ಕಾಶ್ಮೀರದಲ್ಲಿ ಮುಂದುವರೆದ ಉಗ್ರರ ಅಟ್ಟಹಾಸ, ಮನೆಗೇ ನುಗ್ಗಿ ಯೋಧನ ಭೀಕರ ಹತ್ಯೆ!

ಶ್ರೀನಗರ: ಕಣಿವೆ ರಾಜ್ಯ ಜಮ್ಮು ಮತ್ತು ಕಾಶ್ಮೀರದಲ್ಲಿ ಉಗ್ರರ ಅಟ್ಟಹಾಸ ಮಿತಿ ಮೀರಿದ್ದು, ಪೊಲೀಸ್ ಪೇದೆಯ ಅಪಹರಣ ಮತ್ತು ಕೊಲೆ ಪ್ರಕರಣ ನಡೆದ 48 ಗಂಟೆಗಳಲ್ಲೇ ಮತ್ತೋರ್ವ ಭದ್ರತಾ ಸಿಬ್ಬಂದಿಯನ್ನು ಆತನ ಮನೆಗೇ ನುಗ್ಗಿ ಭೀಕರವಾಗಿ ಹತ್ಯೆ ಗೈದಿದ್ದಾರೆ.

ಜಮ್ನು ಮತ್ತು ಕಾಶ್ಮೀರದ ಪುಲ್ವಾಮ ಜಿಲ್ಲೆಯಲ್ಲಿ ಈ ಘಟನೆ ನಡೆದಿದ್ದು, ಸಿಆರ್ ಪಿಎಫ್ ಗೆ ಸೇರಿದ ಸೈನಿಕನನ್ನು ಉಗ್ರರು ಭೀಕರವಾಗಿ ಕೊಂದು ಹಾಕಿದ್ದಾರೆ. ಸೇನಾಮೂಲಗಳ ಪ್ರಕಾರ ಹುತಾತ್ಮ ಯೋಧನನ್ನು ಸಿಆರ್ ಪಿಎಫ್ ನ ಪೇದೆ ನಾಸೀರ್ ಅಹ್ಮದ್ ರ್ಯಾದರ್ ಎಂದು ಗುರುತಿಸಲಾಗಿದೆ. ಇತ್ತೀಚೆಗಷ್ಟೇ ನಾಸಿರ್ ಅಹ್ಮದ್ ರಜೆ ಮೇಲೆ ಪುಲ್ವಾಮ ಜಿಲ್ಲೆಯ ನೈರಾ ಪ್ರದೇಶದಲ್ಲಿರುವ ಮನೆಗೆ ತೆರಳಿದ್ದ. 

ಆದರೆ ನಿನ್ನೆ ಅವರು ಮನೆಯಲ್ಲಿರುವಾಗಲೇ ಮನೆಗೆ ನುಗ್ಗಿದ ಗುರುತು ತಿಳಿಯದ ಉಗ್ರರು ಗುಂಡು ಹಾರಿಸಿಕೊಂದು ಪರಾರಿಯಾಗಿದ್ದಾರೆ. ಇನ್ನು ಉಗ್ರರು ಸೈನಿಕನ ಮನೆಗೆ ನುಗ್ಗಿದ ವೇಳೆ ಸೈನಿಕನ ಮನೆಯ ಅಕ್ಕಪಕ್ಕದ ಮನೆಗಳಲ್ಲಿ ಜನರಿದ್ದರೂ ಅವರು ಅಸಹಾಯಕರಾಗಿದ್ದರು. ಸೈನಿಕನ ರಕ್ಷಣೆಗೆ ಧಾವಿಸಲಿಲ್ಲ.  ಕೂಡಲೇ ಸೈನಿಕನ ಸಂಬಂಧಿಕರು ಯೋಧ ನಾಸಿರ್ ಅಹ್ಮದ್ ರನ್ನು ಆಸ್ಪತ್ರೆಗೆ ದಾಖಲಿಸಲು ಕರೆದೊಯ್ದರಾದರೂ ಮಾರ್ಗಮಧ್ಯೆಯೇ ಅವರು ಸಾವನ್ನಪ್ಪಿದ್ಜಾರೆ.

ಪ್ರಸ್ತತ ಪ್ರಕರಣ ದಾಖಲಿಸಿಕೊಂಡಿರುವ ಪುಲ್ವಾಮ ಪೊಲೀಸರು ಉಗ್ರರಿಗಾಗಿ ಶೋಧ ನಡೆಸುತ್ತಿದ್ದಾರೆ. ಪ್ರಾಥಮಿಕ ಮೂಲಗಳ ಪ್ರಕಾರ ಉಗ್ರ ಸಂಘಟನೆ ಸೇರಿರುವ ಸ್ಥಳೀಯ ಯುವಕರೇ ಈ ಕೃತ್ಯ ಮಾಡಿರಬಹುದು ಎಂದು ಶಂಕಿಸಲಾಗಿದೆ.