ಜಸ್ಟ್ ಮಿಸ್, ಮಗು ಬಚಾವ್: ಚಾಲಕನ ಸಮಯ ಪ್ರಜ್ಞೆಗೆ ಹ್ಯಾಟ್ಸಾಫ್! Video

ಕೋಝಿಕ್ಕೋಡ್: 3 ವರ್ಷದ ಪುಟ್ಟ ಬಾಲಕಿ ರಸ್ತೆ ದಾಟುವಾಗ ಬಸ್ ಸಿಲುಕುತ್ತಿದ್ದ ವಿಡಿಯೋವೊಂದು ವ್ಯಾಪಕ ವೈರಲ್ ಆಗುತ್ತಿದ್ದು, ಬಸ್ ಚಾಲಕನ ಸಮಯ ಪ್ರಜ್ಞೆಯಿಂದ ಬಾಲಕಿ ಪ್ರಾಣ ಉಳಿದಿದೆ.

ಕೇರಳದ ಕೋಝಿಕ್ಕೋಡ್ ಕೊಡಿಯಾತ್ತೂರ್ ನಲ್ಲಿ ಈ ಘಟನೆ ನಡೆದಿದ್ದು, ದಿಢೀರ್ ಅಡ್ಡಬಂದ ಪುಟ್ಟ ಬಾಲಕಿಯನ್ನು ನೋಡಿದ ಬಸ್ ಚಾಲಕ ಕೂಡಲೇ ಬಸ್ ಅನ್ನು ಬೇರೆಡೆ ತಿರುಗಿ ಬಾಲಕಿಯ ಪ್ರಾಣ ಉಳಿಸಿದ್ದಾನೆ.

ಈ ಕುರಿತ ವಿಡಿಯೋ ಇದೀಗ ಸಾಮಾಜಿಕ ಜಾಲತಾಣಗಳಲ್ಲಿ ವ್ಯಾಪಕ ವೈರಲ್ ಆಗುತ್ತಿದೆ.

ಆಗಿದ್ದೇನು?

ಆಸ್ಪತ್ರೆಗೆ ಹೋಗಿ ಮನೆಗೆ ವಾಪಸ್ ಆಗಿದ್ದ ತಾಯಿ ಆಟೋ ಚಾಲಕನಿಗೆ ಹಣ ನೀಡುತ್ತಿದ್ದಾಗ ಅಲ್ಲಿಯೇ ಇದ್ದ 3 ವರ್ಷದ ಮಗು ಕೈ ಬಿಡಿಸಿಕೊಂಡು ಓಡಿತ್ತು. ಪುಟ್ಟ ಬಾಲಕಿ ನೋಡ ನೋಡುತ್ತಲೇ ಪೋಷಕ ಕೈ ಬಿಟ್ಟು ಆಟೋದಿಂದ ಇಳಿದು ವೇಗವಾಗಿ ಓಡುತ್ತಾ ರಸ್ತೆ ಮೇಲೆ ಬಂದಿದ್ದಾಳೆ.

ಈ ವೇಳೆ ಬಾಲಕಿ ರಸ್ತೆದಾಟುತ್ತಿದ್ದಾಗ ಅದೇ ರಸ್ತೆಯಲ್ಲಿ ಪ್ರಯಾಣಿಕ ಬಸ್ ಬಂದಿದೆ. ಈ ವೇಳೆ ಬಸ್ ಚಕ್ರಕ್ಕೆ ಬಾಲಕಿ ಸಿಲುಕುವ ಅಪಾಯವಿತ್ತು. ಆದರೆ ಕೆಳಗೆ ಬಾಲಕಿಯನ್ನುಗಮನಿಸಿದ ಬಸ್ ಚಾಲಕ ಕೂಡಲೇ ಬಸ್ ಅನ್ನು ಬಲಕ್ಕೆ ತಿರುಗಿಸಿದ್ದಾನೆ.

ಇದರಿಂದ ಬಾಲಕಿಯಿಂದ ಬಸ್ ಕೂದಲೆಳೆ ಅಂತರದಲ್ಲಿ ಸಾಗಿದ್ದು ಬಾಲಕಿ ಯಾವುದೇ ರೀತಿಯ ಅಪಾಯವಿಲ್ಲದೇ ಪಾರಾಗಿದ್ದಾಳೆ. ಈ ಘಟನೆ ಅದೇ ರಸ್ತೆಯಲ್ಲಿದ್ದ ಸಿಸಿಟಿವಿ ಕ್ಯಾಮೆರಾದಲ್ಲಿ ಸೆರೆಯಾಗಿದ್ದು, ಇದೀಗ ವ್ಯಾಪಕ ವೈರಲ್ ಆಗುತ್ತಿದೆ.

ಪ್ರಾಣ ಉಳಿಸಿದ ಚಾಲಕನಿಗೆ ಸನ್ಮಾನ

ಇನ್ನು ತನ್ನ ಚಾಕಚಕ್ಯತೆಯಿಂದ ಪುಟ್ಟ ಬಾಲಕಿಯ ಪ್ರಾಣ ಉಳಿಸಿದ ಬಸ್ ಚಾಲಕನಿಗೆ ಎಲ್ಲಡೆ ವ್ಯಾಪಕ ಶ್ಲಾಘನೆ ವ್ಯಕ್ತವಾಗುತ್ತಿದೆ. ಅಂತೆಯೇ ಬಸ್ ಚಾಲಕ ಶಿನೋಜ್ ಗೆ ಸ್ಥಳೀಯರು ಸನ್ಮಾನ ಮಾಡಿ ತಮ್ಮ ಕೃತಜ್ಞತೆ ಸಲ್ಲಿಸಿದ್ದಾರೆ.