವುದಾಗಿ ಅಮೆರಿಕ ಸ್ಪಷ್ಟವಾಗಿ ತಿಳಿಸಿದೆ.
