ಫೆಡರರ್, ಶರಪೋವಾಗೆ ಪ್ರಯಾಸದ ಜಯ

ಮೆಲ್ಬರ್ನ್: ಸ್ವಿಡ್ಜರ್ಲೆಂಡ್‌ನ ರೋಜರ್ ಫೆಡರರ್ ಹಾಗೂ ರಷ್ಯಾದ ಮಾರಿಯಾ ಶರಪೋವಾ ಕ್ರಮವಾಗಿ ಪುರುಷರ ಹಾಗೂ ಮಹಿಳೆಯರ ಸಿಂಗಲ್ಸ್‌ನ ದ್ವಿತೀಯ ಸುತ್ತಿಗೆ ಪದಾರ್ಪಣೆ ಮಾಡಿದ್ದಾರೆ. ಆದರೆ ಇವರಿಬ್ಬರಿಗೂ ಈ ಜಯ ಅಷ್ಟು ಸುಲಭವಾಗಿ ದಕ್ಕಲಿಲ್ಲ.

ಫೆಡರರ್‌ಗೆ ಅವರ ವಿರುದ್ಧ ಸೆಣೆಸಿದ ಇಟಲಿಯ ಸೈಮನ್ ಬೊಲೋಲಿ ಅವರು ತೀವ್ರ ಪೈಪೋಟಿ ನೀಡಿದರೆ, ಇನ್ನು ಶರಪೋವಾಗೆ ಅವರ ದೇಶದವರೇ ಆದ ಅಲೆಕ್ಸಾಂಡ್ರಾ ಪನೋವಾ ತೀವ್ರ ಪ್ರತಿಸ್ಪರ್ಧೆ ನೀಡಿದರು. ಈ ಅಡೆತಡೆಗಳನ್ನು ದಾಟಿದ ಜೊಕೊ, ಶರಪೋವಾ ದ್ವಿತೀಯ ಸುತ್ತಿಗೆ ಪದಾರ್ಪಣೆ ಮಾಡುವಲ್ಲಿ ಯಶಸ್ವಿಯಾದರು.

ಫೆಡರರ್‌ಗೆ ಪೈಪೋಟಿ ನೀಡಿದ ಸೈಮನ್, ಪಂದ್ಯದ ಮೊದಲ ಸೆಟ್‌ನಲ್ಲೇ ಪರಾಕ್ರಮ ತೋರಿಸಿದರು. 6-3 ಅಂತರದಿಂದ ಮೊದಲ ಸೆಟ್ ಗೆಲ್ಲುವ ಮೂಲಕ, ನಾಲ್ಕು ಬಾರಿ ಚಾಂಪಿಯನ್ ಪಟ್ಟ ಅಲಂಕರಿಸಿದ್ದ ಫೆಡರರ್‌ಗೆ ಚುರುಕು ಮುಟ್ಟಿಸಿದರು. ಆದರೆ ಇನ್ನುಳಿದ ಸೆಟ್‌ಗಳಲ್ಲಿ 6-3, 6-2, 6-2 ಅಂತರದಲ್ಲಿ ಜಯ ಗಳಿಸಿದ ಅವರು, ಮುಂದಿನ ಸುತ್ತಿಗೆ ಪಾದಾರ್ಪಣೆ ಮಾಡಿದರು.

ಇನ್ನು, 2ನೇ ಶ್ರೇಯಾಂಕಿತೆ ಮಾರಿಯಾ ಶರಪೋವಾ ಸಹ ತಮ್ಮ ಎದುರಾಳಿ ಅಲೆಕ್ಸಾಂಡ್ರಾ ಅವರಿಂದ ತೀವ್ರ ಪ್ರತಿರೋಧ ಎದುರಿಸಬೇಕಾಯಿತು. ಮೊದಲ ಸೆಟ್‌ನಲ್ಲಿ ರಷ್ಯಾದ ಆಟಗಾರ್ತಿ 6-1ರ ಅಂತರದಲ್ಲಿ ಜಯ ಸಾಧಿಸಿದರಾದರೂ, 2ನೇ ಸೆಟ್‌ನಲ್ಲಿ ಜಯ 6-4 ಅಂತರದಲ್ಲಿ ಅಲೆಕ್ಸಾಂಡ್ರಾ ಪಾಲಾಯಿತು. ಅನಂತರ 3ನೇ ಸೆಟ್‌ನಲ್ಲಿ ಪುಟಿದೆದ್ದ ಶರಪೋವಾ, 7-5ರಿಂದ ಗೆಲ್ಲುವ ಮೂಲಕ ಪಂದ್ಯದಲ್ಲಿ ಜಯ ಸಾಧಿಸಿದರು.