ನವದೆಹಲಿ: ದೆಹಲಿಯ ಶಾಹದಾರ ಪ್ರದೇಶದ ಮನೆಯೊಂದರಲ್ಲಿ ಸೋಮವಾರ ಇಬ್ಬರು ಮಹಿಳೆಯರನ್ನು ಹತ್ಯೆ ಮಾಡಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.
ಬಲಿಯಾದವರನ್ನು ಶಹದಾರದ ಸುಭಾಷ್ ಪಾರ್ಕ್ ಪ್ರದೇಶದ ನಿವಾಸಿ 70 ವರ್ಷದ ವಿಮಲಾ ದೇವಿ ಮತ್ತು ಅವರ ಸೊಸೆ 45 ವರ್ಷದ ಡೋಲಿ ರೈ ಎಂದು ಗುರುತಿಸಲಾಗಿದೆ.
ಕೊಲೆ ನಡೆದಾಗ ವಿಮಲಾ ದೇವಿಯ ಮಕ್ಕಳಾದ ಸಾರ್ಥಕ್ ರೈ ಮತ್ತು ಶಶಾಂಕ್ ರೈ ಇಬ್ಬರೂ ದೆಹಲಿಯಿಂದ ಹೊರಗಿದ್ದರು ಎನ್ನಲಾಗಿದೆ.
ಮೊಮ್ಮಕ್ಕಳು ಮನೆಗೆ ಹಿಂತಿರುಗಿದಾಗ ಮನೆಗೆ ಬೀಗ ಹಾಕಿರುವುದು ಕಂಡುಬಂದಿದೆ. ತಮ್ಮೊಂದಿಗಿದ್ದ ಮತ್ತೊಂದು ಕೀ ಬಳಸಿ ಬಾಗಿಲು ತೆರೆದು ನೋಡಿದಾಗ, ತಮ್ಮ ಸಾಕು ನಾಯಿಯನ್ನು ಒಂದು ಮೂಲೆಯಲ್ಲಿ ಕಟ್ಟಿಹಾಕಿ, ತಮ್ಮ ತಾಯಿ ಮತ್ತು ಅಜ್ಜಿ ನೆಲದ ಮೇಲೆ ಸತ್ತು ಬಿದ್ದಿರುವುದು ಪತ್ತೆಯಾಗಿದೆ.
ಮನೆಯಲ್ಲಿದ್ದ ನಗದು ಹಾಗೂ ಚಿನ್ನಾಭರಣಗಳು ನಾಪತ್ತೆಯಾಗಿವೆ ಎಂದು ಪೊಲೀಸರು ತಿಳಿಸಿದ್ದಾರೆ. ಚೂರಿ ಇರಿತದಿಂದಾಗಿ ಇಬ್ಬರು ಸಾವಿಗೀಡಾಗಿದ್ದಾರೆ ಎಂದು ಪ್ರಾಥಮಿಕ ವರದಿಗಳು ತಿಳಿಸಿವೆ.
ಘಟನೆ ಬಗ್ಗೆ ಮಂಗಳವಾರ ಬೆಳಗಿನ ಜಾವ 4.20ರ ಸುಮಾರಿಗೆ ಪೊಲೀಸರಿಗೆ ಕರೆ ಮಾಡಲಾಗಿತ್ತು. ಸ್ಥಳಕ್ಕೆ ಪೊಲೀಸ್ ತಂಡ ಆಗಮಿಸಿದ್ದು, ಹಂತಕರನ್ನು ಹಿಡಿಯಲು ತನಿಖೆ ನಡೆಸುತ್ತಿದ್ದಾರೆ.
Advertisement