ಗಂಗೆಯಲ್ಲಿ ಸ್ನಾನ ಮಾಡುತ್ತಿದ್ದ ಮಹಿಳೆಯ ಮೇಲೆ ಅತ್ಯಾಚಾರವೆಸಗಿ, ವಿಡಿಯೋ ಶೇರ್ ಮಾಡಿದ ಕಾಮುಕರು!

ಪಾಟ್ನಾ: ಕಾಮುಕರಿಬ್ಬರು ಗಂಗಾ ನದಿಯಲ್ಲಿ ಸ್ನಾನ ಮಾಡುತ್ತಿದ್ದ ಮಹಿಳೆಯನ್ನು ಬಲವಂತವಾಗಿ ಹೊರಗೆಳೆದು ಸಾಮೂಹಿಕ ಅತ್ಯಾಚಾರ ನಡೆಸಿ ಅದನ್ನು ವಿಡಿಯೋ ಮಾಡಿ ಸಾಮಾಜಿಕ ಜಾಲತಾಣಕ್ಕೆ ಅಪ್ ಲೋಡ್ ಮಾಡಿ ವಿಕೃತಿ ಮೆರೆದಿದ್ದಾರೆ. 

ಶಿವ್ ಪೂಜಾನ್ ಮಹತೋ ಮತ್ತು ವಿಶಾಲ್ ಇಬ್ಬರು 45ರ ಹರೆಯದ ಮಹಿಳೆಯ ಮೇಲೆ ಅತ್ಯಾಚಾರ ನಡೆಸಿದ್ದಾರೆ. ಇನ್ನು ಅತ್ಯಾಚಾರ ಸಂದರ್ಭದಲ್ಲಿ ಮಹಿಳೆಗೆ ಹಿಗ್ಗಾಮುಗ್ಗಾ ಥಳಿಸಿರುವುದನ್ನು ನೀಚರು ವಿಡಿಯೋ ಮಾಡಿದ್ದಾರೆ. 

ಮೊದಲಿಗೆ ಮಹಿಳೆ ದೂರು ನೀಡಲು ಹೋದಾಗ ಪೊಲೀಸರು ದೂರು ಸ್ವೀಕರಿಸಲು ನಿರಾಕರಿಸಿದ್ದಾರೆ. ಈ ವಿಡಿಯೋ ವೈರಲ್ ಆದ ನಂತರ ಆರೋಪಿಗಳಾದ ಶಿವ್ ಪೂಜಾನ್ ಹಾಗೂ ವಿಶಾಲ್ ನನ್ನು ಪೊಲೀಸರು ಬಂಧಿಸಿದ್ದಾರೆ. 

ತನ್ನನ್ನು ಎಳೆದಾಡುತ್ತಿದ್ದಾಗ ಮಹಿಳೆ ನೀವು ಗಂಗಾ ನದಿಯ ಪಾವಿತ್ರ್ಯವನ್ನಾದರೂ ಪರಿಗಣಿಸಿ ನನ್ನನ್ನು ತಾಯಿ ಎಂದು ಬಿಟ್ಟುಬಿಡಿ ಎಂದು ಮನವಿ ಮಾಡಿಕೊಂಡಿದ್ದಳು. ಆದರೆ ನರರೂಪ ರಾಕ್ಷಸರು ಸುಮ್ಮನಿರುವಂತೆ ಗದರಿಸಿ ಹೊಡೆಯುವ ದೃಶ್ಯ ವಿಡಿಯೋದಲ್ಲಿದೆ.