ಭಾರತೀಯ ಸೇನೆ ಬತ್ತಳಿಕೆ ಸೇರಲಿದೆ ಟ್ಯಾಂಕರ್ ಹೊಡೆದುರುಳಿಸಬಲ್ಲ 'ಸ್ಪೈಕ್ ಕ್ಷಿಪಣಿ'

ನವದೆಹಲಿ: ಶತ್ರುರಾಷ್ಟ್ರಗಳ ಟ್ಯಾಂಕರ್ ಗಳನ್ನು ಕ್ಷಣಮಾತ್ರದಲ್ಲಿ ಹೊಡೆದುರುಳಿಸಬಲ್ಲ ಇಸ್ರೇಲ್ ನ ಪ್ರಬಲ 'ಸ್ಪೈಕ್ ಕ್ಷಿಪಣಿ'ಗಳನ್ನು ಖರೀದಿಸಲು ಭಾರತ ಮುಂದಾಗಿದೆ.

ಈ ಬಗ್ಗೆ ಭಾರತ ಮತ್ತು ಇಸ್ರೇಲ್ ನಡುವಿನ ಒಪ್ಪಂದ ಘೋಷಣೆಯಾಗಿದ್ದು, ಸ್ಪೈಕ್ ಕ್ಷಿಪಣಿ ಖರೀದಿ ಸಂಬಂಧ ಮಾತುಕತೆ ಅಂತಿಮಗೊಂಡಿದೆ. ಖರೀದಿ ಬಗ್ಗೆ ಶೀಘ್ರವೇ ಒಪ್ಪಂದ ಪ್ರಕಟವಾಗಲಿದೆ. 

ಇನ್ನು ಇಸ್ರೇಲ್ ಸಹಯೋಗದಲ್ಲಿ ಭಾರತದ ರಕ್ಷಣಾ ತಂತ್ರಜ್ಞಾನ ಮತ್ತು ಅಭಿವೃದ್ಧಿ ಸಂಸ್ಥೆ (ಡಿಆರ್ ಡಿಒ) ಈ ಸ್ಪೈಕ್ ಕ್ಷಿಪಣಿಗಳನ್ನು ತಯಾರಿಸಿಕೊಡಲಿದೆ ಎನ್ನಲಾಗಿದೆ. ಆದರೆ ಕ್ಷಿಪಣಿ ತಯಾರಿಕೆ ಮತ್ತು ಪರೀಕ್ಷೆ ಮತ್ತು ಸೇನೆಗೆ ಸೇರ್ಪಡೆ ಮಾಡಿಕೊಳ್ಳಲು 3 ವರ್ಷ ಸಮಯ ತಗಲುತ್ತದೆ. ಈ ಹಿನ್ನೆಲೆಯಲ್ಲಿ ಅಲ್ಲಿಯವರೆಗೆ ದೇಶದ ರಕ್ಷಣಾ ವ್ಯವಸ್ಥೆಗೆ ಬಲ ತುಂಬಲು ಇಸ್ರೇಲ್‌ನಿಂದ ಈ ಟ್ಯಾಂಕ್ ನಿರೋಧಕ ಕ್ಷಿಪಣಿ ಸ್ರೈ್ಕ್ ಖರೀದಿಸಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ. 

ಇನ್ನು ಇಸ್ರೇಲ್ ಕ್ಷಿಪಣಿ ಖರೀದಿಯಿಂದ ಭಾರತವು ಪಾಕಿಸ್ತಾನಕ್ಕೆ ಸೆಡ್ಡು ಹೊಡೆಯಲಿದ್ದು, ಸೇನೆಯ ತುರ್ತು ಅಗತ್ಯ ಪೂರೈಕೆಯಾಗಲಿದೆ. ಇಸ್ರೇಲ್‌ ನ ರಫೇಲ್ ಅಡ್ವಾನ್ಸ್‌ಡ್‌ ಡಿಫೆನ್ಸ್ ಸಿಸ್ಟಮ್ಸ್ ಲಿ. ಟ್ಯಾಂಕ್ ನಿರೋಧಕ ಕ್ಷಿಪಣಿಯನ್ನು ಪೂರೈಸಲಿದೆ. ಇನ್ನು ಭಾರತೀಯ ಸೇನೆಗೆ 8000 ಟ್ಯಾಂಕ್ ನಿರೋಧಕ ಕ್ಷಿಪಣಿಗಳ ಅಗತ್ಯವಿದ್ದು, ಡಿಆರ್‌ಡಿಒ 2021ರೊಳಗೆ ಅವುಗಳನ್ನು ಪೂರೈಸಲಿದೆ. ಅಲ್ಲಿಯವರೆಗೆ ಇಸ್ರೇಲ್ ಕ್ಷಿಪಣಿ ದೇಶದ ರಕ್ಷಣಾ ವ್ಯವಸ್ಥೆಗೆ ಬೆಂಬಲ ನೀಡಲಿದೆ ಎನ್ನಲಾಗಿದೆ.