ನವದೆಹಲಿ: ಭಾರತ ಮತ್ತು ಚೀನಾ ನಡುವಿನ ಗಡಿಕಾಯಲು 500 ಮಂದಿ ಮಹಿಳಾ ಸಿಬ್ಬಂದಿ ನಿಯೋಜಿಸಲಾಗುತ್ತದೆ. ಇಂಡೋ-ಟಿಬೆಟನ್ ಬೋರ್ಡರ್ ಪೋರ್ಸ್ (ಐಟಿಬಿಪಿ)ನ ಮಹಿಳಾ ಸಿಬ್ಬಂದಿ ತರಬೇತಿಗಾಗಿ ಈ ಕ್ರಮ ಕೈಗೊಳ್ಳಲಾಗಿದೆ. ಇವರನ್ನು 44 ವಾರಗಳ ಕಾಲ ವಾಸ್ತವಿಕ ಗಡಿ ನಿಯಂತ್ರಣ ರೇಖೆ (ಎಲ್‍ಎಸಿ)ಯಲ್ಲಿ ನಿಯೋಜಿಸಲಾಗುತ್ತದೆ.
ಮಾರ್ಚ್ ಅಂತ್ಯದ ಒಳಗಾಗಿ ಮಹಿಳಾ ಸಿಬ್ಬಂದಿಯನ್ನು ಗಡಿ ಪ್ರದೇಶಕ್ಕೆ ಕಳುಹಿಸಲಾಗುತ್ತದೆ ಎಂದು ಐಟಿಬಿಪಿ ಮಹಾನಿರ್ದೇಶಕ ಕೃಷ್ಣ ಚೌಧರಿ ತಿಳಿಸಿದ್ದಾರೆ ಎಂದು `ಟೈಮ್ಸ್ ಆಫ್ ಇಂಡಿಯಾ' ವರದಿ ಮಾಡಿದೆ. ತರಬೇತಿ ಅವಧಿಯಲ್ಲಿ ಪರ್ವತ ಪ್ರದೇಶದಲ್ಲಿ ಜೀವನ, ಸೇನಾ ಕಾರ್ಯಾಚರಣೆ ಮತ್ತು ಇತರ ಮಿಲಿಟರಿ ತರಬೇತಿಯನ್ನು ಅವರಿಗೆ ನೀಡಲಾಗುತ್ತದೆ. 3,488 ಕಿಮೀ ವ್ಯಾಪ್ತಿಯ ಇಂಡೋ-ಚೀನಾ ಗಡಿ ಪ್ರದೇಶದ 20 ಮುಂಚೂಣಿ ನೆಲೆಗಳಲ್ಲಿ ಅವರನ್ನು ನಿಯೋಜಿಸಲಾಗುತ್ತದೆ. ಅಂದ ಹಾಗೆ ಈ ಪ್ರದೇಶ ಸಮುದ್ರ ಮಟ್ಟದಿಂದ 8 ರಿಂದ 14
ಸಾವಿರ ಅಡಿ ಎತ್ತರದಲ್ಲಿದೆ. ಅಲ್ಲಿ ಕಠಿಣ ತರಬೇತಿಗೆ ಒಳಗಾದ ಬಳಿಕ ಅವರನ್ನು ಸೇರ್ಪಡೆಗೊಳಿಸಲಾಗುತ್ತದೆ ಎಂದು ಚೌಧರಿ ತಿಳಿಸಿದ್ದಾರೆ.
ಇದೇ ಮೊದಲ ಬಾರಿ ಭಾರತ ಮಹಿಳಾ ಸಿಬ್ಬಂದಿಯನ್ನು ಇಂಥ ಕಾರ್ಯಾಚರಣೆಗೆ ಇಳಿ ಸುತ್ತಿದೆ. ಇದು ಅವರಿಗೆ ವಿಶೇಷ ಅನುಭವ ನೀಡಲಿದೆ ಎಂದು ಅವರು ತಿಳಿಸಿದ್ದಾರೆ. ಇದರ ಜತೆಗೆ ಮುಂದಿನ ದಿನಗಳಲ್ಲಿ ಮುಂಚೂಣಿ ನೆಲೆಯಲ್ಲಿ ಶೇ.40 ಪ್ರಮಾಣದಷ್ಟು ಮಹಿಳಾ ಅಧಿಕಾರಿ ಹಾಗೂ ಸಿಬ್ಬಂದಿಯನ್ನೇ ನಿಯೋಜಿಸಲು ಐಟಿಬಿಪಿ ಮುಂದಾಗಿದೆ. 1962ರಲ್ಲಿ ಚೀನಾ ಜತೆಗಿನ ಯುದ್ಧದ ಬಳಿಕ ಇಂಡೋ-ಟಿಬೆಟನ್ ಬೋರ್ಡರ್ ಫೋರ್ಸ್ ಅನ್ನು ಸ್ಥಾಪಿಸಲಾಗಿತ್ತು.
