ಪದ್ಮಾವತಿ ದೀಪಿಕಾ ತಲೆಗೆ ಇನಾಮು ಘೋಷಿಸಿದ ನಾಯಕನ ವಿರುದ್ಧ ಬಿಜೆಪಿ ಖಂಡನೆ

ಮುಂಬೈ: ಪದ್ಮಾವತಿ ನಟಿ ದೀಪಿಕಾ ಪಡುಕೋಣೆ ತಲೆ ಕತ್ತರಿಸುವವರಿಗೆ ಇನಾಮು ನೀಡುವುದಾಗಿ ಘೋಷಣೆ ಮಾಡಿದ ತನ್ನದೇ ಮುಖಂಡನ ವಿರುದ್ಧ ಬಿಜೆಪಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು, ಸಾರ್ವಜನಿಕವಾಗಿ ನಟಿಯ ಬಳಿ  ಬೇಷರತ್ ಕ್ಷಮೆ ಯಾಚಿಸುವಂತೆ ಸೂಚನೆ ನೀಡಿದೆ.

ಹರ್ಯಾಣದ ಬಿಜೆಪಿ ಘಟಕದ ಮುಖ್ಯಸ್ಥ ಅನಿಲ್ ಜೈನ್ ಅವರು ಈ ಬಗ್ಗೆ ಹೇಳಿಕೆ ಬಿಡುಗಡೆ ಮಾಡಿದ್ದು, ತಲೆ ಕಡಿಯುವ ಸಂಸ್ಕೃತಿ ಬಿಜೆಪಿ ಪಕ್ಷದ್ದಲ್ಲ... ಪದ್ಮಾವತಿ ಚಿತ್ರ ಸಂಬಂಧ ಯಾವುದೇ ಸಮಸ್ಯೆಗಳಿರಬಹುದು. ಆದರೆ  ನಟಿಯೊಬ್ಬರ ತಲೆ ಕಡಿಯುವ ಹೇಳಿಕೆ ನೀಡುವುದು ಅಕ್ಷಮ್ಯ. ಹೀಗಾಗಿ ಬಿಜೆಪಿ ನಾಯಕ ಸೂರಜ್ ಪಾಲ್ ಅಮು, ಕೂಡಲೇ ಸಾರ್ವಜನಿಕವಾಗಿ ನಟಿಯ ಕ್ಷಮೆ ಯಾಚಿಸಬೇಕು ಎಂದು ಸೂಚಿಸುತ್ತೇವೆ ಎಂದು ಹೇಳಿದರು.

ಅಂತೆಯೇ ನಿರ್ದೇಶಕ ಸಂಜಯ್ ಲೀಲಾ ಬನ್ಸಾಲಿ ವಿರುದ್ಧವೂ ಆಕ್ರೋಶ ವ್ಯಕ್ತಪಡಿಸಿದ ಅವರು, ಚಿತ್ರದ ನಿರ್ದೇಶಕರು ಭಾರತದ ಇತಿಹಾಸ ಮತ್ತು ರಾಜವಂಶಗಳ ಬಗ್ಗೆ ಗೌರವ ನೀಡಬೇಕು. ಇತಿಹಾಸವನ್ನು ಸಂಪೂರ್ಣ  ತಿಳಿಯದೇ ಐತಿಹಾಸಿಕ ವ್ಯಕ್ತಿಗಳ ಚಾರಿತ್ರ್ಯ ವಧೆ ಮಾಡಬಾರದು ಎಂದು ತಮ್ಮ ಆಕ್ರೋಶ ವ್ಯಕ್ತಪಡಿಸಿದರು.