ಇಂದೋರ್: ಪ್ರವಾಸಿ ದಕ್ಷಿಣ ಆಫ್ರಿಕಾ ತಂಡವು ಭಾರತ ಪ್ರವಾಸ ಪ್ರಾರಂಭವಾದಾಗಿನಿಂದ ಸೋಲಿನ ಮುಖವನ್ನೇ ಕಾಣುತ್ತಿದ್ದ ಧೋನಿ ಪಡೆ ಕೊನೆಗೂ ಗೆಲುವಿನ ನಗೆ ಬೀರಿದೆ.
ಇಂದೋರ್ ನ ಹೋಲ್ಕರ್‌ ಸ್ಟೇಡಿಯಂನಲ್ಲಿ ಬುಧವಾರ ನಡೆದ ಎರಡನೇ ಏಕದಿನ ಪಂದ್ಯವನ್ನು ಭಾರತ ದಕ್ಷಿಣ ಆಫ್ರಿಕಾವನ್ನು 22 ರನ್ನುಗಳಿಂದ ಸೋಲಿಸುವ ಮೂಲಕ ಜಯ ಸಾಧಿಸಿತು. ಈ ಮೂಲಕ ಕಾನ್ಪುರದಲ್ಲಿ ನಡೆದಿದ್ದ ಮೊದಲ ಏಕದಿನ ಪಂದ್ಯದಲ್ಲಿ ಅನುಭವಿಸಿದ್ದ ಸೋಲಿಗೆ ಪ್ರತೀಕಾರ ತೀರಿಸಿಕೊಳ್ಳುವ ಮೂಲಕ ಸರಣಿಯಲ್ಲಿ 1-1 ಸಮಬಲ ಸಾಧಿಸಿತು.
ಭಾರತದ ಇಂದಿನ ಪಂದ್ಯಕ್ಕೆ ಆಸರೆಯಾಗಿದ್ದು ನಾಯಕ ಮಹೇಂದ್ರ ಸಿಂಗ್ ಧೋನಿ. ಟೀಂ ಇಂಡಿಯಾ ನೀಡಿದ 247 ರನ್ನುಗಳ ಸಾಧಾರಣ ಸವಾಲನ್ನು ಬೆನ್ನತ್ತಲು ವಿಫ‌ಲವಾದ ದಕ್ಷಿಣ ಆಫ್ರಿಕಾ 43.4 ಓವರುಗಳಲ್ಲಿ 225 ರನ್ನುಗಳಿಗೆ ಆಲೌಟ್‌ ಆಗುವ ಮೂಲಕ 22 ರನ್ನುಗಳಿಂದ ಸೋಲನುಭವಿಸಿತು.
ನಾಯಕ ಧೋನಿ (ಅಜೇಯ 92) ಮತ್ತು ಅಜಿಂಕ್ಯ ರಹಾನೆ (51) ಅವರ ಜವಾಬ್ದಾರಿಯುತ ಬ್ಯಾಟಿಂಗ್‌ ನೆರವಿನಿಂದ ನಿಗದಿತ 50 ಓವರುಗಳಲ್ಲಿ 247 ರನ್ನುಗಳ ಸಾಧಾರಣ ಮೊತ್ತವನ್ನು ಪೇರಿಸಿತು. ಟೈಲ್‌ ಎಂಡ್‌ ನಲ್ಲಿ ಹರ್ಭಜನ್‌ ಸಿಂಗ್ ಬಿರುಸಿನ ಆಟವಾಡಿದರು ಅವರ ಗಳಿಕೆ 22 ಎಸೆತೆಗಳಲ್ಲಿ 22 ರನ್ನುಗಳು.
